རིགས་སྒྲ།།

ཨེ་མ་ལྷ་ཅིག་མཚོ་བྱུང་ཡིད་འཕྲོག་སྐུ།།

ཝ་ལེར་འཛུམ་ཞལ་སྟོན་ཟླ་གསར་པའི་གར།།

ངག་རིག་ཤེས་བྱའི་མེ་ཏོག་དཔལ་འཆང་ཐུགས།

ཇི་སྙེད་མཁྱེན་བརྩེའི་འོད་སྣང་དེང་འདིར་སྩོལ།།

_{མིང་གཞིར་ཀ་ཁ་ཚང་པའི་ཚིག་བཅད།}

དྷི་དབྱངས་གྲེ་བར་འཁྱིལ་བའི་མགྲིན་གསང་དུ།།

ཐལ་སྐད་ལྷོད་ཀྱིས་མཆེད་པའི་ཆུ་མཐོངས་ངོགས།།

སྒྲ་བརྒྱ་གར་གྱིས་འཕྱོ་བའི་སྟངས་སྟབས་ཀྱིས།།

བསམ་པའི་དག་ཞིང་དགོད་སྒྲའི་དཔལ་གྱིས་ཕྱུག།

རིག་པའི་དར་ཐག་བསྒྲིལ་བའི་སྐུད་སྣེ་རུ།།

གཞུང་དོན་བསྟར་ལ་རྒྱུད་པའི་དོག་པ་འབུམ།།

སེམས་ཀྱི་མགུ་བར་སྤྲས་པའི་འཇོ་སྒེག་ལ།།

བློ་གཏེར་གཞོན་ནུའི་རྣམ་དཔྱོད་འཕོས་སམ་ཅི།།

སྒྲ་ཚད་ཤེས་རིག་རྒྱ་མཚོའི་འཇུགས་ངོགས་སུ།།

ཐོས་བརྩོན་བུང་བ་རྩེན་པའི་འཕུར་ལྡིང་གིས།།

ཡོན་ཏན་སྦྲང་རྩི་གསར་པའི་ལང་ཚོ་བཅས།།

འཛིན་མའི་ཁྱོན་འདི་རྩ་གསུམ་དཔལ་ལ་འཐབ།།

རྟགས་གསལ་འུར་གྱིས་མཆེད་པའི་ཚོགས་གྲལ་ན།།

རྒོལ་ངན་ལྐོག་མལ་འབྱིན་པའི་རྔམ་ཟིལ་གྱིས།།

རྒྱལ་བསྟན་བདག་གིར་བྱེད་པ་ང་ཡིན་ཞེས།།

དགག་སྒྲུབ་ཚུལ་གྱིས་མཁས་པའི་སྙན་པ་འབར།།

ལུང་དང་རིག་པའི་མདུད་རྒྱ་དགྲོལ་བ་ལ།།

མཁས་བརྒྱའི་མཁྱེན་རབ་གཅིག་དུ་སྤུངས་པ་བཞིན།།

འཛིན་མའི་ཁྱོན་དུ་མཁྱེན་གཏེར་ང་འོ་ཞེས།།

དྲེགས་པའི་ང་རོ་སྒྲོགས་ཀྱང་འོས་སམ་ཅི།།

ལོག་རྟོག་འཐས་པའི་བྲག་རི་གཞོམ་པ་ལ།།

དགག་སྒྲུབ་མེ་ཆར་འབབ་པའི་མཐུ་མངའ་བ།།

རྩོད་པའི་རྒྱ་མཚོར་འཇུག་པ་དེ་ཉིད་ཅེས།།

དམ་པའི་ལུང་གིས་བསྔགས་འདི་ཅིས་མི་བདེན།།

རྨོངས་བློ་གནོ་ལྕགས་བཞུ་བ་འཕྲུལ་གྱི་མེ།།

འཆད་རྩོད་བཟོ་བོས་རྩལ་ལས་ཐོན་པ་ཡིས།།

གཞུང་ལུག་ཕུབ་མོ་འབེག་པའི་དབལ་སོ་ལ།།

རབ་འབྱམས་གཤེས་གཉེན་སྐལ་བ་བཟང་ཞེས་གྲགས།།

༢༠༡༠ /༩/༡/