སྟེང་ཆེན་གྱི་དྲྭ་ཁང་།

རྒས་དང་གཞོན་དང་ན་སོ་དར་བ་ཡི།།

རྒྱ་དང་བོད་དང་ཁ་ཆེ་ཡུལ་གུར་སོགས།།

ཡུལ་དང་འབྲོག་དང་ཁེ་ལས་བྱེད་པོ་ཀུན།།

ང་དང་ཁྱོད་བཅས་ལྷན་དུ་གནས་འདིར་འཛོམས།།

ཁྲེལ་དང་ངོ་ཚའི་གདོང་འབག་བྲལ་བ་ཡི།།

ཡུལ་དང་ལུང་པའི་གཤིས་ལས་འདས་སོང་བ།།

ལུས་དང་ངག་གི་བྱེད་སྤྱོད་ཐབས་རྡུག་པ།།

གནས་འདིར་གར་གྱིས་འཚོ་བའི་གཞི་རུ་གྲུབ།།

འབུ་དང་རྒྱ་བན་གསོད་པའི་རོལ་རྩེད་སོགས།།

ལོ་དང་ཟླ་བའི་ཁྲོད་ནས་རྫོགས་མཐའ་མེད།།

རང་དང་གཞན་ཀུན་དོན་མེད་དྲྭ་ཁང་ནང་།། 

རྟག་ཏུ་བྲེལ་འདི་མི་ཚེ་སྟོང་ཟད་ཡིན།།

སྐད་དང་ཡི་གེའི་བཀོལ་སྤྱོད་མི་བསམ་ལ།།

དུས་དང་ཡུལ་གྱི་འགྱུར་བག་མི་ལྟ་ཞིང་།།

ཁྱོད་དང་ང་གསོད་ཁོ་དང་གཞན་གསོད་སོགས།།

དྲག་འགུལ་ཁོ་ནར་རྩེད་པའི་ཉིན་བགྲང་ཟད།།

ནོར་ལུག་རྐང་རྗེས་འཚོལ་བའི་རྫི་རྒན་དང་།།

སློབ་མའི་མིང་བྱང་ཐོགས་པའི་བླུན་རྒན་ཏེ།།

དམར་སེང་རྒྱན་གོས་གཟབ་པའི་གྲྭ་རྒན་སོགས།།

ཐོབ་དཀའི་རྟེན་བཟང་འདི་དྲའི་དོན་གྱིས་སྟོང་།།

དོན་མེད་རྩེད་མོས་ལོ་ཟླ་ཟ་བཞིན་པ།།

དོན་དུ་བསམ་ཚེ་ཅི་འདྲའི་སྐྱོ་བའི་ལས།།

དོན་གྱིས་སྟོང་བའི་འུ་ཚོ་ལྷན་འཛོམས་འདི།།

དོན་ལྡན་ཞིག་ཏུ་རེ་བས་ཡིད་མཚོ་བསྲུབ།།

དེ་ལྟའི་དོན་མེད་རྩེད་མོར་གཡེང་བ་ཡི།།

ང་དང་ཁྱོད་ཚོ་འདུས་སྡོད་ཆེ་དྲགས་པས།།

བསམ་པའི་ཟུག་ངུ་སོར་མོས་མྱོང་བའི་ཚུལ།།

དྲྭ་ཁང་དག་ཏུ་དལ་གྱིས་ཐལ་སོང་ལོ།།