འཕྲིན་ལས་ཟབ་མོའི་འཛུམ་དཀར།
རྒྱལ་བའི་རྗེས་བརྩེ་འགྲོ་ལ་བསྒྱུར་བ་ཡི།།
སུམ་ལྡན་བསྟན་མཆོག་ཞྭ་དཀར་འཆང་བའི་ལུགས།།
གྲུབ་མཐའི་སྤྱི་དཔལ་ཕན་བདེའི་འབྱུང་གནས་ཆེ།།
གཡུང་དྲུང་བསྟན་འཛིན་ཁྲི་བརྟན་ནོར་རྩེའི་གླིང་།།
དམ་པའི་གསང་གསུམ་འོ་མཚོ་ལས་འོང་པའི་།།
རྨད་འབྱུང་འཕྲིན་ལས་ཉིན་མོར་བྱེད་པ་ཡི།།
གདུལ་བྱ་རྐང་དྲུག་བྱེ་བའི་དགའ་སྟོན་དུ།།
འཆད་རྩོད་རྩོམ་ལྡན་ཁྲི་བརྟན་ནོར་རྩེའི་གླིང་།།
ཐོས་པ་འཆད་ཉན་ཆུ་སྒྲོལ་ལས་བྱུང་པའི།།
བསམ་པ་རྟོགས་དཔྱོད་ནོར་བུའི་གཏེར་ཆེན་དུ།།
སྒོམ་བྱུང་དགོས་རྒུའི་དཔལ་ལ་བརྩེན་པ་ཡི།།
གྲགས་དཀར་དཔྱིད་འཇོ་ཁྲི་བརྟན་ནོར་རྩེའི་གླིང་།།
འཆད་པ་ཐེག་དགུའི་རོལ་མོ་ལས་བྱུང་པའི།།
རྩོད་པ་ལོག་རྟོག་འཇོམས་པའི་གོ་ཆ་ཅན།།
རྩོམ་པ་གཞུང་བརྒྱའི་དཀའ་གནད་འདོམས་པའི་གླུ།།
ལེགས་བྱས་མཆོག་སྤྱོད་ཁྲི་བརྟན་ནོར་རྩེའི་གླིང་།།
སྤང་བ་རྒོལ་བ་ཚར་གཅོད་ཚད་གསུམ་སྒྲོགས།།
བསྒྱུར་བས་རིམ་གཉིས་འཕྲོ་འདུའི་གོ་ཆ་བཙན།།
གྲོལ་ལམ་སྣང་བ་བོན་སྐུ་བདེ་བའི་དབྱིངས།།
ཨེ་མ་གཤེན་སྡེ་ཁྲི་བརྟན་ནོར་རྩེའི་གླིང་།།
སེམས་ལྡན་བླ་མའི་མཛད་འཕྲིན་ལྷུན་ལ་རྫོགས།།
མང་ཐོས་འདུས་སྡེས་བཤད་སྒྲུབ་ཉམས་སུ་བསྟར།།
ལྷ་འབངས་སྡེ་བཞི་ནོར་གྱིས་དྲེགས་པ་རྒྱས།།
ཕན་བདེའི་གྲ་གཅིག་ཁྲི་བརྟན་ནོར་རྩེའི་གླིང་།།
སྲིད་ཞིའི་གཟི་བྱིན་གཅིག་ཏུ་བཟླུམ་པའི་དཔལ།།
བཀོད་ལེགས་འཕགས་ཆེན་བྱེ་བ་རྗེས་ཆགས་ཤིང་།།
བསྟན་བསྲུང་རྒྱ་མཚོའི་ཐུགས་རྩེས་ཟིན་པ་ཡི།།
སྐལ་ལྡན་ངལ་གསོ་ཁྲི་བརྟན་ནོར་རྩེའི་གླིང་།།
ཨེ་མ་རྒྱལ་བ་བླ་མའི་འཕྲིན་ལས་ཀྱི།།
གཤེན་སྡེ་ཆེན་མོའི་ལེགས་བྱས་འཁོར་ལོ་ཆེ།།
དབང་མིག་གྲངས་ཀྱིས་མཚོན་པའི་སྐལ་བཟང་ཆེར།།
བཀྲ་ཤིས་གཏམ་གྱི་དབྱངས་སྙན་རོལ་མོས་བསྟོད།།
དེ་སྟེའི་དགེ་མཚན་འོ་མཚོའི་དཀྱིལ་ཡངས་པོར།།
དྲན་འཛིན་རྒྱན་དུ་སྒེག་པའི་ཉམས་བག་གིས།།
ཚིག་སྦྱོར་སོར་མོའི་སྟབས་ལས་སོན་པ་ནི།།
ཁྱུང་ཡུལ་མཐོང་སྨོན་གླིང་ནས་སྨྱུག་མཛེས་པས།།
༢༠༡༢ *༡༡ *༨ཉིན་རང་ཤག་ཐོས་བསམ་གླིང་ནས།
- ཟིན་ཐོ་གོང་མ།རྣམ་དཔྱོད་འགྲན་པའི་ངར་ཁ།།
- ཟིན་ཐོ་འོག་མ།བོད་དང་བོན།
ངོ་མ་སྙན་རྩོམ་ཐོས་པ་དགའ་བའི་དཔྱིད་གླུ་ཞིག་བླངས་འདུག