ཕྱེ་མར་མཆོད།།
ལོ་རྒྱུས་ཐེབ་བར་བརྩེགས་པའི་རྡོ་རིང་ན།།
མེས་པོའི་རྣམ་ཤེས་སོར་རྩེས་བསྐྲུན་པ་ཡི།།
དཀར་ནག་འཇིག་རྟེན་བདག་གིར་བྱས་པ་ལ།།
རུ་མཚོན་རླབས་ཀྱིས་བསྐྱོད་པའི་ཕྱེ་མར་མཆོད།།
ལུགས་གཉིས་རླབས་རིས་གཡོ་བའི་སྟ་གོན་ལ།།
འཛམ་གླིང་ནོར་བུའི་ཡང་རྩེ་ཡི་གེའི་རིས།།
སྒྱུ་རྩལ་རིག་པའི་དགའ་སྟོན་སོར་མོའི་འཕྲུལ།།
ཤེས་རིག་མེ་ཏོག་འཛུམ་པའི་ཕྱེ་མར་མཆོད།།
ཞི་བདེའི་ཁ་གཡང་འབར་བའི་རིགས་རྒྱུད་ལ།།
རྒྱལ་བསྟན་ཉི་ཟླ་ཟུང་གིས་བྱིན་མཐུ་ཡིས།།
གཏན་བདེའི་གཟི་འོད་འཐུང་བའི་མེ་ཏོག་སྟེ།།
སྙིང་རྗེའི་འཛུམ་ཟེར་འཐུ་བའི་ཕྱེ་མར་མཆོད།།
རྒྱ་ཤོད་འབྲུ་དྲུག་སྙེ་མའི་རྦ་རླབས་གཡོ།།
བྱང་འབྲོག་ཕྱྭ་གཡང་ནོར་གྱི་རྒྱུ་སྐར་བཀྲ།།
འདོད་རྒུའི་དཔལ་ལ་རོལ་བའི་སྐལ་བཟང་སྟེ།།
རྫོགས་ལྡན་འགྲོན་དུ་ཁུག་པའི་ཕྱེ་མར་མཆོད།།
ཡིད་འོང་འཁོར་ཡུག་རབ་དཀར་གངས་ལ་བྱས།།
ཐོག་མའི་མཇལ་དར་མདངས་དཀར་དར་ལ་བྱས།།
ཞི་བདེའི་ཁ་གཡང་བསམ་དཀར་ཚིག་ལ་བྱས།།
རྩི་བཅུད་མར་དཀར་བརྒྱན་པའི་ཕྱེ་མར་མཆོད།།
བཅུ་རིག་ཐེག་དགུ་སྡེ་བཞི་སྒོ་མཛོད་ལྔ།།
འདི་ཕྱི་ཕན་བདེའི་ཉི་འོད་པད་མོའི་དཔྱིད།།
བསམ་པའི་གཏེར་ལ་སྤྱོད་པའི་ལས་སྐལ་ཏེ།།
འཛམ་གླིང་ཡང་རྩེར་བསྔགས་པའི་ཕྱེ་མར་མཆོད།།
༢༠༠༨*༢༠*འབྲོག་སྨན་གཡུ་རྩེའི་འདབས་ཞོལ་དུ་བྲིས།།
རང་རྩོམ་ལས་བཤུས།
- ཟིན་ཐོ་གོང་མ།རྫོང་དྲུག་ཡུལ་གྱི་གཏམ་རྒྱུད།།
- ཟིན་ཐོ་འོག་མ།རྒྱལ་གཤེན་རྗེས་དྲན།
གཡུང་དྲུང་གི་སྤུན་གྲོགས་དམ་པ་ཁྱུང་སྨྱུག་མཛེས་ལགས་ལ་བརྗོད་བྱ་དང་རྗོད་བྱེད་གཉིས་ཆ་ནས་ཕྱུག་པའི་ཕྱག་རྩོམ་ལེགས་པོ་འདི་ཕྱིར་མཆོག་ལ་འབུལ་བ་དང་ཆབས་ཅིག་ཏུ་ལོ་སར་ལ་ཉེ་བའི་སྐབས་ཁ་གཡང་གཙང་མ་ཞིག་སྒྲོག་རྒྱུ་མ་བརྗེད་ཟེར་རྒྱུ་དེ་ཡིན། ཨ་ཀུན་གསལ་ཟླ་བ།