ཐལ་ལྕག་འོག་གི་འཚོ་བ།།

སྐྱ་རེངས་ཐོག་མས་འབོད་སྐུལ་ཞིག་གིས་གཏི་མུག་གཉིད་ཀྱི་བདེ་དགའ་འཕྲོག།

གཞུང་མང་ཚིག་གི་གོ་རིམ་རེ་རེ་ཞེ་ལ་རུམ་ནས་སྐྱོར་སྦྱོང་རྩོམ།།

ཐོས་པ་རྒྱ་མཚོའི་ཕར་མཐའ་སྒྲོལ་བ་ངེས་པ་དོན་གྱི་རྟོག་གེ་བ།།

མཚན་ཉིད་སྡེ་ལྔའི་གསང་བ་བརྟོལ་ཕྱིར་གྲངས་མེད་ལོ་ཟླ་དཀའ་བས་བགྲང་།།

སྒོ་བཞི་མཛོད་ལྔའི་གནས་ལུཊ་གཞལ་ཕྱིར་རྫོགས་མེད་ཉིན་གྲངས་ཐོལ་གྱིས་བརྒལ།།

བསམ་པ་རྒྱ་མཚོའི་ནོར་བུའི་གཏེར་འཛིན་ངེས་པ་དོན་གྱི་རྟོག་གེ་བ།།

གཟུང་འཛིན་ཟུང་གི་སྒྱུ་འཕྲུལ་བྱེ་བ་སྤྲོས་པའི་མཚན་མར་རྟོག་ཅིང་དཔྱད།།

དོན་གྱི་གཤིས་ལས་གཡོ་བ་མེད་པར་རྩེ་གཅིག་བརྟན་པའི་ཏིང་འཛིན་འཇུག།

སྒོམ་པ་རྒྱ་མཚོའི་ཞི་ལྷག་ཟུང་འཇུག་ངེས་པ་དོན་གྱི་རྟོག་གེ་བ།།

གཞུང་ལུགས་བྱེ་བ་གདམས་པར་ཤར་བར་རྩོད་པའི་འཕྲུལ་བཟང་སྐྱིད་དུ་སྒོམ།།

རྟགས་གསལ་བྱེ་བ་གསང་ཚིགས་རྟོགས་པར་སྐྱོ་སྡུག་སེམས་ལ་ཁ་བ་འབབ།།

ལོ་ཟླ་བྱེ་བ་ཐོལ་གྱིས་བརྒལ་ལོ་ངེས་པ་དོན་གྱི་རྟོག་གེ་བ།།

རང་གི་རིག་གཞུང་སྙིང་ལྟར་གཅེས་པས་ཕྱོགས་རིས་ཅན་གྱི་ཁ་མདའ་ཕོག།

ཚིག་གི་ལྷུ་ལག་དུམ་བུར་གཏོར་བས་ཐ་སྙད་མཁན་པོའི་ཆོ་ལོ་བྱས།།

མི་འཇིགས་བསམ་པའི་མགོ་བོ་འཕྲག་པ་ངེས་པ་དོན་གྱི་རྟོག་གེ་བ།།

མདོ་སྔགས་རྫོགས་གསུམ་ཕར་མཐའ་ཡས་ཀྱང་ཁྱོད་ཀྱི་སེམས་སུ་ལྷམ་མེར་འཁྱིལ།།

བཅུ་ཕྲག་རིག་ཞུང་འབྱེད་པར་དཀའ་ཡང་ཁྱོད་ཀྱི་སེམས་སུ་གོ་རིམ་ཞིག།

རབ་འབྱམས་ཤེས་བྱ་བདག་གིར་བྱེད་པ་ངེས་པ་དོན་གྱི་རྟོག་གེ་བ།།

རིམ་དགུ་ཐེག་པའི་གོ་རིམ་རེ་ལ་ཁྱོད་ཀྱིས་བཞག་པའི་ཐ་སྙད་རེ།།

སྤང་བསྒྱུར་གྲོལ་བའི་ཐེམ་སྐས་རེ་ལ་ཁྱོད་ཀྱིས་བཞག་པའི་རྐང་རྗེས་རེ།།

གཞུང་ལུགས་རྒྱ་མཚོའི་ལང་ཚོ་དར་བ་ངེས་པ་དོན་གྱི་རྟོག་གེ་བ།།