དཔལ་རིས་ཡུལ་གྱི་སྐར་རྒྱན།།

སྙན་ངག་མཁན་པོའི་སོར་མོའི་ཉམས་འགྱུར་མགྲིན་པའི་དབྱངས་ཀྱིས་མཁའ་ལ་སྤུར།།

ལང་ཚོའི་སྟངས་སྟབས་གར་ལ་འཕྱོ་བའི་ཡིད་ཀྱི་བརྟན་པ་དབང་མེད་རྐུ།།

དཔལ་རིས་ཡུལ་གྱི་སྐར་རྒྱན་ཞིག་གིས་ང་ལ་བརྗོད་བྱ་གསོན་པོ་བྱིན།།

ཐོག་མའི་དབྱངས་རྟ་རྣ་བའི་དཔྱིད་དུ་གཡུ་རྩེ་རྫ་རིའི་འདབ་ནས་ཐོས།།

 བར་དུ་ཉམས་འགྱུར་འོད་ཀྱི་འཁོར་ལོས་ང་ལ་ཡང་ཡང་གསལ་བཤད་བྱས།།

ད་ལྟའི་ཟློས་གར་སྙན་ཚིག་འདི་ཡི་བརྗོད་བྱ་ཟུངས་སུ་འཇུག་པར་བྱས།།

གངས་རིའི་ཡུལ་གྱི་ཁུ་བྱུག་ཡིན་ཞེས་ཐོས་ལྡན་བྱེ་བའི་མགྲིན་སྒྲ་སྒྲོགས།

སྐར་ཕྱོགས་ཁྲོད་ཀྱི་རྒྱན་ཆ་ཡིན་ཞེས་བཤེས་གཉེན་བྱེ་བའི་ངག་ལས་བྱོ།།

མ་སྨན་ཟུང་གི་གར་སྟེགས་འདི་ནས་ང་ལ་ཚོར་ཤེས་གསར་དུ་སྦྲན།།

ལྷན་འཛོམས་ཁྲོད་ཀྱི་བརྩེ་བ་ཟབ་མོས་འབྲལ་མི་ཕོད་པའི་ན་ཟུག་བྱིན།།

 དུང་ཆུང་དཀར་མོའི་ངུར་དབྱངས་རིང་མོས་འོ་མའི་རླབས་རྒོད་མཁའ་རུ་འཕྱོ།།

ཐགས་དཀར་འཐགས་པའི་དབྱངས་ཚིག་ཟུང་གིས་གོ་ལའི་ཁྱོན་ལས་གནམ་མཐའ་ཉུལ།།

ཁྱུ་བྱུག་སྔོན་མོའི་སེམས་ཚེགས་ཤིག་གིས་དུས་བཞིའི་དྲན་པ་དབྱངས་སུ་གྱེར།།

དཔའ་རིས་ཡུལ་གྱི་གཏམ་རྒྱུད་སྙན་མོ་གླུ་སྐད་སྟེང་ནས་ང་ལ་སྒྲོན།།

ཁ་སང་གཏམ་རྒྱུད་ད་ཆ་སྒྲོག་དུས་མ་འོངས་དུས་ལ་རེ་བཞག་མང་།།

མདོ་འཛིན་མཁན་པོའི་ངག་གི་སྒྱུ་རྩལ་དགོད་ཁ་བསླང་བའི་ཀུ་རེ་ཞིག།

བགྲོ་གླེང་མཁན་པོའི་གཏམ་གྱི་ཉམས་བག་ཡིད་ལ་འཐད་པའི་རོལ་མོ་ཞིག།

ཧད་དེ་ལུས་པའི་ལྟད་མོ་བ་ཚོ་བཟློས་གར་བར་གྱི་སྐོར་བྲོ་ཡིན།།

རྨི་ལམ་ཡུལ་ན་འོད་འཚེར་བཞད་པའི་གངས་རི་ཡུལ་གྱི་སྐར་རྒྱན་ཏེ།།

རེ་བའི་ཁྲོད་ན་མངོན་པར་མཐོ་བའི་ཐུན་མོང་སྣང་བའི་གར་སྟེགས་ཤིག།

ཡིད་ཀྱི་གསོས་སུ་རོལ་བའི་ཚིག་སྦྱོར་སོར་མོས་ལན་མོ་ཁྱོད་ལ་བྱེད།།