རྣམ་དཔྱོད་འགྲན་པའི་ངར་ཁ།།

རྟགས་ཚུལ་རིགས་པ་བྱེ་བའི་རྣམ་དཔྱོད་ཅན།།

ཕས་རྒོལ་ཕྱེ་མར་འཐག་པའི་མེ་ཆར་གྱིས།།

བརྩོད་པའི་དོད་འཇོ་ཤ་རི་དྲན་པ་ཞེས།།

སྒྲ་ཚད་སྨྲ་བའི་དྲན་དབང་རྒྱལ་གྱུར་ཅིག།

རིག་པའི་སེང་ཆེན་བྱེ་བ་ཀླལ་བའི་དབྱངས།།

བློ་ཆུང་ཝ་སྐྱེས་དཔལ་དུ་འོས་མིན་ཡང་།།

ཚིག་གི་པད་ཚལ་འགྲེམ་པའི་སྦྲ་མ་རས།།

དོན་གྱི་སྦྲང་རྩི་མྱོང་བའི་དབྱངས་རྟ་འདྲེན།།

སུལ་བརྒྱའི་ཟླ་གམ་གཡང་ལུགས་གྱོན་པའི་མོད།།

རྩོད་ཞྭ་ཟུར་འགྲོས་བགྱི་བའི་སྟངས་སྟབས་བཅས།།

ཆེས་མཐོའི་དམ་ཁྲིའི་ཕང་བར་སྡོད་པ་ན།།

སྙིང་ཆུང་དར་ལྕེ་ཡོ་བའི་ཚུལ་ལ་རྟོག།

ཡིན་ཞེས་བརྗོད་ན་རིགས་པས་མཚོན་གྱིས་འཚེ།།

མིན་པར་འཆེས་ཀྱང་བཀའ་ལུང་རྡོ་རྗེས་བརྩོག།

སྨྲ་བ་བཅད་ན་ཁྱེར་སྒྲས་གནམ་ས་འགས།།

རིགས་ལམ་སྟག་སེང་འཐབ་པས་གཡུལ་འདི་འཇིགས།།

འདོད་ལན་རེ་རེས་གཞུང་དོན་ཕྱི་འབུད་གཏོང་།།

རྟགས་ལན་རེ་རེས་ཚ་དང་འཁོར་གསུམ་བསུ།།

ལན་གསུམ་ཕུབ་མོས་མི་ཁོག་བརྣོ་མཚོན་མང་།།

བཀའ་ལུང་ཇི་བཞིན་བཀྲལ་ཚེ་དམ་བཅའ་འཆོར།།

ཡིག་ཆར་དགོངས་པ་བླང་ཚེ་ལ་རྒྱ་འཆོར།།

བཤད་སྒྲོས་མང་དུ་འཐེན་ཚེ་རྩོད་ཉམས་འཆོར།།

དེ་དག་སྡོམ་ཚེ་བླུན་པོའི་རང་མཚང་འཆོར།།

དམ་བཅར་སྡོད་ཚེ་རྒོལ་བས་ལན་རྣམས་སྲི།།

རྒོལ་བར་ལང་ཚེ་དམ་བཅས་སྒུབ་བྱེད་བསླང་།།

རྒོལ་དང་ཕྱི་རྒོལ་གང་དུ་ཞུག ས་པ་ན།།

རྡོ་བཅལ་སྔོན་པོའི་དཀྱིལ་གྱི་དབུལ་པོར་ངེས།།

ཡིན་ལུགས་སྒྲུབ་བྱེད་གནས་ལྕགས་ཐོག་ལས་ཚ།།

མིན་ཞེས་ཁས་ལེན་རྡོ་རྗེའི་གོ་ལས་བཙན།།

ཡིན་མིན་ཐ་སྙད་འཁྲུགས་པའི་གཡུལ་ས་ན།།

ཤེས་བྱའི་གསང་བ་རེ་རེའི་རྒྱལ་ཁ་འདུག།