སེམས་ཀྱི་གད་རྒྱངས།།
ཀ་ནས་སྙན་པའི་དབྱངས་ཀྱི་དང་པོ་སྟེ།།
ཁ་བའི་ཡུལ་གྱི་མགྲིན་པའི་དཀྱིལ་འཁོར་ན།།
ག་ན་བཞུགས་ཀྱང་རིགས་ཀྱི་ཁ་བྱང་ལ།།
ང་ཡི་བོད་སྐད་གཙང་མ་གླུ་ལས་སྙན།།
ཅ་ག་བྱེད་པའི་ཐབས་ལ་ལེགས་བརྩོན་ཏེ།།
ཆ་བྱད་བཟང་པོའི་བྲིས་རྩལ་ལྷུ་རུ་ལེན།།
ཇ་ལོ་བྲེག་ལྟར་མགོ་ཚག་ཕོ་རང་དང་།།
ཉ་མིག་དཔེ་འོས་དཀར་ཆ་ནག་ཤེད་མཉམ།།
ཏ་ཀུ་ཐོག་པའི་བགྲེས་པོ་དང་འདྲ་བར།།
ཐ་མལ་སློབ་ཕྲུག་རེ་འགའི་སྨྱུག་རྩལ་ལ།།
ད་ཆ་ཤེས་ཀྱང་དོ་ནུབ་མི་ཤེས་པའི།།
ན་ཆུང་སློབ་མར་ནད་གཞི་ཆེ་ཙམ་མཐོང་།།
པ་ཊུར་བྱེ་བའི་མཁྱེན་རྩལ་ལས་འོང་པའི།།
ཕ་ཡུལ་འདི་ཡི་སྐད་ཀྱི་སྲོག་ཅིག་པུ།།
བ་སོགས་བཞི་བཅུའི་རྣམ་དབྱེ་ལ་སོགས་ཀུན།།
མ་ལུས་འབྱེད་པའི་རྣམ་དཔྱོད་འཚོལ་ལ་ཞུགས།།
ཙ་པ་ཨའ་ཨོའ་སྨྲ་བ་མཁས་ན་ཡང་།།
ཚ་རུ་གྱོན་པའི་དྲི་ཙམ་གོས་མིན་ན།།
ཛ་དྲགས་ཆེ་བའི་དིང་གི་ཆ་རེ་རེར།།
ཝ་ལེར་བཤད་ན་བོད་མི་རྫུན་མ་ཙམ།།
ཞྭ་གོས་བསྒྱུར་ལ་མཁས་པའི་ཚུལ་ཅིག་དང་།།
ཟ་རྒྱུ་སྣ་མང་མཉམ་སྦྱོར་དྲགས་ན་ཡང་།།
འ་ཅག་རང་གི་སྲོག་ཏུ་ཞུགས་པ་ཡི།།
ཡ་མཚན་འཛིན་པ་སྐད་གཙང་སྙིང་དུ་ཆོངས།།
ར ་རུ་འུ་ཡི་རྣམ་དབྱེ་ཚིག་ཕྲད་ཀྱི།།
ལ་དོན་སྦྱོར་བའི་ཚུལ་ལ་མི་རྩོན་པར།།
ཤ་མར་བྲོ་བས་དབེན་པའི་རྩོམ་ཡིག་ཀྱང་།།
ས་བཅུ་འཕགས་པས་བྲིས་ཀྱང་སུ་ལ་སྙན།
ཧ་ཅང་བཤད་ན་གངས་རིའི་སྐད་ཀྱི་ཆ།།
ཨ་ཁུ་ང་ཡི་བསམ་ཚུལ་དེ་ལྟར་ཏེ།།
ཧ་ལམ་ད་ལྟའི་བོད་མི་གྱུར་ཀུན་གྱིས།།
ཨ་ཁ་རང་སྐད་མི་གཅེས་གཞན་སྐད་གཙོ།།
༢༠༡༣ ༨ ༡༠རྩེ་དྲུག་ནས།
- ཟིན་ཐོ་གོང་མ།དགོས་ན་ལོངས།
- ཟིན་ཐོ་འོག་མ།གཡུང་དྲུང་ཡན་ལག་ཚིགས་སུ་བཅད་པའི་དབྱངས་སྙན།
བཟང་གི་འདུག་ཡི་རང་ཡོད། ད་ལོའི་ཁྱུང་ཆེན་རིགས རླབས་ག་དུས་འགྲིམས་སྤེལ་བཟོ་ཡོང་རེད་ལགས།ད་ལོའི་ཁྱུང་ཆེན་རིག་པའི་གཤོག་རླབས་བསྒྲིགས་ཟིན་མོད། དུས་བབ་དང་། སྤུུས་ཚད་ལ་རེ་བས་ད་དུང་འགྲིམས་སྤེལ་ཐུབ་མ་སོང་།