དྲང་དོན་སྒྲོན་མ་མུན་སེལ་ལས་གཤེན་རབ་ཀྱི་མཛད་པ་མཐར་ཕྱུང་གི་གཟེར་བུ་ཞེས་བྱ་བ་བཞུགས་སོ།

                                            དག་པོ་དྲན་པ་ནམ་མཁའ།

                                   སྟོན་པའི་སྒྲོན་མ་མ་རིག་མུན་པ་སེལ་ལ་ཕྱག་འཚལ་ལོ།

 བོན་གྱི་ཆེ་བ་བརྗོད་པ་གཤེན་རབ་མཛད་པ་མཐར་ཕྱུངས་ཀྱི་གཟེར་བུ་འདི་ལ། དོན་རྣམ་པ་གཉིས་ཏེ། དཀའ་བ་སྣ་ཚོགས་དང་དུ་བླངས་ནས། ཐར་པ་ཐོབ་ཚུལ་བསྟན་པ་དང་། །མཛད་པ་བཅུ་གཉིས་ཀྱིས་སེམས་ཅན་དོན་ཇི་ལྟར་མཐར་ཕྱུངས་ཚུལ་བསྟན་པའོ། །དེ་ལ་དང་པོ་དཀའ་བ་ནི།། སྤྲུལ་པའི་སྐུ་གཤེན་རབ་ཉིད་ཀྱིས། བསྐལ་པ་གོང་མའི་གོང་མ་ནས། སེམས་བསྐྱེད་ཚོགས་བསགས་སྒྲིབ་པ་སྦྱངས་ཏེ། སྐྱེ་བ་ཡང་སྔ་མ་འོག་ཕྱོགས་འཇིག་རྟེན་གྱི་ཁམས་རྩོད་པ་ཅན་ཙ་མུ་ལ་གྲམ། མཁར་ཏ་ཧ་ལ་རྩེ་བརྒྱད། ཕ་རྒྱལ་པོ་ཀ་འོད་ལ་སློད་ཅན། མ་སྦྱིན་ལ་དགའ་བའི་བཞིན་བཟང་མ། ཡབ་ཡུམ་དེ་གཉིས་ལ་སྲས་བཞི་འཁྲུངས་པ། དང་འོག་ཤེས་རབ་ལྡན་ཞེས་བྱ་བ་དེས། དུས་ཀྱི་ཐ་མ་ལ་གཡུང་དྲུང་གི་བོན་བཀའ་རིན་པོ་ཆེ་ཤིན་ཏུ་བསྲུང་དཀའ་བས། བྲག་དཀར་རི་ལ་ཤེལ་གྱི་ཕུག་ཏུ་དགོངས་པ་ཐང་བཅད་ནས་བསྒོམས། དུས་དེ་རུ་དུས་ཀྱི་ཐ་མ་ལ། དྲག་རྩུབ་ཀྱི་བསྐལ་པ་མུ་གེ་ཉིང་ཤ་ཉིང་གིས་ཟ་བ་བྱུང་སྟེ། རྒྱལ་སྲིད་བཤིགས་ནས་སེམས་ཅན་རྣམས་ལ་སྦྱིན་པ་བཏང་། འབུམ་སྡེ་མང་པོའི་སྲོག་ཀྱང་ཐོན་པར་བྱས། སྦྱིན་པ་བླངས་ནས་མི་རྣམས་གྱེས་གར་སྡོམ་པ་ཕོགས། དེས་ན་ཡང་སྦྱིན་པའི་མཐའ་ནི་མཐའ་ཕྱིན་ཆགས་མེད་ཡིན་ཞེས་བྱས་ཏེ། ལུས་ལ་ཤ་བརྣགས་ཁྲག་ཕྱུངས་སྤྲང་པོ་གཟའ་དགུ་གསོས། རུས་པ་དཀར་ལ་ཐུག་ནས་སྐྱེ་བ་བརྗེས། མི་བཅད་འཇིག་རྟེན་ཡེ་སངས་བར་ལྷར་སྐྱེས། སྐྱེ་བ་འདིའི་གོང་མ་ལ་སྲིད་པ་ཡེ་སང་གི་ཡུལ་ན་མཆིས་ཙམ་ན། ཡབ་ནི་ཁྲི་འོད་ཡུམ་ནི་ཀུན་ཤེས་ཡབ་ཡུམ་དེ་གཉིས་ལ་སྲས་གསུམ་འཁྲུངས་པའི་བར་པ། ཁྱེའུ་གསལ་བ་ཞེས་བྱ་སྟེ། གཏོ་འབུམ་ཁྲི་ཀློག་གི་ལྕེ་ཅན་ལ་སྲིད་པ་སྟོང་རྩིས་ཀྱི་བོན་ཉན། ཡེ་ཤེས་ཀྱི་ལྷ་གཤེན་ལྷ་འོད་དཀར་ལ་འགྲོ་བ་འདྲེན་པའི་བོན་ལུང་མནོས། ཚད་མེད་པ་བཞིའི་ཐུགས་རྗེས་འགྲོ་བ་སེམས་ཅན་གྱི་དོན་བྱས་སོ། གཉིས་པ་མཛད་པ་ནི་སྦྱི་རུ་དྲུག་ཅུར་བཤད་ཀྱང་། ད་རེས་འདིར་བཅུ་གཉིས་སུ་བསྟན་ཏེ། སྐྱེ་བཞེས་བསྟན་སྤེལ་འགྲོ་གཉིས་བཏུལ། ཁབ་བཞེས་སྲས་སྤྲུལ་འགྲོ་དོན་མཛད། བདུད་རྣམས་བཏུལ་ནས་བསྟན་པ་བཞག །ཁྱིམ་སྤང་འཁོར་སྤངས་འདས་་ཚུལ་བསྟན་ཞེས་གསུང་པས། དེ་ཡང་དང་པོ་བཞེས་པ་ནི། སྤྱིར་འཇིག་རྟེན་གྱི་ཁམས་རྒྱ་ཆེ་ཞིང་གྲངས་མང་ན་ཡང་། ནུབ་ཕྱོགས་འཇིག་རྟེན་གྱི་ཁམས། ཆུ་བོ་བཞི་འདུས་ཀྱི་འགོ་བོ། གངས་བཟང་པོ་མདུང་རྩེ་འདྲ་བའི་རྭ་བ། རི་གཡུང་དྲུང་དགུ་བརྩེགས་ཀྱི་རྩ་བ། བྲག་སེང་གེ་རྒྱབ་བསྣོལ་གྱི་བར། ས་པད་མ་འདབ་བརྒྱད་ཀྱི་སྟེང་། གནམ་འཁོར་ལོ་རྩིབསས་བརྒྱད་ཀྱི་འོག ཤིང་གཞའ་ཚོན་འོད་འབར་གྱི་གསེབ། རྩ་མེ་ཏོག་སྣ་ཚོགས་ཀྱི་གནས། གསོས་བདུད་རྩི་སྨན་གྱི་ནགས་ཚལ། གནས་རིན་པོ་ཆེའི་མཁར། ཡུལ་འོལ་མོ་ལུང་རིང་། མཁར་བར་པོ་སོ་བརྒྱད། གསས་མཁར་ཤམ་པོ་ལྷ་རྩེ། ཡུལ་དེ་ན་རྗེའུ་རིགས་དང་། རྒྱལ་རིགས་དང་། རྨངས་རིགས་དང་། བྲམ་ཟེའི་རིགས་དང་། ཀུན་གནས་ཀྱང་མཁར་དེའི་རྩེ་རྗེ་ནི། རུས་ནི་དམུའོ། རིགས་ནི་རྒྱལ་རིགས་སོ། ཡབ་ནི་མི་བོན་ལྷ་བོན་རྒྱལ་བོན་ཐོད་དཀར། ཡུམ་ནི་མི་ཕྱི་ལྷ་ཕྱི་ཡོ་ཕྱི་རྒྱལ་བཞད་གཉིས་ཀྱི་སྲས་སུ་འཁྲུངས་སོ། །དེ་ཡང་དོན་དུ་གཤེན་རབ་ཉིད་ལ་སྐྱེ་བ་མི་མངའ་ཡང་། འགྲོ་བའི་དོན་དུ་དེ་ལྟར་བསྟན། ཡབ་ཡུམ་ལ་སོགས་ཏེ་དེར་ཚོགས་པ་ཐམས་ཅད་ཡིད་སྤྲོ་ལ་སེམས་དགའ་སྟེ། རྒྱལ་བུ་དེ་མ་མ་དགུ་ཕྲག་གིས་ཁྲུས་དང་གཙང་སྦྲ་དང་། རྒྱན་དང་ཚངས་པར་བྱས། བྲམ་ཟེ་གསལ་ཁྱབ་འོད་ལྡན་གྱིས་མཚན་བརྟགས་པས་ཀྱང་མཚན་བཟང་སྟེ། རིན་པོ་ཆེའི་མི་ལ་འོད་ཟེར་ཕྱོགས་བཅུར་འཕྲོ་བ། ཡིག་འབྲུ་སུམ་བརྒྱ་དྲུག་ཅུས་སྐུ་ལ་བརྒྱན་པ། ཐུགས་ལ་ཉི་ཟླ་ཕྲུག་གཅིག་ཤར་བ། མཚན་བཟང་པོ་སུམ་ཅུ་རྩ་གཉིས། དཔེ་བྱད་བཟང་པོ་བརྒྱད་ཅུས་བརྒྱན་པ། མིང་དང་མཚན་ཡང་སྟོན་པ་གཤེན་རབ་མི་བོར་བཏགས་སོ། །དེ་ཡང་ལོའི་དང་པོ་བྱི་བ། ཟླ་བའི་དང་པོ་དཔྱིད་ཟླ་ར་བ། ཞག་གི་དང་པོ་ཚེས་བཅོ་ལྔ་། སྐར་མའི་དང་པོ་རྒྱལ་གྱི་རུ་གོང་། དུས་ཚོད་ཀྱི་དང་པོ་ནམ་ལངས་པ་ལ་སྐྱེ་བ་བཞེས་པ་སྟེ། འཁོར་རྣམ་པ་གསུམ་དང་སྤྲུལ་པ་རྣམ་པ་གཉིས་སྤྲུལ་ཏེ། སྔར་འདས་པའི་བསྟན་པ་བརྗེས། ཡབ་ཡུམ་ལས་སོགས་པ་འཁོར་དུ་འཁོད་པ་ཐམས་ཅད་སངས་རྒྱས་པར་མཛད་པའོ།།

གཉིས་པ་བསྟན་པ་སྤེལ་བ་ནི། དབང་པོ་རབ་འབྲིང་ཐ་མའི་སློབ་བུ་འབུམ་ཕྲག་མཐའ་ཡས་པ་ལ། བོན་གྱི་སྒོ་མོ་རྒྱས་པར་དཀྲོལ་ཏེ། དང་པོ་ས་ལ་གནས་པའི་གཡུང་དྲུང་སེམས་དཔའ་རྣམས་ལ། མན་ངག་ལུང་གི་བོན་བསྟན་ནས། ཤམ་པོ་ལྷ་རྩེ་བདག་ཏུ་བསྐོས་ནས། འགྲོ་དོན་རྒྱས་པར་མཛད་དོ། །གཉིས་པ་བར་སྣང་ཁམས་ཀྱི་སྲིད་གཤེན། ཡར་གཡེན་བར་གཡེན་ས་གཡེན་ལས་སོགས་པ་ལ། སྲིད་པ་དང་པོའི་ལོ་རྒྱུས་ཀྱི་བོན་བསྟན་ནས། འགྲོ་དོན་རྒྱས་པར་མཛད་དོ། །དཔལ་གྱི་ལྷ་ཚངས་པ་དང་བརྒྱ་བྱིན་དང་། གཡུང་དྲུང་གི་ལྷ་ཆེན་མོ་ཆེ་བཞི་དང་། སྲིད་པའི་རྒྱལ་པོ་ཆེན་པོ་བཞི་དང་། རྫུ་འཕྲུལ་གྱི་ལྷ་ལྷེའུ་རྗེ་མཆེད་བདུན་དང་། །རོལ་མཚོ་དག་གི་ཀླུ་ལས་སོགས་པ་ལ་ནག་པོ་སྔགས་ཀྱི་བསྟན་ནས། ལྷ་རྩེ་གོང་རྣམ་བདག་ཏུ་བསྐོས་ཏེ། བར་ཆོད་བྱེད་པའི་བདུད་བཏུལ་ལོ། །གསུམ་པ་འབྱུང་བའི་གཤེན་ཆེན་པོ་བཞི་ལ་འོད་ཟེར་འཕྲོས་པའི་བོན་ཞེས་བྱ་སྟེ། བོན་གྱི་སྒོ་མོ་བརྒྱད་ཁྲི་བཞི་སྟོང་དང་། རྒྱས་པར་འབུམ་གྱི་དོན་བསྟན་ནས། གྲོང་ཁྱེར་ལང་ལིང་གི་བདག་ཏུ་བསྐོས་ཏེ། འཁོར་བའི་སེམས་ཅན་མང་པོ་ལ། རྒྱས་པ་འབུམ་གྱི་དོན་བསྟན་ནས་བསྟན་པ་སྤེལ་ལོ། །འགྲོ་བ་འདྲེན་ནོ་ཁ་ལོ་བསྒྱུར་རོ། །དེ་ལྟར་གཤེན་རབ་ཀྱི་ཞབས་ཀྱིས་བཅགས་ཤིང་ཞལ་མཐོང་པས། རྒྱལ་པོ་ས་ལ་ལས་སོགས་གྲོང་ཁྱེར་ལང་ལིང་གི་སེམས་ཅན་ཐམས་ཅད་སངས་རྒྱས་སོ། །དེ་ཡང་རྒྱལ་པོ་ས་ལ་ལ་ཞེ་ས་འབུལ་་བ་དང་། མཚོ་མུ་ལེ་སྟོང་ལྡན་ཧད་ཀྱི་འགྲམ་དུ་སྐུ་ཁྲུས་ལ་བྱོན་ནས། ཉ་དང་དབུས་ཐ་གསུམ་ལ་ལྷ་ཀླུ་མི་གསུམ་གྱིས་སྐུ་ཁྲུས་གསོལ་ལོ། །ལྷ་ཀླུ་མི་གསུམ་གྱི་སློབ་བུ་མང་པོ་ལ་པེའུ་རྩེ་རྣམ་པ་གསུམ་གྱི་བོན་བསྟན། འགྲོ་བ་རིགས་དྲུག་གི་སེམས་ཅན་ལ་རང་རང་མཐུན་པའི་བོན་བསྟན་ནས། སྡུག་བསྔལ་ཞི་བར་མཛད། དེ་ནས་ཡུལ་འོལ་མོ་ལུང་རིང་དུ་བྱོན་ནས། གཡུང་དྲུང་བོན་གྱི་བསྟན་པ་ལ་བསྙེན་པ་བྱེ་མའི་ལ་ཙམ་ལ། པེའུ་རྩེ་རྣམ་པ་གསུམ་གྱི་བོན་བསྟན་ནས། བསྟན་པ་དར་ཞིང་ཤིན་ཏུ་རྒྱས་པར་མཛད་དོ། །གསུམ་པ་གཏོ་བུ་དོད་དེ་བཏུལ་བ་ནི། བྱང་ཕྱོགས་འཇིག་རྟེན་གྱི་ཁམས་ན་ཡུལ་འོ་མ་འབྱམས་སྐྱ། ་མཁར་དངས་པ་རྫོངས་ཕུག ཕ་གཏོ་ཁྲི་རྗེ་ཐང་པོ། མ་དཔྱད་ཟ་གུང་བཙུན་ཁྲི་མ། གཏོ་དཔྱད་དེ་གཉིས་ཀྱི་བུ། གཏོ་ངུ་དོད་དེ་ཞེས་བྱ་བ། རིགས་རྗེ་རིགས་ཡིན་ཡང་། མཚམས་མེད་པ་ལྔའི་ལས་བྱས་པ་དེ། ཐབས་དང་ཤེས་རབ་ཟུང་དུ་འབྲེལ་ནས་བཏུལ་ཏེ། ཐུགས་ནི་ཞི་བའི་ངང་ལས་མ་གཡོས་ཀྱང་། སྐུ་ཁྲོ་བོའི་ཆ་ལུགས་སུ་སྤྲུལ་ནས་བཏུལ་བས། མངོན་པའི་ང་རྒྱལ་དང་མཐོང་བའི་སྡིག་པ་སྤངས་པ་ཙམ་ལས་མ་ཐུལ་བར་མཛད་དེ། མཚམས་མེད་པ་ལྔའི་ལས་བྱས་པས། ཤི་ནས་དམྱལ་ཁམས་བཅོ་བརྒྱད་ཀྱི་སྣང་བ་ཤར་ནས། དེ་དག་ཐམས་ཅད་ཞི་བ་ར་མཛད་ནས། ཞག་བདུན་བདུན་ནས་ཡང་འགྲོ་བར་མཛད་ནས། དེ་དག་ཀྱང་རྒྱུན་བཅད། སྡིག་ཅན་གཏོ་བུ་ལས་སོགས་ཡུལ་འོད་མ་འབྱམས་སྐྱར་འདུས་པ་ཐམས་ཅད་སངས་རྒྱས་པར་མཛད་པའོ། །བཞི་པ་འགུ་ལིང་མ་ཏི་ཐར་པར་དྲངས་པ་ནི། ཤར་ཕྱོགས་འཇིག་རྟེན་གྱི་ཁམས་ན། ཡུལ་ཧོས་མོ་གླིང་དྲུག མཁར་འབར་བ་རྩེ་དགུ །གྲོང་ཁྱེར་བདལ་ཁྱབ་ཀུན་འཕྲོ། མཚོ་གཡུང་དྲུང་མིག་དགུ །དེ་ན་རྩྭ་སྣ་ཚོགས་འཁྲུངས་ཤིང་། སེམས་ཅན་སྣ་ཚོགས་གནས་ཏེ། ཡུལ་དེའི་རྩེ་རྗེ་ནི། རྒྱལ་པོ་ཧོས་ཀྱི་རིགས། ཧོས་དངས་བ་ཡིད་རིང་ཞེས་བྱ་བ་དེས། གསོན་གྱི་ངོས་སྤྱོད་ལས་སོགས་པ་ཀུན་དང་ལྡན་ཡང་། སྐྱེ་ཤི་དང་འདུ་འབྲལ་ལ་གནས་པས། མཐོ་རིས་སུ་འདྲེན་པ་དང་། ཐར་ལམ་སྟོན་པའི་སློབ་དཔོན་མ་མཆིས་པས། སྟོན་པ་གཤེན་རབ་མཆོད་གནས་སུ་སྤྱན་དྲངས་ནས། འབྱུང་བའི་གཤེན་ཆེན་པོ་ལྔ་ལ་བོན་སྒོ་བཞི་མཛོད་དང་ལྔ་འཆད་པའི་ཐུན་བཅད་དུ་མི་རུང་བས། སྲིད་པ་སངས་པོ་འབུམ་ཁྲིའི་སྤྲུལ་པ་ཡིད་ཀྱི་ཁྱེའུ་ཆུང་བཏང་ནས། རྒྱལ་པོའི་གཡུང་དྲུང་གཙུག་གཤེན་རྒྱལ་བ་ཞེས་མིང་མཚན་དུ་བཏགས་ཏེ། ཤེལ་གྱི་བྲག་འཕྲ་སྐས་པད་མ་ཅན་གྱི་ཕུག་ཏུ་དགོངས་པ་མཛད་པས་གནས་ཁྱད་པར་ཅན་དེ་ན་བདུད་དང་། སྲིན་པོ་གཤིན་རྗེ་གནོད་སྦྱིན་དང་། ལོ་སྐོར་རྒྱུན་སྐར་གཉན་ཁམས་དང་། སྲིད་སྐོས་ཕྱྭ་དང་ལྷ་ཀླུ་ཐམས་ཅད། སྲོད་གུང་ཐོ་རངས་ཞལ་ལྟ་མཆོད་པ་འབུལ། སེམས་ཅན་ཀུན་གྱི་སྡུན་བསུ་གསོ་ཟས་དྲངས། སྨོན་ལམ་བཏབ་ནས་ལོ་་གསུམ་དུ་མཆོད་གནས་སུ་བཞུགས། དེ་ལྟར་བསྟན་པ་དར་ཞིང་ཤིན་ཏུ་རྒྱས་པ་ལ། བཙུན་མོས་ལྟོ་བསྐུར་བཏབ་པས་བཀའ་ཆད་མཛེ་ཡིས་བཏབ། སྟོན་པ་གཤེན་རབ་དང་སློབ་དཔོན་གཉིས་སྤྱན་དྲང་ནས། དྲང་པོས་འགྱོད་ཚངས་མཐོལ་བཤགས་བྱས་པས་ནད་ངན་སོས། བསྟན་པ་རྒྱས་ཤིང་དྲིན་ལན་ཧོས་ཟ་རྒྱལ་མེད་ཁབ་ཏུ་ཕུལ། རྒྱལ་པོ་ཡབ་ཡུམ་སྲས་འཁོར་སེམས་ཅན་ཀུན། ལྷ་མོ་སུམ་བརྒྱའི་ཞལ་མཐོང་ཞིང་ཚེ་སྔ་ཕྱི་ད་ལྟ་གསུམ་གྱི་སྒྲིབ་པ་བྱང་ནས་སངས་རྒྱས་པར་མཛད་དོ།།

ལྔ་པ་ཁབ་བཞེས་པ་ནི། སེམས་ཅན་རྣམས་དང་མཐུན་པར་བྱ་བ་དང་།  རབས་ཆད་དང་མ་ནིང་བྱ་བའི་ངག་བཅག་པའི་ཕྱིར། ཡུལ་ཧོས་མོ་གླུང་དྲུག་ནས། ཧོས་དྭངས་བ་ཡིད་རིང་གི་བུ་མོ་ཧོས་ཟ་རྒྱལ་མེད་ཁབ་ཏུ་བཞེས་ཏེ། ཡུལ་འོལ་མོ་ལུང་རིང་གི་མི་རྣམས་ཀྱིས་གཡང་ཆ་སྣ་ཚོགས་ཀྱིས་མདུན་བསུས་ནས། དེ་ནས་བྲམ་ཟེའི་རིགས་དང་། རྗེའུ་རིགས་དང་། རྨང་གི་ཁྱེའུ་གཙང་མ་དང་། བུ་མོ་གཙང་མ་ཐམས་ཅད་ཀྱིས། དར་དཀར་གྱི་གཡབ་མོ་དང་། སྤོས་དང་མཚལ་གྱི་དུ་བ་དང་། སྐུ་ཁྲུས་གཙང་ཚན་གྱིས་ས་སྐས་གཅིག་དང་གཉིས་དང་གསུམ་གྱི་ཁ་ནས་བསུའོ། །དེ་ནས་བྲམ་ཟེའི་བུ་འགྱུར་བ་བློ་གསལ་གྱིས། ཕྱིའི་ཡུལ་བཞི་དང་ནང་གི་རྣམ་ཤེས་ཚོགས་བརྒྱད་ལ་བཟང་ངན་གྱི་མཚན་བརྟགས། སྲིད་པའི་སྣ་བོན་པོས་བླན། བདུད་མཆོད། སྲི་མནན། བྱུར་ཕྱུང་། འདྲེ་བཀར། དཔལ་སྐྱབས། གཞན་ཡང་ལྷ་དང་ཕྱྭ་དང་དམུ་དང་ཡེ་གཤེན་གཡུང་དྲུང་སེམས་དཔའ་རྣམས་ཀྱིས་སྨོན་ལམ་རྒྱས་པར་བཏབས། དམུ་ཐག་དམུས་བཏགས། ཞལ་དྲོ་ཀླུས་བྱིན། ཕྱྭ་གཡང་ཕྱྭས་བླན། སྤྱི་བདུད་ལྷས་བོར། སྨོན་ལམ་ཡོས་བཏབས། དེ་ལྟར་སྟང་དང་དབྱལ་དུ་འཚོགས་སོ། སེམས་ཅན་གནས་ལ་ཆགས་ཤིང་ཁྱིམ་ལ་དགའ་བ་རྣམས་ལ་བསྒྲལ་བ་དང་།་ སྲུན་དབྱུང་བའི་ཕྱིར་མཛད་པའོ།།

དྲུག་པ་སྲས་སྤྲུལ་པ་ནི། ཕྱིའི་ཡུལ་བཟང་ནང་གི་སེམས་དགེ་བའི། ཧོས་ཟ་རྒྱལ་མེད་བག་དང་ལྡན་པ་ལ། སྟོན་པ་གཤེན་རབ་ཐུགས་རྗེས་སྤྲུལ་པ་དང་། ལྷ་དང་ཕྱྭ་དང་དམུའི་སྨོན་ལམ་དང་། སེམས་ཅན་སྤྱི་མཐུན་ལས་ཀྱི་བསོད་ནམས་ཀྱིས། ཕྱི་དེ་ལོའི་དུས་སུ་སྐུ་ལ་སྲས་ཤིག་འཁྲུངས། འཁྲུངས་པ་དེའི་དུས་དེར་ཀུན་ཀྱང་སྤྲོ་བ་སྐྱེས། གནམ་གྱི་ལྷ་དང་ས་ཡི་ཀླུ་ཡང་འདུས། ལྷ་ཚངས་པས་བདུད་རྩིས་ཁྲུས་བྱས། བརྒྱ་བྱིན་གྱིས་ཡིད་བཞིན་གྱི་ནོར་བུ་རིན་པོ་ཆེས་དབང་བསྐུར། ཀླུ་འཇོག་པོས་ཨུ་དུ་འབར་བའི་མེ་ཏོག་གིས་ལྟེ་བ་བྱས། ཀླུ་དགའ་བོས་དགའ་ལྡན་ཚངས་བུར་བཅུག ཀླུ་མལ་དྲོས་ཀྱིས་སྨོན་ལམ་གྱི་ཉག་ཐག་གི་ཚངས་ཐག་བྱས། ཕྱྭའི་རྒྱལ་པོས་ཕྱྭ་གཡང་བླན། དམུའི་རྒྱལ་པོས་དམུ་ཐག་བཏགས། གཙུག་ཕུད་ཅན་གྱི་གཤེན་གྱིས་འགྱུར་མེད་ཀྱི་གཙུག་ཕུད་བཅས། ལྷ་དབང་བརྒྱ་བྱིན་གྱིས་གཤེན་ཚེ་རིང་གི་ལན་ཕྲན་སླས། དེ་ཡང་ལྷ་སྲིན་སྡེ་བརྒྱད་ལ་བཀའ་བཙན་པ། སྐྱེ་འགྲོ་སེམས་ཅན་གྱི་དོན་ནུས་པ། ཡབ་དང་མཐུན་པར་རིན་པོ་ཆེ་དཀར་གྱིས་དྲིལ་བ་འདྲ་བ། ཕྱི་དཀར་ལ་འཇམ་པ། ནང་བཀྲ་ལ་གསལ་བ། ནང་གི་སེམས་བརྟགས་པས།  གཏོ་འབུམ་སྡེ་ཐུགས་ལ་གསལ་གྱིན། སྨྲ་རྒྱུད་བདུད་རྩི་སྤེལ་ནུས་པ་ཞིག་བྱུང་སྟེ། ཐབས་དང་ཤེས་རབ་ལས་སྤྲུལ་པའི་སྲས་ཡིན་པས། དགུང་ལོ་གཅིག་ནས་ཤེས་རབ་ཀྱི་ཚད་དུ་ཕྱིན། གཉིས་ནས་སྙིང་རྗེའི་སེམས་དང་ལྡན། གསུམ་ནས་ཡབ་ལ་ཐེ་ཚོམ་ཕེར་རོ། །ཡབ་ཀྱིས་བསྟན་པ་་ཙམ་གྱིས་སྲས་ཀྱིས་རྟོགས་ཏེ། མ་ནོར་ངེས་པར་སྟོན་པ། མི་འབྱེད་མཉམ་པར་སྙོམས་པ། བོན་ལ་འབུམ་སྡེ་མཁྱེན་པ། འཁོར་བའི་སྡུག་བསྔལ་སངས་ནུས་པ་ཞིག་བྱུང་སྟེ། འཁོར་ལ་ངོ་མཚར་ཆེ་ཞིང་ཤེས་རབ་གསལ་བ་བྲམ་ཟེའི་བུས། མཚན་ཡང་གཏོ་བུ་འབུམ་སངས་སུ་བཏགས་སོ། །བོན་སྒོ་མཐའ་དག་མ་རྨོངས་ཡབ་བཞིན་མཁྱེན། དེ་ནས་ཡང་ཕྱི་དེའི་ལོ་དུས་སུ་སྐུ་ལས་སྲས་ཤིག་འཁྲུངས། ལྷ་ཀླུ་ཕྱྭ་དང་དམུ་ལས་སོགས་པ་ཀུན་གྱིས་གོང་བཞིན་རིམ་གྲོ་བཀུར་བསྟི་བྱས། དེ་ཡང་ལྷ་སྲིན་ལ་བཀའ་བཙན། སྐྱེ་འགྲོའི་དོན་ནུས། ཕྱིའི་ཡུལ་ཡབ་དང་མཚུངས་པ། དཔྱད་ལ་ཁྲི་སྡེ་གསལ་བ། དཔྱད་རྒྱུད་བདུད་རྩི་སྦྱོར་ནུས་པ་ཞིག དེ་ཡང་གོང་དང་མཚུངས་པར། དགུང་ལོ་གཅིག་ནས་ཤེས་རབ་ཚད་དུ་ཕྱིན། གཉིས་ནས་སྙིང་རྗེའི་སེམས་དང་ལྡན། གསུམ་ནས་ཡབ་ལ་ཐེ་ཚོམ་ཕེར་རོ། །ཡབ་ཀྱིས་བསྟན་པ་ཙམ་གྱིས་སྲས་ཀྱིས་རྟོགས་ཏེ། དེ་ཡང་རིག་པའི་དཔྱད་ལམ་རྣོ་བ། སེམས་ཅན་ཡོངས་ལ་བྱམས་པ་དཔྱད་ལ་ཁྲི་སྡེ་མཁྱེན་པ། མ་ནོར་དོན་རྣམ་ཤེས་པ་ཞིག་བྱུང་སྟེ། བྲམ་ཟེའུ་བུས་དཔྱད་བུ་་ཁྲི་ཤེས་སུ་བཏགས་སོ། དཔྱད་རྒྱུད་མཐད་དག་མ་རྨོངས་ཡབ་བཞིན་མཁྱེན། བགེགས་ལ་གཏོས་ཕན་པ་དང་། ནད་ལ་དཔྱད་ཀྱིས་ཕན་པ་དང་། མ་རིག་པ་གསལ་བའི་ཕྱིར་མཛད་པའོ།།

བདུན་པ་རྒྱས་པ་སྤྱི་དྲངས་པ་ནི།  ཡུལ་ཁྲི་ཐང་འབྱམས་པ་དང་། མཁར་ཤོད་མ་བརྩེགས་པ་དང་། གྲོང་ཁྱེར་ལྷུན་གྲུབ་འདུས་པ། ཡུལ་དེའི་རྩེ་རྗེ་ནི་རྒྱལ་པོ་དཔོའིརིགས། །དཔོ་འབར་བའི་སྒྲོན་མ་ཅན་ཞེས་བྱ་བའི་མངའ་རིས་ཏེ། ཤིན་ཏུ་ཡུལ་བཀྲ་ཤིས་པ། མཁར་ཤིན་ཏུ་ཉམས་དགའ་བ། གྲོང་ཁྱེར་དེ་ན་འདོད་པ་ཀུན་ཚང་བ། ཐམས་ཅད་ཀུན་ལས་བཟང་བ། དད་པ་ཆེ་བ། སྡིག་པ་མི་བྱེད་པ་དགེ་བ་དང་དུ་ལེན་པ་ཞིག་ཡིན་པ་ལ། ཡུལ་དེའི་ནུབ་ཕྱོགས་ཀྱི་གླིང་ན། རྒྱན་ཕྲན་ཁྲི་འོད་ཅེས་བྱ་བ་ཞིག་ལ། རྒྱལ་བུ་ཁྲི་ཤང་བྱ་བ་ཞིག་འཁྲུངས། དེ་ཤི་བའི་ནད་ཀྱིས་བཏབས་པ་ལ། མོ་བོན་ཐོ་ཅོ་མཁན་གཉིས་ཀྱིས། ཟ་འདོད་པའི་དབང་གིས། མ་མཐོང་པར་མཐོང་བྱས་པ་དང་། མི་ཤེས་པ་ཤེས་བྱས་པས། ཕན་དུ་རེ་ནས་མི་སྙིང་བཏོན་པའི་སྡིག་པ་དང་། སྤྱོད་པ་ངན་པ་བྱས་པས། དེའི་ལེ་ལན་སྐྱེ་མཆེད་ཀྱི་ཤི་བསད་ལྕེབས་དགུ་བྱུང་སྟེ། དེ་རྣམས་ལས་དང་བསམ་པ་བཟང་ངན་གྱིས། ངན་སོང་གསུམ་གྱི་སྣང་བ་ཤར་ནས། གནས་མཐོ་དམན་དུ་སྐྱིད་སྡུག་ཏུ་སྐྱེས་ནས་སྦྱོངས་པ་ལ། རྒྱལ་པོ་འབར་བའི་སྒྲོན་མ་ཅན་གྱིས། གཤེན་རབ་སྤྱན་དྲངས་ནས། སྡིག་བཤགས་སྟོན་པའི་སྐུ་ལ་བྱས་པས། སྟོནཔ་གཤེན་རབ་ཀྱིས་སེམས་ཅན་སྡིག་ཅན་དྲངས་པའི་ཕྱིར། ནམ་མཁའ་ལ་ལྷའི་སྐུ་ཕྱག་རྒྱ་ཆེན་པོར་སྤྲུལ་ནས། འགྲོ་བ་འདྲེན་པའི་འོད་ཟེར་གྱི་སྤྲོ་བསྡུ་སྣ་ཚོགས་མཛད་དོ། །འཁོར་ཡིད་ཀྱི་ཁྱེའུ་ཆུང་ལས་སོགས་ཀྱིས། བདེར་གཤེགས་སྟོང་གི་མཚན་བརྗོད་ནས། ཡར་མཆོད་པ་ཕུལ་མར་སྦྱིན་པ་བཏང་། ཞལ་ནས་སྨོན་ལམ་སྔགས་བརྗོད་པས། རྒྱལ་པོ་དམག་མི་སུམ་སྟོང་ཤི་བསད་ལྕེབ་དགུ་ཕྱོགས་བཅུའི་སེམས་ཅན་ཐམས་ཅད་སངས་རྒྱས་སོ། །སླད་མ་རྒྱལ་བུ་ལྕམ་དྲལ་གཉིས་མ་རྒྱས་ལུས་ཏེ། དྲལ་པོས་ཡུལ་དུ་རྒྱལ་སྲིད་བཟུང་ནས་དགེ་བ་སྤྱོད། ལྕམ་མོ་ལས་ཀྱི་ཤུགས་ཀྱིས་ཁབ་ཏུ་བཞེས། སྟོན་པ་གཤེན་རབ་འཁོར་རྣམས་འགྲོ་དོན་མཐར་ཕྱིན་འོལ་མོ་ལུང་རིང་དུ་བྱོན། ཀུན་གྱི་མདུན་བསུས་སྔར་བཞིན་ཕྱྭ་གཡང་བླན། བྲམ་ཟེས་དཔོ་ཟ་ཐང་མོར་མཚན་བཏགས་ཀུན་གཞི་ལ། སྐྱོན་གྱི་རྣམ་པ་དུམ་འགའ་ལུས། སླད་མའི་མཚན་རྟགས་བཟང་བར་བཅད། སྐྱོན་དང་ཡེ་ཤེས་ནུས་མཐུས་མཛད། སྔོན་གྱི་སྨོན་ལམ་མེ་ཏོག་མཐུས། བུ་མོ་གཤེན་ཟ་ནེའུ་ཆུང་འཁྲུངས། དེ་ཡང་མཚན་བརྟགས་ཡུམ་བཞིན་བཅད། དེ་ལྟར་འགྲོ་དོན་རྒྱ་ལགས་ཕྱེད་པར་མཛད་པའོ།།

བརྒྱད་པ་བདུད་བཏུལ་བ་ནི། གཟུགས་ཁམས་ལྷ་རིགས་ཀྱི་མ་ཐ། ཚངས་རིགས་ཀྱི་ཐད་ཀའི་བྱང་ཕྱོགས་སུ། དཔག་ཚད་བརྒྱ་དང་བརྒྱད་ཀྱི་ཐད་ཀ་ན། མུན་པ་གཡུང་དྲུང་ཟེར་ལྡན་གྱི་རྒྱལ་ཁམས། མུན་པ་སྨན་ནག་འཁོར་ལོའི་ནང་ན། སྔོན་གྱི་དམོད་པའི་དབང་གིས་བདུད་རྒྱ་ལགས་ཐོད་རྗེའི་བུ། བདུད་ཁྱབ་པ་ལག་རིང་ཞེས་བྱ་ཞེས་བྱ་བ་དེ། སྟོན་པ་གཤེན་རབ་མི་བོས། ཁོའི་ཞིང་ཁམས་སྟོང་དུ་འཇུག་པར་མཐོང་ནས། ཉོན་མོངས་པའི་དབང་གིས་ཤིན་ཏུ་མི་དགའ་བའི་སེམས་སྐྱེས་ནས། བདུད་ཀྱི་གཡོག་འཁོར་བསམ་དུ་མེད་པ་བསྡུས་ནས་ངུས་པས། འཇིག་རྟེན་གྱི་ཁམས་ཐམས་ཅད་གཡོས་པ་དང་འདར་བ་དང་། འགུལ་བ་དང་། མེར་བ་དང་། རླུང་དམར་དང་། ཁ་བ་དང་། སེར་བ་དང་། མི་ནད་དང་། ཕྱུགས་ནད་དང་། མི་དགེ་བ་སྣ་ཚོགས་བྱུང་ནས། སེམས་ཅན་ཐམས་ཅད་འཇིགས་ཤིང་སྐྲག་པ་ལས། སྟོན་པས་ཞལ་ནས་དགེ་བ་ཡོད་ན་སྡིག་པ་ཡོད། དཀར་པོ་ཡོད་ན་ནག་པོ་ཡོད། ཉི་མ་ཡོད་ན་མུན་པ་ཡོད། སྟོན་པ་ཡོད་ན་དོས་འཛུག་ཡོད། དེ་ལ་འཇིགས་ཤིང་མ་སྐྲག་པར། དགེ་བའི་ལས་རྣམས་རྒྱུན་དུ་སྲོངས་གསུངས་ཏེ། བར་ཅད་བཟློག་པའི་སྔགས་དང་ངན་སོང་དོང་སྤྲུགས་བཟླས། ཡས་སྟག་བཤམས་པ་ཕྱོགས་བཞིར་གཏོར་བས། བདུད་ཡུལ་འདོད་པ་ལྔས་གང་ཞིང་འཇིག་རྟེན་ཁམས་ལན་གཅིག་ཞི་བ་དང་། བདེ་བར་གྱུར་ཏོ། །དེ་ནས་ཡང་གཤེན་རབ་ལ་བདུད་ཀྱི་ཆོ་འཕྲུལ་སྣ་དགུ་བསྟན་ཏེ། ལྷ་དང་སློབ་དཔོན་ཕ་དང་མ། སྐྱེས་ཕྲན་ན་ཆུང་སྤུན་དང་བུ་ལས་སོགས་པ་ཞི་བས་བསླུས་པས། གཤེན་རབ་རྣམ་པ་ཐམས་ཅད་མཁྱེན་པ་ཡིས། བདུད་ཀྱིས་བསླུས་པར་རིགས་ནས། སུན་ཕྱུང་ཐབས་ཀྱི་བཏུལ་བས། རྣམ་སྨིན་རང་རྒྱལ་ཁ་རལ་འཚངས་ལ་ཕྱོགས། སྣ་དགུའི་ཐ་མ་དྲག་པོས་བདུད་ཀྱིས་དམག་དྲངས་གཤེན་ལ་མདའ་མཚོན་ཆར་དུ་ཕབས་ཏེ། གཤེན་རབ་ཀྱིས་བདུད་ཁམས་དབང་དུ་བསྡུས་པའི་སྤྲུལ་པ་མཛད་པས། བདུད་ལ་འཇིགས་པའི་སེམས་ཅན་རྣམས། མི་འཇིགས་པའི་སེམས་དང་ལྡན། བདུད་རྗེ་ཁྱབ་པས་དབང་དུ་མ་འདུས། མུན་པས་གཡོགས་སུ་མ་གཡོགས། མཚོན་གྱིས་སོད་དུ་མ་སོད་། མུན་པས་གཏིབས་ཤིང་མཚོན་ཆར་ཕབས་པ་ཐམས་ཅད། ཐུགས་རྗེས་ཉི་ཟེར་དང་མེ་ཏོག་པད་མའི་ཆར་དུ་སོང་ངོ་། །དེ་ནས་ཡང་བདུད་ཀྱི་འཁོར་ལ་ཆོ་འཕྲུལ་བསྟན་ཏེ། བདུད་ཀྱི་མ་སྲིང་མང་པོ་འདུས་ནས། མས་བུ་ལ་གདམས་ངག་བསྟན་ཏེ། ཡུལ་མཁར་དང་ཆུང་མ་དང་བུ་མོ་ལས་སོགས་ལ་ཆོ་འཕྲུལ་བསྟན་པས། སྟོན་པའི་བྱིན་རླབས་ཀྱིས་དགེ་བའི་ཕྱོགས་སུ་ཐང་ཆོད་པས། གཞན་མ་རྣམས་ལ་མ་ཚུགས་གཤེན་ཟ་ནེའུ་ཆུང་མེ་ཏོག་གི་གླིང་ནས་བདུད་ཕྱིར་འབྲེང་བས་འ་ཞས་གཤེན་རབས་ཕྱྭའི་སྐུ་འཚོ་རུ་གཤེགས་པ་སྤྱན་དྲངས་ནས་འཁོར་གཡུང་དྲུང་སེམས་དཔའ་ལྔ་སྟོང་ལྔ་དང་བྱོན་ཏེ་གཤེན་ཟ་ནེའུ་ཆུང་བདུད་ལས་བཀུགས། ནུ་མ་བཅད་ནས་བུ་ལ་སྦྱིན་པར་གཏང་ནས་སྨོན་ལམ་བཏབས་པ། ལམ་དུ་སྡུག་བསྔལ་སྲིད་གནས་བསྟན། དེའི་ཡུལ་ནས་འ་ཞས་དྲངས། འགྱོད་བཤགས་མཆོད་པ་རྣམ་ལྔ་ཕུལ། བདུད་ཀྱི་བུ་གཉིས་བརྐུས་ནས་ཐར་པའི་ལམ་ལ་གཅུག་གོ། །དེ་ནས་བདུད་ཀྱིས་ནོར་ལ་ཆོ་འཕྲུལ་བསྟན་ཏེ། བདུད་ཕྲུག་ཤོར་བ་སྐྱ་བདུན་གྱིས། གཤེན་གྱི་རྟ་བདུན་བརྐུས་ནས་ཀོང་པོ་ཡུལ་དུ་ཁྱེར་ཏེ། སྟོན་པ་གཤེན་རབ་ནི་སྣང་སྲིད་མེ་ལོང་གཡའ་དག་པ་བཞིན་དུ་གསལ་བས། བོད་སྲིན་པོའི་རིགས་དབང་དུ་བསྡུ་བ་དང་། བདུད་དྲེགས་པ་ཅན་འཁོར་དུ་བསྡུ་བར་དགོངས་ནས་རྟའི་རྗེས་སུ་བྱོན་པ་ལ། བདུད་རྣམས་ཀྱིས་སྤྲུལ་པ་སྣ་ཚོགས་བསྟན་ཏེ། རི་ལུང་མེས་བཀང་བ་དང་། ཆུའི་རྒྱ་མཚོ་བསྐྱིལ་བ་དང་། རླུང་གི་རྒྱ་མཚོ་དང་། སའི་ཁ་བ་དང། བདུད་རི་ནག་པོས་ལམ་བཀག་པ་དང་། ཐམས་ཅད་ཐུགས་རྗེ་ཆེན་པོས་ཞི་བར་མཛད། དེ་ནས་ཡང་རྟའི་རྗེས་སུ་བྱོན་པ་ལ། བདུད་རྣམས་ཀྱིས་དམག་དྲངས། ཤག་འགྲན། མཚོན་གྱིས་ཆར་ཕབས། དུག་བླུད། ཆོ་ངེས་དང་ངུས་མོ་བཏབ་པས། གཤེན་རབ་ཐུགས་རྗེ་ཆེ་ལ་ཐབས་ལ་མཁས་པས། བདུད་ཀྱི་དམག་རེ་རེ་ལ་ནམ་མཁའི་ཁམས་ནས་ལྷའི་དམག་བརྒྱ་བརྒྱ་སྤྲུལ། རྩལ་གྱིས་ཚད་བཞག མཚོན་དང་དུག་རྣམས་མེ་ཏོག་ཏུ་བསྒྱུར། ངུས་མོ་འཕར་པོ་འཕར་ཆུང་དུང་གིས་རྒྱུད་བཅད། བདུད་ཀྱི་དམག་བཅོམས། གཤེན་གྱི་ཚོགས་བསྐྱེད། ཁྱབ་པའི་ཡབ་རྒན་ཡུམ་རྒན་དང་། ཀོང་རྗེ་དཀར་པོ་ལས་སོགས་དད་པ་ལྷང་གིས་སྐྱེས། གནོང་འགྱོད་འཚལ་ཞིང་རྟ་བདུན་ཆལ་དང་བཅས་ནས་ཕུལ་བས་དམ་པའི་གནས་སུ་སངས་རྒྱས་སོ། ཁྱབ་པ་བུ་འདོད་བསླུ་བ་བྱེད་པ་མ་རྒྱས་ལུས། དེ་ནས་ཡང་བདུད་ཁྱབ་པས། བུ་སྨད་དང་། རིན་པོ་ཆེའི་གཏེར་དང་། པད་མའི་སྡོང་པོ་དང་། སྨན་དང་འབྲུའི་ཚལ་ལ་ཆོ་འཕྲུལ་བསྟན་པ་ཐམས་ཅད་ཞི་བར་མཛད། དབྱེན་དང་འཕྲ་མའི་གཏོ་སྒྲམ་ཞུགས་ལ་བསྲེགས་པ་ལ་ཡང་། བདུད་ཀྱི་ལན་ཆགས་ཁེར་ནས། སྟོན་པའི་ཐུགས་རྗེས་སྨོན་ལམ་གྱིས། དུད་པ་མེ་ལྕེ་འདག་མ་ལས། གནམ་བོན་བར་བོན་ས་བོན་འབུམ་ཕྲག་མཐའ་ཡས་པ་བྱུང་ནས་སེམས་ཅན་གྱི་དོན་བྱེད་དོ། ཤེས་རབ་བློ་དང་ལྡན་པའི་བློ་གསལ་གྱིས། ཀོང་ཟའི་མཚན་བརྟགས་ཡོངས་སུ་སྨོན་ལམ་བཏབས། ཁྲི་ལྕམ་ཁབ་ཏུ་བཞེས་ནས་གསལ་བའི་མདོག་ཅན་འཁྲུངས། གཏོ་བུ་དཔྱད་བུ་བཞིན་དུ་ཀུན་གྱིས་རིམ་འགྲོ་བཀུར་བསྟི་བྱས། ཡི་གེའི་ས་བོན་དཔའ་བོ་འབྲུ་ལྔ་ལས། ཆོ་འཕྲུལ་གྱིས་ཡི་གེ་སུམ་བརྒྱ་དྲུག་ཅུ་རྩ་བརྒྱད་གྱེས་ནས་བསྟན་པ་དར་ཞིང་རྒྱས་པར་མཛད་དོ།།

དགུ་པ་བསྟན་རྗེས་བཞག་ནི། ཡུལ་རྒྱ་ལག་འོད་མ་གླིང་། མཁར་ཁྲི་སྒོ་རྩེ་བརྒྱ། གླིང་གྲོང་ཁྱེར་འཕྲུལ་བསྒྱུར་བཀོད་པའི་ཚོགས། ཕ་རྒྱལ་ཁོ་ཀ་དྷ་ལ་གསེར་གྱི་མདོག་ཅན། བཙུན་མོ་མུ་ཁྲི་ལ་གསལ་འོད་མ་ཞེས་བྱ་སྟེ། དཀར་པོ་མིར་གྱུར་པ་ལས་ཆེ། དུས་དེར་རྒྱལ་པོ་གསལ་མཆོག་དམ་པ་ཚེ་འཕོས་ནས། ཡབ་ཡུམ་དེ་གཉིས་ཀྱི་སྲས་སུ་འཁྲུངས་སོ། །ལྟས་མཁན་ཐམས་ཅད་ཀྱིས་མཚན་བལྟས་པས་དེ་ཤིན་ཏུ་བཟང་སྟེ། རྒྱ་ཀོང་ཙེ་འཕྲུལ་གྱི་རྒྱལ་པོར་བཏགས་སོ། རྒྱལ་བུ་དེ་དགུང་ལོ་ངོ་དགུ་ལོན་ནས། དཔྱིད་ཟླ་ར་བའི་ཉ་ལ་བདེ་བར་གཤེགས་པ་གཙོ་བོ་བཞི་ལ་ཕྱག་འཚལ་སྨོན་ལམ་བཏབས་པས། ཉི་ཤུ་ལྔའི་དུས་སུ་བསམ་པ་ཁྲིག་གིས་གྲུབ་བོ། །འགྲུབ་པའི་རྟིང་ལ་འཆི་རྒྱགས་ཀྱི་གསས་ཁང་ཆེན་པོ་ཞིག་མུ་ཁྱུད་བདལ་པའི་མཚོ་ལ་བརྩིག་པར་དགོངས་ནས། །མས་མཁར་ལས་བྱས་རུང་མཚོ་ནང་དུ་འཆི་བས། །ཡུལ་མུ་ཧ་ལ་མུན་པའི་གླིང་དུ་སྲིན་པོ་བསྒྲུབས་པས། སྲིན་གྱི་རྒྱལ་པོ་གྲུབ་ནས་མནའ་བསྐྱལ་ཆད་བགོས། སྲིན་བརྒྱ་བཏུལ་ནས་རྩིགས་བགོས་ཞག་བཅོ་ལྔ་ལོན་ནས་མཚོ་ཁ་རུ་གཞི་མ་གྲུབ་ནས་ཐོན། དེ་བར་ཡབ་ཡུམ་བློ་བསྲོས་གསང་ཚིག་མ་ཐུབ་པས། བཙུན་མོས་དགེ་སྡོང་བྱས་པས་སྱིན་བརྒྱ་བྲོས་ནས་མེད། མཛོ་དྲེའུ་སླར་ལོག་སྲིན་པོས་ཐོལ་ལེ་བཏབ་ནས་བྲོས། དེར་རྒྱ་ཀོང་ཙེ་འཕྲུལ་གྱི་རྒྱལ་པོ་དེ། དགེ་བ་ལམ་དུ་ལུས་པས་ཡབ་ཡུམ་བུ་སྨད་ལ་ཡིད་ཆད་ནས་འཁྱམས་ཏེ། རྒྱའི་ཤིང་རྟ་ལ་ཞོན་ནས། འཁོར་མང་པོ་དང་ཁ་བྱང་ཤར་དུ་བལྟས་ཏེ། རྒྱལ་པོ་བཞིའི་རུ་མཚམས་སུ་སླེབས་པས་དགེ་བ་ལ་སེམས་མ་འགྱུར་བ་དང། སྔོན་གྱི་སྨོན་ལམ་གྱིས་ཕྱྭ་ཀེང་ཙེ་ལན་མེད་དང་འཕྲད་དེ། དང་པོ་དྲི་རྨེད་བྱས། དེ་ནས་ཐེ་ཚོམ་བཙུགས། ཐ་མར་གཡུང་དྲུང་སེམས་དཔར་ཤེས་ནས། འགྱོད་བཤགས་གུས་པ་བཏུད་པས། ཕྱྭ་ཡིས་དགེ་བའི་སྡོང་མཛད། སྐོང་མཁན་ཕྱྭས་བྱས་པས། ལྷ་ཀླུ་མི་ལས་སོགས་པས་དགེ་བ་ལ་ཕྱོགས་པ་ཙམ་ཚོགས་ནས་ཟླ་བ་གཅིག་ནས་གསས་ཁང་རྟེན་དང་བཅས་པ་མཐར་ཕྱིན། མཚན་ཡང་དཀར་ནག་བཀྲ་གསལ་རྒྱ་མཚོའི་གླིང་ཐོག་འབར་དུ་བཏགས། དེ་ནས་ལྷ་སྲིད་བདུད་ལས་སོགས་པས་གསས་ཁང་ལ་བར་ཆོད་བྱེད་པ་ཐམས་ཅད་གཤེན་རབ་་འཁོར་གཡུང་དྲུང་སེམས་དཔའ་ལྔ་སྟོང་ལྔ་བརྒྱ་དང་ཆས་ནས་བདུད་སྲིན་སྤྲུལ་པ་ཞི་བར་མཛད་ནས། སྐུའི་བསྟན་པ་བཞགས། དེ་ནས་ཡང་གཤེན་ལོ་ཉི་ཤུ་རྩ་ལྔ་མི་ལོ་གཉིས་སྟོང་ལྔ་བརྒྱ་ན་བོན་སྒོ་བཞི་མཛོད་དང་ལྔ་ཕྱེས་ནས་གསུང་གི་བསྟན་པ་བཞག་པས་ཅུང་ཙམ་དབྱེ་ཤགས་ཞེན་ནས། སྲིད་པ་སངས་པོ་འབུམ་ཁྲི་དང་ཆས་ནས་བོན་སྒོ་བཞི་མཛོད་དང་ལྔར་རྒྱས་པར་དཀྲོལ་ཏེ། ཐབས་དང་ཤེས་རབ་ཟུང་འབྲེལ་ནས་དང་པོ་མཚམས་བཅད། ཡིག་མཁན་དང་ཡོན་བདག་ལ་དབང་བསྐུར། སྨོན་ལམ་བཏབ་ནས་ཡེ་གེའི་དབུ་བཙུགས། གླེགས་བམ་དཀར་ལ་ཡི་གེ་ནག་ཏུ་བྲིས་ནས་བསྟན་པའི་རྗེས་སུ་བཞགས། དེ་ནས་ཡང་སྟོ་པ་གཤེན་རབ་ཀྱི་བསྟན་པ་རྗེས་སུ་བཞགས་པ་ལ། མངའ་དབུལ་ཞལ་བསྲོ་སྤྱན་དབྱེ་རྒྱས་པར་མཛད་དེ། ཕྲིན་ལས་བཅོ་བརྒྱད་གོ་རིམ་མ་ནོར་བར། གསུང་རབ་འབུམ་སྡེ་བོན་གྱི་སྐུ་དང་སྦྱར། སྐུ་གདུང་མཆོད་རྟེན་རྫོགས་པའི་སྐུ་དང་སྦྱར། སྐུ་གཟུགས་སྤྱན་ཅན་སྤྲུལ་པའི་སྐུ་དང་སྦྱར། རྣམ་པ་ཐམས་ཅད་མཁྱེན་པའི་གཤེན་རབ་ཀྱིས། སེམས་ཅད་དཀྲིད་དྲང་གི་དོན་དང་དཔེ་དང་ཐབས་བསྟན་པའི་ཕྱིར་མཛད་པའོ།།

བཅུ་པ་ཁྱིམ་སྤངས་རབ་ཏུ་བྱུང་བ་ནི། སྟོན་པ་གཤེན་རབ་མི་བོས་མི་ལོ་སུམ་སྟོང་གཅིག་བརྒྱ། གཤེན་ལོ་སུམ་ཅུ་སོ་གཅིག་ན་ཕྲིན་ལས་དམ་པ་དོན་དུ་བཞེས་ནས། ཁྱིམ་པ་ལས་རབ་ཏུ་བྱུང་ནས་སེམས་ཅན་བློའི་རང་བཞིན་ཐ་དད་པས་དགའ་དང་མི་དགའ་སོ་སོ་མང་པོ་བྱུང་། འདུས་པའི་འཁོར་རྣམས་སྡེ་རིགས་གཉིས་སུ་ཆད། སྟོན་པའི་འཁོར་ཡིད་ཀྱི་ཁྱེའུ་ཆུང་ལས་སོགས་པའི་སྦྱངས་པའི་འཕྲོ་ཅན་རྣམས་དད་པ་སྐྱེས་ནས་ཤིན་ཏུ་དགའ་འོ། བུད་མེད་ཞེན་པ་རགས་པས་ཁབ་རྣམས་ངུས་སྒྲ་འབྱིན། བདུད་རྗེ་ཁྱབ་པ་ལས་སོགས་དགའ་དད་སྐྱེས་ནས་ལྟ་ཉན་བྱེད། དོན་ཆེད་དེས་ཕྱི་ནས་ཀྱང་གཞན་དག་དྲེགས་པའི་བདུད་བཅོམས་ནས། བདག་ཉིད་ཕུང་པོ་གཞོམ་པར་དགོངས། ཉི་མ་ཤར་བའི་ཟེར་ཁ་ལ། སྤྲིན་ལྟར་གཏིབས་པའི་འཁོར་ནང་དུ། འཁོར་བའི་རྒྱུན་ཐག་བཅད་པའི་ཕྱིར། སྟོན་པས་ཁྱིམས་སྤང་རབ་ཏུ་བྱུང་། དང་ལ་ཕྱི་ཡི་རྒྱན་བཅོམས་ཏེ། རྒྱན་དང་ན་བཟའ་དབུ་སྐྲ་ལས་སོགས་པ་བཞར་ནས་སྦྱིན་པར་བཏང་། བླང་པའི་རྫས་བླངས་ཁྲུས་དང་གཙང་སྦྲའི་སྒོར་ཞུགས། འཁོར་དང་རྒྱལ་སྲིད་ཕྱིར་ལ་བོར་ནས་མེ་ཏོག་གླིང་ལ་དཀའ་ཐུབ་མཛད་དུ་གཤེགས། གཤེན་བུ་ཀོང་ཚ་ལས་སོགས་མ་དད་པའི་འཁོར་རྣམས་ཀྱིས། དད་པའི་འཁོར་རྣམས་ཁྱིམས་སྤངས་བྱ་དབང་མེད་པར་ནན་གྱིས་མནན་ནས་ཁྲིམས་སྒོར་བཅུག སྟོན་པར་ཀུན་གྱིས་འཇུས་ནས་མི་གཤེགས་པར་ཞུ་བ་བྱས་པས་མ་གནང་། དེ་ནས་མཁར་གྱི་རྩེ་ལ་བཞུགས་པར་ཞུས་སྟེ། ཉི་རྒས་དགོངས་ཀྱི་དྲོ་ལ་བབ་ནས་གསེར་ཕོར་དངུལ་ཕོར་དུ་གསོལ་ཟས་སྣ་ཚོགས་དྲང་པས་གསོལ་དུ་མ་བཞེད་པར་ཡུལ་མཁར་ཡོ་བྱད་བཙུན་མོ་སྲས་དང་སློབ་འབངས་ཐམས་ཅད་སྤངས་ནས་གཅིག་པུར་པད་ཤུན་གདིང་བ་གཏིང་ནས་བཀད་སའི་ཐང་ལ་གཟིམས། ནང་པར་སྐར་ཆེན་ཤར་ནས་བདེ་གཤེགས་སྟོང་མཚན་གཏོན། ནམ་ལངས་ཤམ་པོ་ལྷ་རྩེ་བསྐོར་ནས་ལྷ་གཤེན་མཚན་བརྒྱ་བཏོན། ཉི་ཤར་ཁྲུས་དང་གཙང་སྦྲ་བྱས་ནས་སྙིང་པོ་རྣམ་གསུམ་བརྗོད། དེ་ནས་གསོལ་ཟས་ལ་སྤང་བླང་མཛད་ནས། དཀར་ཟས་རྣམ་གསུམ་བླངས་ནས། ཤ་སྒོག་ཆང་ལས་སོགས་པ་གཏན་དུ་མ་གནང་ངོ་། དེ་ནས་ངོ་མཚར་རྨད་དུ་བྱུང་བའི་རྨད་གོས་ལས་སོགས་སྐུ་ལ་གསོལ་ནས། སྐུ་ལུས་ཕྲུག་ཕྲུག་སྤྲུགས་པས་མི་ལས་གཤོག་སྐྱེས་མཁའ་ལྡིང་ཤང་ཤང་དུ་གྱུར་ཏེ། ལོག་འཁོར་སྡེས་མ་ཐུབ་པར་བར་སྣང་སྟོང་པར་འཕུལ་ཏེ་སོང་ངོ་། །དེ་ནས་སུམ་ཅུ་རྩ་གསུམ་དུ་བབས་ཏེ་བྱའི་དཀའ་ཐུབ་ལོ་གཅིག་མཛད། རྩ་གསུམ་ལྷ་ལ་བོན་འཁོར་བསྐོར། དེ་ནས་རྒྱལ་ཆེན་རིགས་བཞིའི་གནས་སུ་སྤྲེའུའི་དཀའ་ཐུབ་ལོ་གཅིག་མཛད། རྒྱལ་ཆེན་བཞི་ལ་བོན་འཁོར་བསྐོར། དེ་ནས་འོལ་མོ་ལུང་རིང་ཟད་མཚམས་མེ་ཏོག་གི་གླིང་ལ་ཉིན་མོ་བྱའི་ཆ་བྱད། ནུབ་མོ་མིའི་ཆ་བྱད་དུ་བཞུགས་ནས་མིའི་དཀའ་ཐུབ་ལོ་གཅིག་མཛད། བདུད་རྗེ་ཁྱབ་པ་ལས་སོགས་དད་པ་སྐྱེས་ནས་དྲེགས་པའི་བདུད་ལ་བོན་འཁོར་བསྐོར། དཀའ་ཐུབ་ལོ་གསུམ་མཛད་ནས་མི་ཡེངས་དོན་ལ་འཕྲེང་བའི་ཕྲེང་བ་བགྲངས་བས་ཉོན་མོངས་རྒྱུ་འབྲས་གཉིས་ཀྱི་གདར་ཐག་ཆོད། དེ་ནས་འཁོར་ཐམས་ཅད་ཀྱང་སྡེ་རིགས་གཉིས་སུ་མེད་པར་ཡིད་ཀྱི་ཁྱེའུ་ཆུང་གིས་སྣ་དྲངས་ནས། བདུད་ལས་སོགས་པ་ཀུན་གྱིས་མཆོད་པ་རྒྱས་པར་ཕུལ་ནས་བཤགས་པ་བྱས་པས། སྟོན་པས་འཁོར་འདུས་པ་དེ་རྣམས་ལ་གོ་འབྱེད་བཀྲིད་དྲང་གི་བོན་བསྟན་ཞིང་མ་ནོར་མཆོག་ལ་སེམས་བསྐྱེད། དེ་ནས་བོན་གྱི་འཁོར་ལོ་ཚིག་བཞི་གསུངས་པས། ཐམས་ཅད་དད་པ་སྐྱེས་ནས་རབ་ཏུ་བྱུང་བ་ཁས་བླངས། འཁོར་ལ་སྤྱི་སྡེ་གཉིས་ལ་དགོས་སྡེ་བཞི་རུ་ཕྱེ། ཡིད་ཀྱི་ཁྱེའུ་ཆུང་གིས་མཁན་པོ་བྱས། སྟོན་པས་སློབ་དཔོན་མཛད་ནས་སྡོམ་པ་ཕོག ཕོ་གྲལ་གཡས་དང་མོ་གྲལ་གཡོན་དུ་ཕྱེས། རྒྱན་དང་ན་བཟའ་ལས་སོགས་གོང་བཞིན་སྦྱིན་པར་བཏང་། ཁྲུས་བྱས་རྨད་གོས་ལས་སོགས་རྫས་རྣམས་བླངས། རྩ་བ་བཞི་ལས་གྱེས་པའི་ཕོ་ཁྲིམས་གཉིས་བརྒྱ་ལྔ་བཅུ། མོ་ཁྲིམས་སུམ་བརྒྱ་དྲུག་ཅུ། དགེ་བསྙེན་གཏན་ཁྲིམས་སྣ་ལྔ། བསྙེན་གནས་ཡན་ལག་བརྒྱད་པ་ལས་སོགས་སྟེ་རྒྱས་པར་དཀྲོལ། ཕོ་མོ་ཕྱེ་ནས་གནས་རིགས་སོ་སོར་བཟུང་། བར་དུ་སེང་གེའི་ཁྲི་བརྩིགས། གཤེན་རབ་ཀྱིས་བོན་གྱི་འཁོར་ལོ་བསྐོར་ནས་ཤེས་རབ་ཚད་དུ་ཕྱིན། འཁོར་བའི་སྒོ་བཅད་ཐར་པའི་དོན་མཚོན་པའི་ཕྱིར་མཛད་པའོ།།

བཅུ་གཅིག་པ་འཁོར་སྤངས་དགོན་པ་མཛད་པ་ནི། འགྲོ་དྲུག་ཐུགས་རྗེས་བཟུང་བའི་ཕྱིར། ཅི་ཡང་སྤྲུལ་ནས་ཐུགས་རྗེས་བཟུང་། ད་འཁོར་སྤངས་དགོན་པ་མཛད་པ་ཡང་། སེམས་ཅན་བློ་རབ་ཡོད་པ་རྣམས། ཐར་པར་མྱུར་དུ་སྒོ་དབྱེའི་ཕྱིར། དམ་པས་འཁོར་ཁྱེད་སྤངས་ནས་གཅིག་པུར་དགོན་པར་འགྲོ་གསུངས་ནས། སྟོན་པ་ཡང་རི་གཡུང་དྲུང་དགུ་བརྩེགས་ཀྱི་ནགས་ཚལ་མིས་མི་རྙེད་པའི་ནང་དུ། འཁོར་སྤངས་ནས་དགོན་པ་ལ་གཤེགས་སོ། །དེའི་དུས་སུ་གཏོ་བུ་ལས་སོགས་ཕོ་རིགས་དང་། གཤེན་ཟ་ལས་སོགས་མོ་རིགས་ཀྱིས། རིག་པས་རྩལ་ཤུགས་མཐོ་བའི་འཁོར་རྣམས་བསྡུས་ནས། ནགས་ཚལ་དགོན་པའི་ནང་དུ་གཞན་དང་མཚམས་བཅད་དེ། སྟོན་པའི་སྐུ་ཕྱིར་སྤྲིན་བཞིན་འདུས་ནས། འཁོར་གྱི་ནང་ནས་བཙུན་པ་ཁྱབ་པས་མི་ཐོགས་སྐྱེ་བ་གཅིག་གིས་ཐར་པ་ཐོབ་པའི་གདམས་ངག་ཞུས་པས། བློ་རབ་དོན་དུ་དགོན་པའི་གནས་ནས། ཀུན་གཞི་དང་རྣམ་ཤེས་རྩད་གཅོད་བྱུང་ཚོར་སྒོ་འགེགས། སྤྲོ་བསྡུ་བཟང་ངན། སྤངས་བླང་དཔེ་དང་བཅས་ནས་བསྟན་པས། གཏོ་བུ་ལས་སོགས་པའི་སྐྱེས་པ་ལྷའི་ཀུན་གཞིའི་དཀྱིལ་དུ་མི་འཆོར་གཟེར་དུ་ཐེབས། གཤེན་ཟ་ལས་སོགས་སྐྱེ་བ་དམན་པ་རྣམས་ལ་ལྟ་སྤྱོད་ཟུང་དུ་འབྲེལ་བར་བསྟན་ཏེ། ས་རིམ་པ་དགུ་ལས་ཉོན་མོངས་པའི་སྒྲིབ་པ་སྦྱངས་ནས། གནམ་རིམ་པ་བཅུ་གསུམ་ལ་ཤེས་བྱའི་སྒྲིབ་པ་སྦྱངས། དཔེ་ནི་གསལ་བའི་ཉི་ཟླ་གཉིས་ལ་བླངས། སྐྱེས་པ་ལྷའི་རིགས་ལ་ཉི་མ་ཤར་བ་བཞིན་དུ་ངེས་དོན་གཅིག་ཆར་བསྟན་པས། ཤེས་རབ་བློ་རྩལ་རྫོགས། བུད་མེད་སྤྲིན་གྱི་བག་ལ་ཟླ་བ་ཚེས་པ་བཞིན་དུ་མས་ཡར་འཇུག་སྒོ་རིམ་པས་བསྟན། དེ་ནས་ཡང་བློ་དམན་པ་རྣམས་ལ་མདོ་རུ་བསྡུས་ནས། ཚིག་འགའི་གདམས་ངག་བསྟན་ཏེ། དང་པོ་འཛིན་དང་ལོ་རྒྱུས་དང་། བར་དུ་རྟོགས་པའི་རྒྱུ་དང་། ཐ་མར་རྟོགས་པའི་འབྲས་བུ་ལས་སོགས་པ་གསུངས་སོ། །དེ་ཡང་ཡུལ་གྱི་འདོད་པ་བཅོམས་ནས། ངེས་དོན་གསལ་བཏབས་ཏེ། སྐྱེ་བ་གཅིག་གིས་བླ་མེད་འབྲས་བུ་བསྒྲུབ་པའི་ཕྱིར་མཛད་པའོ།།

བཅུ་གཉིས་པ་མི་རྟག་མྱ་ངན་ལས་འདས་པ་ནི། དོན་དུ་གཤེན་རབ་ཉིད་འགྲོངས་པར་མི་མངའ་ཡང་། མི་རྟག་རྟག་ཏུ་རེ་བ་སུན་དབྱུང་བ་དང་། སེར་སྣ་ཅན་སྦྱིན་པ་གཏོང་བ་དང་། ལེ་ལོ་ཅན་བརྩོན་འགྲུས་འབྱུང་བའི་ཕྱིར་དུ། མྱ་ངན་ལས་འདའ་ཚུལ་བསྟན་ཏེ། སྟོན་པའི་ཞལ་ནས་སྒྱུ་མའི་ལུས་བླངས་ན་ཚའི་རྒྱུ། ཕུང་པོ་ལུས་ཀྱི་རྣམ་ཤེས་སེམས་བསྡོམས་པས། སྐྱེ་དང་རྒས་ཀྱི་སྡུག་བསྔལ་རིམ་པས་འབྱུང་། ད་ལྟ་ན་བའི་སྡུག་བསྡལ་མཚོ་དང་འགྲོགས། སྡུག་བསྔལ་ནད་ཀྱིས་གདུངས་པ་འཆི་བའི་རྟགས། མི་རྟག་བཞི་བསྡུས་བདག་གི་ཕུང་པོ་ལ། འཇིག་པའི་གཉེན་པོ་འདུ་བའི་ནད་དར་བས། རིན་ཆེན་སྲོག་ལ་བབ་ལ་གཏུགས་ཏེ་ན། ཞེས་གསུངས་པས། འཁོར་དང་མཐའ་ཡས་སེམས་ཅན་ཐམས་ཅད་སྐྲག་པར་གྱུར་ཏོ། །དགོན་པའི་གནས་ནས་འཁོར་ལོས་སྐུ་བཏེགས་ནས། ཁྲི་སྨོན་རྒྱལ་བཞེད་ཀྱི་ཡང་ཕུགས་སུ་ན་ནམ་གདན་ལ་བཞུགས་སུ་གསོལ་ནས། གཏོ་བུ་དཔྱད་བུས་གཏོ་དང་དཔྱད་མཛད་པས། བྱིན་གྱིས་རླབས་ཀྱིས་དགུང་གསུམ་བདེ་བར་གྱུར། དེ་ནས་བསྙུང་བ་ཕྱིར་ཐུ་ནས། ཀུན་གྱིས་མྱ་ངན་གྱི་ངུ་སྒྲ་ཕྱུང་བས། སྟོན་པས་དགེ་སྤྱོད་ལས་སོགས་གདམས་པ་བསྟན། དེ་ནས་ཁྱབ་པ་ཁྱུང་དུ་སྤྲུལ་ནས་བདུད་རྣམས་ལ་འཇིགས་སྒོ་བསྟན། ཡིད་ཀྱི་ཁྱེའུ་ཆུང་དང་རྨ་ལོ་ལས་སོགས་པས་མྱ་ངན་ལས་མི་འདའ་བའི་གསོལ་བ་བཏབ་པས། འདའ་ཁའི་ཞལ་ཆེམས་སུ་གསུངས་པས། ཀུན་གྱི་མྱ་ངན་བདའ་འོ། དེའི་དུས་སུ་དག་པ་དྲོང་སྲོང་གི་སྡེ་རྣམས་ཀྱིས་གཟའ་སྐར་ལྟ། ཡིད་ཀྱི་ཁྱེའུ་ཆུང་གིས་དབུ་ནས་བཏེགས། ལྷ་གཤེན་གྱི་མཚན་རྣམས་བརྗོད། གཏོ་བུས་ཐུགས་ཁའི་དྲོད་མྱང་ནས་བདེར་གཤེགས་བསྐྱེད་པའི་སྙིང་པོ་བཟླས། རྨ་ལོ་གཡུ་ལོས་ཞབས་གཡས་གཡོན་ནས་འཇུས་ནས་ངན་སོང་དོང་སྤྲུག་སྙིང་པོ་བཟླས། དཔྱད་བུས་རྣམ་པར་ཤེས་པས་རྩ་རྒྱུ་ནུས་མི་ནུས་བལྟས། དེ་ལ་སྟོན་པས་སྐུ་བཞེངས་མི་སྐྱོད་ཀྱང་། འཁོར་མྱ་ངན་སྨྲེ་ངག་འདོན་ཞིང་བྲང་ལག་འཐབ་པ་ལ། འདའ་དགའ་འཆི་དྲོད་ཀྱི་གདམས་ངག་ཞལ་ཆེམས་བསྟན། བསྐྱེད་རིམ་རྣམ་གསུམ་མཛད་ནས་སྨོན་ལམ་ཡོངས་སུ་བཏབ། སྲོད་ལ་ཁྲི་སྨོན་རྒྱལ་བཞད་གནས་སུ་བདུད་དམག་དུང་ཕྱུར་བཏུལ། ཐོ་རེངས་རི་གཡུང་དྲུང་དགུ་བརྩེགས་ཀྱི་རྩེ་མོ་ལ་མངོན་པར་རྫོགས་པ་སངས་རྒྱས་སོ། །དགུན་ཟླ་ར་བའི་གནམ་སྟོང་ལ། སྟོན་པ་གཤེན་རབ་མྱ་ངན་འདས། གྲོངས་པའི་པུར་ལ་བཀུར་སྟི་རིམ་གྲོ་བྱེད་པ་ལ། འཁོར་རྣམས་ཐ་དད་ཁ་དུམ་ནས། ཐུགས་དང་འདྲ་བའི་འ་ཞ་ལ་ཐུག་པར་བཅད་ནས། བཙུན་པ་ཁྱབ་པས་སྤྱན་དྲངས། མ་གྲོངས་གསོན་གྱི་ཚུལ་དུ་ཞལ་མཇལ་ནས་མཆོད་པ་རྒྱ་ཆེར་ཕུལ་ནས་ངུ་མོ་བཏབ། སྟོན་པ་གཤེན་རབ་ཡབ་གྲོངས་ནས། སྐྱེ་འགྲོ་སེམས་ཅན་གདུང་བ་སྐྱེས། ནམ་མཁའི་སྤྲིན་ཚོགས་བཞིན་དུ་ཕུང་། པུར་ལ་བརྟོད་ན་ཐ་དད་འདོད། ཕན་བཏགས་ཆོ་གའི་རིམ་པ་དང་། ཕྱི་རབས་རྣམས་ལ་དཔེར་བསྟན་པའི་ཐབས་དང་སྐབས་ནི་མ་རྙེད་དོ། དེའི་དུས་སུ་འཁོར་སྡེ་བཞི་ཡ་བརྒྱད་གྲོས་བྱས་ནས། སྔོན་འགྲོ་པུར་དང་པུར་ཁང་ཆས་སུ་བཅུགས། ཀུན་ལ་སྙོམས་པར་བྱ་བའི་ཕྱིར་པུར་ཞུགས་ལ་བཞེན་པའི་ས་བཙལ་མཆོད་པ་སྣ་ཚོགས་རྒྱས་པར་ཕུལ་ནས་དགོངས་པ་མེའི་ཏིང་འཛིན་ལ་བཞུགས ཆོ་ག་འཕྲིན་ལས་བཅོ་བརྒྱད་གཞུང་དང་བསྟུན་ནས་ཐུག་གར་རུས་པས་བཅའ་གཞི་མཛད། གདུང་རྟགས་ལྷ་ཀླུ་མི་གསུམ་གྱིས་བགོས་ནས་དབུའི་མཆོད་གནས་སུ་སྤྱན་དྲངས་སོ། །ས་ས་སོ་སོར་ཡི་གནས་ནས་བོན་གྱི་འཁོར་ལོ་བསྐོར་ཞིང་མཆོད་པ་རྒྱུན་དུ་ཕུལ། སྟོན་པའི་སྐུ་འཁོར་ཐམས་ཅད་ཀྱང་། སྔོན་ནས་དགེ་བ་སྤྱོད་ཅིང་སྟོན་པའི་ཞལ་མཐོང་གསུང་ཐོས། སྒོས་འཕྲིན་ལས་བཅོ་བརྒྱད་ཀྱི་དོན་གྱིས་བསྟན་པས། ཐར་པའི་གོ་འཕང་རིམ་པས་ཐོབ་བོ།  །དེ་ནས་སྟོན་པ་ཡང་མྱ་ངན་ལས་འདས། དུས་ཀྱི་ཐ་མ་ལ་ཡང་ཇེ་ཉེ་ཇེ་ཉེར་སོང་། སྟོན་པའི་ཞལ་མཐོང་གསུང་ཐོས་ནས། དགེ་བ་སྤྱོད་པ་དང་ཤེས་རབ་ལྡན་པ་ནི་ཇེ་ཉུང་ཇེ་ཉུང་ལ་སོང་། དེའི་རང་བཞིན་གྱིས་བདུད་སྲིན་ལས་སོགས་སྡིག་ལས་སྤྱོད་པ་ནི་རབ་ཏུ་དཔུང་ཆེ་བར་གྱུར་ནས། སློབ་འབངས་ཚེའི་དངོས་གྲུབ་ཐོབ་པ་རྣམས་ཀྱིས་རང་བྱུང་མཆོད་རྟེན་ཆེན་པོ་བཞིའི་རྩ་རུ་སྒྲ་སྣ་ཚོགས་ཕྱུང་། མཆོད་པ་རྒྱས་པར་ཕུལ། གདུང་བའི་དབྱངས་བླངས་ནས་ཞུས་པས། སྟོན་པས་འོག་མིན་གྱི་གནས་ནས་སྲིད་པའི་བོན་པོ་མུ་ཆོ་ལྡེམ་དྲུག་གདུང་སོབ་ལ་བཏང་། དེ་རང་འབྱུང་མཆོད་རྟེན་བཞིའི་རྩ་བ་རུ་སྟོན་ཟླ་ཐ་ཆུང་གི་ཉ་ལ་ལྷ་བརྒྱའི་འཁོར་དང་བཅས་བྱོན་ཏེ། དེ་ལ་མཆོད་པ་རྒྱ་ཆེན་པོ་ཡོངས་སུ་ཕུལ་ཏེ་བསྟོད། སློབ་དཔོན་མུ་ཆོས་དཀར་ནག་བཀྲ་གསལ་རྒྱ་མཚོའི་གླིང་ཐོག་འབར་བ་ལས་སོགས་པ། བདེ་གཤེགས་བཞུགས་གནས་གསུམ་དུ་བོན་གྱི་འཁོར་ལོ་གསུམ་སྐོར་བས། ཤེས་པའི་རྒྱུད་སྦྱངས་པའི་མཁས་པ་མང་པོ་རིམ་པར་བྱུང་ནས། བསྟན་པ་དར་ཞིང་རྒྱས་པར་མཛད་དོ། །གཟིགས་ཚད་བཞི་དང་ཞེས་པ། འོལ་མོ་ལུང་རིང་ལ་གཟིགས། མཁར་བར་པོ་སོ་བརྒྱད་ལ་གཟིགས། ཡབ་རྒྱལ་བོན་ཐོད་དཀར་ལ་གཟིགས། ཡུམ་ཡོ་ཕྱི་རྒྱལ་བཞེད་ལ་གཟིགས། དགོངས་ཚད་དྲུག་ཅེས་པ། གླིང་ནི་ལྷོའི་གླིང་ལ་དགོངས། སྐྱེ་བ་མི་ལ་དགོངས། རིགས་རྒྱལ་རིགས་ལ་དགོངས། ནོར་རིན་པོ་ཆེའི་གཏེར་ལ་དགོངས། བསྟན་པ་སྤེལ་བར་དགོངས། འགྲོ་བ་་འདུལ་བར་དགོངས་ཏེ། བྱམས་པ་ཆེན་པོ་ཞེས་པ། དཀའ་བ་སྣ་ཚོགས་དང་དུ་བླངས་ནས། མཛད་པ་སྣ་ཚོགས་མཐའ་རུ་ཕྱིན་པ་ཁོ་ནའོ། འཁོར་བ་སྒྲོལ་མཛད་ཅེས་པ། སྔར་ཡང་དག་པར་རྗོགས་པའི་སངས་རྒྱས་ཀྱི་ཞལ་མཐོང་གསུང་ཐོས་པས་སངས་རྒྱས་ལ་ད་ལྟ་ཡང་བཀའ་སྡེ་སྣོད་རིན་པོ་ཆེ་ལ་བློ་སྦྱངས་པས། དོན་ཁྱད་པར་ཅན་རྒྱུད་ལ་སྐྱེས་ནས་སངས་རྒྱས་སོ། །བོན་གྱི་ཆེ་བ་བརྗོད་པ། གཤེན་རབ་མཛད་པ་མཐར་དབྱུང་གི་གཟེར་བུ་ཞེས་བྱ་བ་རྫོགས་སོ།། དྲང་དོན་མཆོད་བརྗོད་ཀྱི་འགྲེལ་པའོ།