2

推荐

ཤོག་དྲིལ་སྔོན་པོ།། 

 ཨེ་མ་གངས་རིའི་ཚོམ་ཕྲེང་གླང་པོའི་མཆེ་བ་བསྣོལ་འདྲས།།

ཕྱོཌ་མཚམས་ཀུན་ནས་འཁྱུད་པིའ་ས་ལའི་ལྗོངས་ཀྱི་ཞིང་དུ།།

བདེ་སྐྱིད་མེ་ཏོག་འབུམ་བཞད་རྫོཊ་ལྡན་གསར་པའི་དགའ་སྟོན།།

སྙན་པའི་རོལ་དབྱངས་དཀྲོལ་ལ་རྣ་བ་ཡང་ཡང་བློགས་དང་།།

ས་ལ་སྡེ་བཞི་རྫོགས་པའི་ཁྱུང་ཡུལ་མཐོང་བ་ཀུན་སྨོན།།

རི་ཀླུང་སྔོ་ལྗང་ལྡེམམེ་ནེ་ཙོའི་སྒྲོ་གཤོག་ཕུབ་འདྲ།།

གྲོང་དང་གྲོང་ཁྱེར་ཁྲག་ཁྲིག་མཁའ་ལ་སྐར་ཚོཌ་བཀྲ་འདྲ།།

ཆབ་དང་ཆུ་བོའི་བཞུར་རྒྱུན་དར་དཀར་ཉག་ཐག་རྐྱོང་འདྲ།།

 ཕུ་ལ་རི་རྔུ་གངས་བཟང་ཕྱེ་མར་ལྷ་ལ་ཕུལ་འདྲ།།

མདའ་ལ་སྤེན་ནེ་རི་བཀྲ་ཕྱུགས་ལུག་རྡང་ལ་བཏགས་འདྲ།།

བར་ལ་རི་ཕྲན་བརྒྱ་སྟོང་མཁའ་འགྲོའི་ཚོགས་འཁོར་བཤམས་འདྲ།།

རྟ་ཤོད་པདྨའི་དཀྱིལ་འཁོར་བྱུ་རིའི་མནྟལ་ཕྱིས་འདྲ།།

གདན་ས་དཔལ་གྱི་སྟེང་ཆེན་ཉ་མོ་མཚོ་ལ་འཁྱིལ་འདྲ།།

དུང་སེང་མཁའ་ལ་མཆོང་འདྲའི་གྱིམ་ཤོད་ཤེལ་ལེ་རྫོང་དྲུག།

ཅང་ཤེས་ཁྱུ་སྣེ་མཐུད་འདྲའི་རྟ་ཡི་ཟལ་མོ་རི་རྒྱུད།།

བྱང་ཆུ་དལ་བ་རིང་མོ་ས་ལ་གཡུ་འབྲུག་འཁྱུག་འདྲ།།

སྤུ་ཧྲོག་མཚོ་མོ་ཆེ་ཆུང་ཀླུ་ཟོག་གཏེར་གྱིས་གང་འདྲ།།

ཐ་གསུམ་གཡུ་ཡི་རྩྭ་ཐང་ཕར་མཐའ་མཁའ་ལས་ཡངས་པ།།

རྟ་ནོར་ལུག་ཁྱུའི་ཕྲེང་བ་་སྐར་ཚོགས་ས་ལ་འཕོས་འདྲ།།

ཕྱུགས་རྫིའི་མགྲིན་དབྱངས་སྙན་མོ་ཁུ་བྱུག་ནགས་ནས་གྲག་འདྲ།།

 མ་འབྲི་ངུར་རྒྱངས་ལྡི་རེ་དབྱར་སྐྱེས་གདངས་དབྱངས་འཐེན་འདྲ།།

བེའུ་ལུག་མཆོང་རྩེད་ཉམས་གར་རྩི་ཏོག་རླུང་གིས་བསྐྱོད་འདྲ།།

 སྟོང་ལྡན་སེར་ཆེན་མེ་ཏོག་སྤང་ལ་གསེར་ཞག་འཁྱུད་འདྲ།།

 རིན་ཆེན་ཕྲེང་བ་འཕྱང་འདྲའི་དཀར་ནག་སྦྲ་གུར་ཁྲག་ཁྲིག། 

 སྤྲིན་དཀར་མཁའ་ལ་འཕྱོ་འདྲའི་རླུང་རྟའི་མདོ་དར་རིང་མོ།།

མཚོ་མོ་རླུང་གིས་བསྐྱོད་འདྲའི་དཀར་ཆུ་འོ་མའི་རླབས་ཕྲེང་།།

རྨ་གཡང་གཏེར་སྒོ་ཕྱེས་འདྲའི་སྤུ་ཧྲོག་གངས་ཀྱི་མཛེས་སྡུག།

ཨེ་མ་དཔལ་གྱི་ཞིང་ཁམས་ཁྱུང་ཡུལ་འཛམ་ལྷའི་གན་མཛོད།།

དགེ་བཅུའི་ལང་ཚོ་བདོ་བས་ཆར་ཆུ་དུས་སུ་འབབ་ཅིང་།།

ལོ་ཕྱུགས་རྟག་ཏུ་ལེགས་པའི་ཕ་ཡུལ་འདོད་རྒུའི་འབྱུང་གནས།།

མི་ལ་ཚེ་བསོད་འཛོམས་པས་སྐྱེ་རྒུས་དགའ་བདེ་རོལ་ས།།

 རིས་མེད་ཆོས་ལ་དད་པས་མཐུན་སྒྲིལ་མདུད་རྒྱ་དམ་ས།།

ཀུན་ཀྱང་བཤེས་སུ་ཆགས་པས་འཐབ་འཁྲུག་རྩོད་གླེང་བྲལ་བ།།

གཤིས་རྒྱུད་དགེ་བས་བརླན་པས་དགྲ་རྐུན་ཇག་གིས་དབེན་པ།།

 ཞི་བདེའི་དཔལ་ལ་རོལ་བའི་རྫོགས་ལྡན་གསར་པ་དྱས་འདུག།

 ཨ་ཧོ་མཐོང་སྨོན་ཞིང་མཆོག་གྱིམ་ཤོད་སུམ་པ་གླིང་འདིར།།

མཁས་དང་གྲུབ་པས་ཕྱུག་འདིས་ས་ལ་འཕགས་པའི་ཞིང་ཁམས།།

 ཕོ་ལ་རྩལ་རྒུ་འཛོམ་པས་གླིང་དཀར་དཔའ་བོའི་བུ་རྒྱུད།།

མོ་སྨན་མཛངས་མ་མངའ་བས་ལྷའི་ལྕམ་དོག་ལ་བབ་འདྲ།།

དེ་སྐད་སྐྱིད་པའི་བུ་ཆུང་རྒྱང་རིང་ཡུལ་གྲུར་སྙོག་སྐབས།།

ཕ་ཡུལ་དཔལ་གྱི་སྟེང་ཆེན་ཡིད་ལ་ཡང་ཡང་བྱས་ཏེ།།

མ་བཅོས་སེམས་ཀྱི་རི་མོ་སྨུག་གུའི་བུ་མོས་གཏོད་ནས།།

ངག་རིག་གླུ་དབྱངས་ལེན་བཞིན་དགའ་བའི་དཔལ་གྱིས་གཟི་སོང་།།

ཁྱུང་སྨྱུག་མཛེས་ཀྱིས།       ༢༠༠༤-༣-༢༣