གཡུང་དྲུང་ཡན་ལག་ཚིགས་སུ་བཅད་པའི་དབྱངས་སྙན།

སྣང་བའི་ཞིང་དུ་ཐེག་དགུའི་དབྱངས་སྙན་གྱིས།།

 ཀུན་ཀྱང་མྱ་ངན་མེད་པའི་གྲོང་ཁྱེར་ཆེར།།

 བཀྲི་བའི་སྟོན་མཆོག་མ་འདྲིས་མཛའ་བཤེས་ཆེ།།

 དམུ་རིགས་རྒྱལ་སྲས་དམ་པ་གཙུག་ན་རྒྱལ།།

ཐེག་མཆོག་ལྟ་བའི་ཀློང་ཆེན་ལས་འོང་པའི།།

སྣང་གྲགས་སྲིད་ཞིའི་རྦ་རླབས་འཕྱུར་བ་ལས།།

རང་གཟུགས་དགྲ་རུ་མཚན་འཛིན་སེང་ཆེན་ཁྱུ།།

འཇོམས་པའི་ཤེས་རབ་གླང་ཆེན་མཐུ་ལ་བལྟ།།

མཐའ་བཞི་རྒྱ་གྲོལ་ནམ་མཁའི་མཐོངས་ཡངས་པོར།།

ལྟ་བ་ཁྱུང་ཆེན་ལྡིང་བའི་གཤོག་རྩལ་གྱིས།།

རྣམ་བྱང་དཔག་བསམ་ཕྱོགས་ལ་དབང་བྱེད་པའི།།

དྲན་ཐག་རྩིབས་སྟོང་འཁོར་ལོ་ཅི་ཡང་བསྒྱུར།།

བརྒྱ་ཕྲག་བཅུ་གཉིས་དཔལ་ལ་སྤྱོད་པའི་མཆོག།

སྟོང་གསུམ་རིན་ཆེན་ཁྲག་ཁྲིག་གཏེར་གྱིས་ཁེངས།།

སྔར་མིན་དོན་ཐོབ་ཕན་བདེའི་སྐྱིད་ལ་དབང་།།

དགའ་བ་ནོར་བུའི་མཛོད་ལ་བདག་གིར་བ།།

སྨོན་འཇུག་ཚོགས་གཉིས་ཀླུང་ཆེན་བརྒལ་བའི་མཐུས།།

སྐུ་བཞི་མངོན་དགའི་གནས་ལ་བསྐྱེལ་བ་ཡི།།

ལྷག་བསམ་ལྕག་གིས་བསྐུལ་བའི་ཟིལ་ཤུགས་ཀྱིས།།

བརྩོན་འགྲུས་རྟ་པོ་རིན་ཆེན་ཡུན་གྱིས་བསྐྱོད།།

དཔྱད་འཇོག་རྣལ་འབྱོར་ཟུང་ལ་དཔལ་སྟེར་ཞིང་།།  

ཞི་ལྷག་ཏིང་འཛིན་ཉམས་ཀྱི་བདེ་དགའ་འབར།།

བྱང་ཆབ་ལམ་ཆེན་བགྲོད་པའི་གྲོགས་ཀྱི་ཕུལ།།

ཤིན་སྦྱོང་ལང་ཚོའི་དཔལ་ཆགས་བཙུན་མོར་བསྙེན།།

རྩོལ་བཅས་མཚན་མས་བསྒུལ་བ་ལས་འདས་པའི།།

དམིགས་མེད་རྩེ་ཅིག་བརྟན་པའི་གོ་ཆ་ཅན།།

ས་དབང་ལེགས་ཉེས་བཀའ་ཡི་འཁོར་ལོ་བ།།

ཏིང་འཛིན་བློན་པོའི་བློ་གྲོས་རབ་ཏུ་བརྟན།། 

བཟོད་པའི་གོ་ཆ་འབུག་པའི་རྣོ་དབལ་ལ།།

བྱུང་ཚོར་གཡུལ་ངོ་ཟློག་པའི་དཔལ་རྩལ་ཅན།།

ཀུན་བརྟགས་དཔུང་ཆེན་རྣམ་བཞིའི་གཤེད་མ་སྟེ།།

བཏང་སྙོམས་དམག་དཔོན་ཕམ་པ་མེད་པར་བརྗིད།།

ཨེ་མ་ལུགས་ཉིད་དཔའ་ཁའི་དན་རྟགས་སུ།།

སྲིད་ཀྱི་རིན་ཆེན་རོལ་མཚོའི་གྲངས་འཛིན་པ།།

འཕགས་ནོར་བདུན་ལྡན་ཞི་མཚོ་ཆེན་པོ་རུ།།

རྒྱལ་སྲས་དམ་པའི་རྒྱན་དུ་སྒེག་ལ་ལྟོས།།

ཞེས་ས་དང་པོ་ཐོབ་པའི་འཕགས་པའི་ནོར་བདུན་གྱི་དཔེ་རྒྱལ་སྲིད་སྣ་བདུན་ལས་སྦྱར་བ་ས་ལམ་རྣམས་སུ་བསྟན་པ་བཞིན་དཔེ་དོན་སྦྱོར་བའོ།། ༢༠༡༣ ༩ ༢༦ལའོ།