དཔལ་ལྡན་བླ་མའི་གསང་གསུམ་བརྗོད་པའི་དབྱངས་སྙན་འཇོལ་མོའི་མགྲིན་གླུ།།

གཞུང་ལུགས་རྒྱ་མཚོའི་དགོངས་པ་དཔྱིས་ཕྱིན་ཞིང་།།

རྒྱུད་སྡེ་རྒྱ་མཚོའི་མཛོད་ལ་མངའ་བརྙེས་པའི།།

 རིག་འཛིན་རྒྱ་མཚོའི་མཛད་པ་ལྷུར་བཞེས་པ།།

ལྷུན་གྲུབ་རྒྱ་མཚོའི་ཚོགས་ཀུན་རྒྱལ་གྱུར་ཅིག།

རིང་ནས་བརྩེ་ཆེན་སྒེག་པའི་རོལ་མཚོ་ལས།།

 མོས་ལྡན་མཁའ་རུ་སྒྱུ་སྐར་ཕྲེང་བའི་གར།།

ཐར་འདོད་སྙིང་ལ་བདུད་རྩི་གསར་པའི་རོ།།

འཛད་པ་མེད་པའི་དགེ་ལེགས་ཅི་ཡང་སྦྱིན།།

 ཟུང་འཇུག་སྒྱུ་མའི་སྐུ་ལ་མཚན་དཔེའི་མཛོད།།

རྩ་རུང་ཐིག་ལེའི་འཕྲུལ་ལ་རྣམ་བརྩེན་པ།།

ཨ་ཤད་ཧམ་གྱི་ཟླ་བ་ཞུན་མ་ཡི།།

ཐབས་མཆོག་གསང་བའི་གོ་ཆ་རྣམ་པར་བཙན།། 

རྨི་བ་སྒྱུ་མར་ཆུབ་པའི་རྣལ་འབྱོར་གྱིས།།

དངོས་ཀུན་སྣང་བ་མཚན་མའི་ཕུང་པོ་ཞིག།

 གདན་གསུམ་དག་པ་ལྷ་རུ་འབྱམས་པ་ཡིས།།

 རིག་འཛིན་རྣམ་བཞིའི་འཕྲིན་ལས་ལྷག་མེད་བཞེས།།

རྟོག་མེད་ཡེ་ཤེས་གོ་ཆ་རྫོགས་པ་ཡི།།

རྟོག་འཛིན་ལྷ་འདྲེས་གསད་གསོའི་འཆིང་བ་ཀུན།།

 ཉག་ཅིག་ཏིང་འཛིན་ཀློང་དུ་བཅད་པ་ལ།།

 ཚོགས་ཆེན་ཐིག་ལེ་ཤེ་ཡེས་གྲུབ་ལ་རྫོགས།།

རྣམ་གསུམ་སྣང་བ་འོད་གསལ་མཁའ་ལ་བཀྲ།།

སྐྱེ་འཆི་བར་གསུམ་སྐུ་གསུམ་དབྱིངས་ནས་ཤར།།

བསྐྱེད་རྫོགས་རྫོགས་ཆེན་ལྟ་བའི་ཀློང་ནས་བཞེངས།།

 གྲུབ་པའི་ཁྱུ་མཆོག་བྱེ་བའི་རྒྱན་དུ་སྒེག།

དཀར་འཇམ་སྒྲོན་མ་དག་པ་ལྷ་ལམ་ནས།།

སྟོང་གསལ་རིག་པའི་ཉི་གཞོན་ཐོགས་མེད་འཆར།།

 བདེ་ཆེན་འཁོར་ལོར་འཇུག་པའི་ཉམས་རྟོགས་ཀྱིས།།

 གདོད་མའི་གཤིས་སུ་ཀུན་བཟང་བདག་གེར་བ།།

རྟོག་ཚོགས་ཆུ་འཛིན་ལྷན་སྐྱེས་མཁའ་ལ་ཐིམ།།

ཉིན་མཚན་ཁོར་ཡུག་འོད་གསལ་ཀློང་དུ་རྩེད།།

ཐབས་མཆོག་རྒྱལ་པོ་གསང་བའི་མཛོད་འཛིན་པ།།

ལྷར་བཅས་སྐྱབས་ཅིག་ལྷུན་གྲུབ་རྒྱ་མཚོའི་སྡེ།།

གོང་གི་གསང་གསུམ་ལྷ་མིའི་རྒྱན་ཅིག་པུ།།

སྐལ་ལྡན་བྱེ་བ་ཉེར་འཚོའི་དགའ་སྟོན་དུ།།

གོང་གི་འཕྲིན་ལས་ཡར་ཟླའི་དཔལ་ཡོན་ཀུན།།

སྐལ་བཟང་མགོན་དུ་བསྐལ་བརྒྱར་བརྟན་གྱུར་ཅིག།

 ཅེས་ཁྱུང་སྨྱུག་མཛེས་སམ་ནམ་མཁའ་གཙུག་ཕུད་ཀྱིས་ཀོ་རྒྱལ་བདེ་ཆེན་ཀུན་གྲགས་གླིང་དུའོ།།