ཤོག་དྲིལ་དཀར་པོ།

ཀ་དག་སྐྱེ་མེད་བོན་སྐུའི་མཚོ་འཇིངས་ལས།།

མ་འགག་ཤེས་རབ་ཟླ་གཞོན་འཛུམ་པའི་དཔལ།།

སྣང་སྟོང་སྒྱུ་འཕྲུལ་དབྱིངས་ཆེན་བདེ་བའི་ཡུམ།།

ཤེས་རབ་བྱམས་མའི་ཚོགས་ལ་པ་ཏ་ཡ།།

གང་འདུལ་དེར་སྟོན་འཇོ་སྒེག་རོལ་པའི་གར།།

ངག་རིག་དཔལ་སྟེར་དྲི་ཟའི་བུ་མོའི་ཚུལ།།

དམུ་གྱེར་བསྟན་སྲུང་ཁྲོས་མ་སྲིད་གསུམ་བདག།

མཚན་དྲུག་ལྷ་ཟ་རྒྱལ་བ་ཀུན་གྱི་མ།།

ཟུར་ཕུད་རིན་ཆེན་བྱེ་བའི་ལྕུགས་ཕྲན་ཅན།།

དབང་སྔོན་ལན་བུས་མཛེས་ལྡན་གསེར་མདོག་བཞིན།།

སྤྱན་དཀྱུས་འོད་དཀར་ཟླ་བའི་འཛུམ་རིས་གཡོ།།

སྲིད་ཞིའི་མཛེས་ལྡུག་གཅིག་ཟླུམ་གཞོན་ནུའི་དཔལ།།

ཉག་གཅིག་དབྱིངས་ཉིད་བདེ་བ་ཆེན་པོའི་ཀློང་།།

བརྒྱད་གཉིས་ལང་ཚོའི་དྲེགས་པའི་འགྱིང་བག་ཅན།།

ཁམས་གསུམ་རྨོངས་སེལ་ཤེས་རབ་ལྷ་བདུན་མོ།།

བདེན་བཞིའི་དེ་ཉིད་གསལ་བའི་མཁྱེན་སྟེར་མ།།

ཕྱག་ཟུང་པད་མས་མཚན་པ་གཏེར་གྱི་བུམ།།

རབ་གསལ་སྣང་བའི་མེ་ལོང་ཟུང་གཅིག་གིས།།

འཇིགས་པ་བརྒྱད་བསྒྲལ་ཞི་བའི་གཏེར་འཛིན་པའི།།

སྐྱེ་རྒུའི་མ་མ་ཨེར་སངས་ངག་གི་ལྷ།།

ཕ་རོལ་ཕྱིན་མཛད་ས་བཅུའི་བྱམས་ཆེན་མོ།།

ཕས་རྒོལ་དགྲ་བྱད་ཀླུ་གདོན་འཇིགས་པ་སྐྱོབས།།

སྲིད་ཞིའི་མུན་སེལ་རིགས་མཆོག་རྒྱལ་སྟེར་ཞིང་།།

འདོད་རྒུའི་མཛོད་འཛིན་སྦྱིན་པའི་ལྷ་མོ་ཆེ།།

དད་པའི་འགྲོ་ལ་བསོད་ནམས་སྐྱིད་འཇོ་ཞིང་།།

སྒྲུབ་པའི་གཤེན་ལ་འཛུམ་དཀར་སྟོན་མཛད་མ།།

བློ་གྲོས་མཆོག་སྦྱིན་ས་ཏྲིག་ཨེར་ཏུ་སངས།།

རྒྱལ་ཀུན་ཡུམ་ཅིག་ཕྱིན་བཅུ་བྱམས་མའི་སྐུ།།

མཚན་ཐོས་ཙམ་གྱིས་རྨོངས་པའི་མཐུ་ལས་རྒྱལ།།

དྲན་པའི་ཡིད་ལ་བདེ་དགའི་སྐྱིད་འཇོ་ཞིང་།།

ཀུན་ཁྱབ་ཡེ་ཤེས་འགྲོ་ལ་སྦྱིན་པའི་དཔལ།།

ཤེས་རབ་ལྷ་མོའི་དཔལ་ལ་དེ་ལྟར་བསྟོད།། ༢༠༠༤  ༡༢  ༧ལ་བྲིས་སོ།།