5

推荐

   སེམས་ཀྱི་སྡུག་བསྔལ།།

དཀར་དམར་འདུས་པའི་རྣག་ཁྲག་ཁྲོད་དུ།།

རྣམ་ཤེས་མེ་ལོང་རྒྱ་རུ་འཐུམས་ཤིང་།།

རྨུག་འཐིབ་སྡུག་གི་རུ་ཤིང་ཁྲོད་ནས།།

ལམ་ནོར་དུ་མའི་ཁ་བྱང་བྲིས་འདུག།

མ་ལོའི་འགུལ་བསྐྱོད་རྟ་རྒོད་ཞོན་འདྲ།།

གྲང་དྲོའི་བཟའ་གཏུང་ལྕགས་བསྲེག་གངས་ཀླུང་།།

ཨ་མའི་བདེ་སྡུག་བུ་ཡི་ཁྲེས་པོ།།

ཐོག་མའི་འཚོ་བའི་བྲོ་བ་ཁ་འདུག།

འབྱུང་འདུས་ཕུང་པོ་འགྱུ་ལས་དྲངས་ཤིང་།།

འཇམ་པོའི་རེག་བྱ་ཚེར་མར་འགྱུར་ལ།།

ཨ་མའི་ངག་རྟས་སྒྲ་འཛིན་བཤོག་པའི།།

གནས་འདིར་འབྱོར་བ་ངོ་མ་ནོར་འདུག།

འཁྱག་ལྟོག་སྡུག་གི་གོམ་འགྲོས་དང་པོ།།

ཕ་མ་དགའ་བའི་པང་ནས་འདོར་དུས།།

འོད་ཀྱི་མཇལ་སྣང་རིམ་བཞིན་ཡལ་ཏེ།།

འཇིག་རྟེན་རི་མོ་དལ་གྱིས་དོད་སོང་།།

ལུས་ཀྱི་སྟོབས་ཤུགས་རིམ་བཞིན་རྫོགས་དུས།།

སེམས་ཀྱི་ཆགས་སྡང་དེ་བཞིན་འཕེལ་བ།།

སྡུག་གི་ཁུར་པོ་ལག་ཏུ་ལེན་པའི།།

གནས་འདིར་འབྱོར་བ་ངོ་མ་ནོར་འདུག།

ཕུང་པོ་འཕེལ་བའི་རིམ་པ་རེ་རེར།།

འདུ་བཞིའི་དམག་གི་འཐབ་འཁྲུགས་རེ་རེ།།

གཞོན་གྱི་ལང་ཚོ་ནད་ཀྱི་གང་བུ།།

གནས་འདིར་འབྱོར་བ་ངོ་མ་ནོར་འདུག།

གཉེན་འདུན་འཁྲུགས་པའི་རྔམ་ཟིལ་གཅིག་དང་།།

དགྲ་སྡང་འཁྲད་པའི་དོགས་གནས་ཤིག་སྟེ།།

སྡུག་བསྔལ་བཞིའི་རྦ་ཀློང་ནང་ནས།།

གནས་འདིར་འབྱོར་བ་ངོ་མ་ནོར་འདུག།

སུག་བཞི་སྟོབས་ཀྱི་འགན་ཁུར་ཤོར་ཞིང་།།

ཚིགས་ལྷུ་རེ་རེའི་གཡོ་ཁྲལ་འོག་ནས།།

རྒད་པའི་རེ་བ་མཁར་བར་བརྟེན་པའི།།

གནས་འདིར་འབྱོར་བ་ངོ་མ་ནོར་འདུག།

རྒད་པོའི་ལང་ཚོ་མལ་དུ་ལྷུང་ནས།།

དུས་བཞིའ་ཟ་མ་ཁ་ལ་གཉོད་པའི།།

ཉམ་ངའི་རྣམ་ཐར་ཕྱི་རུ་ཐོན་དུས།།

གནས་འདིར་འབྱོར་བ་ངོ་མ་ནོར་འདུག།

བུ་ནོར་འཁོར་གཡོག་རེ་རེར་བྲལ་ཞིང་།།

སྡིག་གི་བྱས་བསགས་དེ་བཞིན་ཤར་དུས།།

མི་ཚེ་དེ་ལ་འཚེར་སྣང་མང་བའི།།

གནས་འདིར་འབྱོར་བ་ངོ་མ་ནོར་འདུག།

དོན་ལྔ་འཇིག་པའི་གོ་རིམ་དག་ན།།

འོད་ལྔ་འཆར་བའི་འཇིགས་བསྐུལ་དུ་མ།།

སྒོ་ལྔའི་དབང་པོར་གོ་བརྡ་སྤྲོད་པའི།།

གནས་འདིར་འབྱོར་བ་ངོ་མ་ནོར་འདུག། 

 འུ་ཐུག་པའི་ནད་པ་ཞིག་མཐོང་རྗེས་སུ། ༢༠༡༢ ༢ ༤ལའོ།།