རླུང་གིས་ཁུར་བའི་བསམ་པ།།

ཟླ་འོད་འཛུམ་དཀར་འགྱེད་པའི་མཚན་ལྗོངས་རིང་མོ།།

དྲན་འཛིན་རླུང་བུས་ཁུར་བའི་མལ་ཤག་ནང་དུ།།

རྒོད་སྒྲའི་ལོ་ཟླ་སྐྱོམས་པའི་གཡོ་རླབས་ཤིག་གིས།།

སྙིང་ཤ་བཙན་གྱིས་འགས་པའི་གཟེར་ཟུག་རྒྱབ་བྱུང་།།

ཐལ་སྐད་འུར་གྱིས་མཆེད་པའི་རྩོད་གྲྭའི་ནང་དུ།།

རྒོད་འཛུམ་ཡངས་མོ་ཞིག་གི་གཟན་སྣེ་འཐུད་དུས།།

ལོ་ཟླའི་དྲན་པ་ཁུར་བའི་དཔེ་བརྩེག་འགྲམ་ན།།

ད་དུང་རྣམ་ཤེས་ཤིག་གི་འགུལ་སྟངས་ལྷག་ཡོད།།

ཁྱོད་གཟན་རླུང་གིས་བཤུས་པའི་ཤུབ་སྒྲ་དེ་ཡིས།།

ཁོ་བོའི་བསམ་གཞིག་ཡོད་ཚད་སྡུག་ལ་སྦྱར་སོང་།།

རྨི་ལམ་གསོན་པོར་རྒྱུ་བའི་འཇིག་རྟེན་འདི་རུ།།

ང་ཡང་ལས་དབང་འདི་ལ་དོག་སྣང་མང་བྱུང་།།

དུང་བའི་ངུ་ངག་ཁུར་བའི་གློག་འཕྲིན་བར་ནས།།

ལོ་ཟླའི་མཛེས་སྡུག་ཡོད་རྒུ་རྡུལ་གྱིས་སྦག་སྟེ།།

རྫུན་གྱི་ཕུང་པོར་གྲུབ་པའི་འཇིག་རྟེན་འདི་ནས།།

འདི་ཞེས་མཐར་ཐུག་གྲུབ་པའི་བདེན་པ་མ་བརྙེད།།

དང་པོའི་གོམ་སྟབས་ནོར་བའི་སྲོང་ལམ་དེ་རུ།།

ཐ་མ་ལས་དབང་གཤེ་བའི་རྐང་གཉིས་མི་བུར།།

བསམ་པའི་དྲན་གཡོག་གྱུར་པའི་ཁྱིམ་གཞི་དུམ་བུ།།

ཡོད་ཀྱང་རང་གི་འཇིག་རྟེན་རྡུལ་ལས་ཆུང་བ།།

བཅོས་མིན་བརྩེ་བ་ཟམ་མོས་ལོ་ཟླ་རུམ་དུས།།

སུ་ཡང་གྲོགས་ཀྱི་མཆོག་ཏུ་བརྩི་བར་ཕོད་ལ།།

སེམས་ཀྱི་འཇིག་རྟེན་ཡོངས་སུ་ཆག་བཀྲུམ་ཤོར་ཚེ།།

རྨོད་པའི་མཆིལ་ཞགས་རྐྱོངས་བ་བྱ་ངན་ཤེས་སོང་།།

བཟོད་དཀའི་ཚོར་བ་ཞིག་གིས་རྨ་ཁ་ལྕི་ཡང་།།

དུང་བའི་ལོ་ཟླ་རིང་མོ་སྐྱར་དྲན་བྱས་ཏེ།།

སེམས་ཀྱིས་དགའ་སྐྱོ་གླེང་བའི་སྟེགས་བུ་ཞིག་ལ།།

བདག་གིས་ཁ་པར་ཡང་ཡང་ཁྱེད་ལ་གཏོང་ཆོག།

         ༢༠༡༠ ༤ ༩ཉིན་ཀོ་རྒྱལ་ནས།