ཆོས་དྲེད་ཆོས་ཀྱིས་མ་ཐུལ།།

 དང་པོའི་དད་པ་ཕ་མའི་ངག་ལས་གོ་བྱུང་།། 

བར་དུ་དད་པ་བཤེས་གཉེན་གསུང་ལས་ཐོས་བྱུང་།། 

ཐ་མའི་དད་པ་གཞུང་ཟབ་ཁྲོད་ནས་མཐོང་ཡང་།།

 དད་པའི་ཆོས་དྲེད་ང་རང་ཆོས་ཀྱིས་མ་ཐུལ།།

 ཐོག་མའི་སྐྱབས་འགྲོ་མི་རིགས་སྲོལ་གྱིས་སྐྱེས་བྱུང་།།

 བར་དུ་སྐྱབས་འགྲོ་བོན་སྒོར་ཞུག་པས་འདོད་བྱུང་།། 

ཐ་མའི་སྐྱབས་འགྲོ་སྡེ་སྣོད་གཞུང་ལས་མཐོང་ཡང་།།

 སྐྱབས་འགྲོའི་ཆོས་དྲེད་ང་རང་ཆོས་ཀྱིས་མ་ཐུལ།། 

དང་པོའི་སེམས་བསྐྱེད་ལམ་རིམ་གཞུང་ལས་ཐོས་བྱུང་།།

 བར་དུ་སེམས་བསྐྱེད་གབ་མཛོད་ས་ལས་ཁྲིད་བྱུང་།།

 ཐ་མའི་སེམས་བསྐྱེད་བོན་སྤྱོད་གཞུང་ནས་སྒོམ་ཡང་།།

སེམས་བསྐྱེད་ཆོས་དྲེད་ང་རང་ཆོས་ཀྱིས་མ་ཐུལ།།

དང་པོ་ལས་འབྲས་བཤད་པའི་སྐྲག་སྣང་སྐྱེས་བྱུང་།།

 བར་དུ་ལས་འབྲས་བཤད་དུས་མཚར་སྣང་མང་བྱུང་།།

 ཐ་མར་ལས་འབྲས་གླེང་དུས་སུན་ཐག་ཆད་སོང་།།

 ལས་འབྲས་ཆོས་དྲེད་ང་རང་ཆོས་ཀྱིས་མ་ཐུལ།།

དང་པོའི་ལྷ་ཕྱག་དྲན་གཡོག་སྟང་ཀས་ཤེས་བྱུང་།།

 བར་དུ་ལྷ་ཕྱག་དད་པའི་ཟུར་ནས་མཐོང་སོང་།།

ཐ་མའི་ལྷ་ཕྱག་བསགས་སྦྱོང་ཁྲོད་ནས་འཚལ་ཡང་།།

ཕྱག་འཚལ་ཆོས་དྲེད་ང་རང་ཆོས་ཀྱིས་མ་ཐུལ།།

དང་པོའི་ཀློག་འདོན་བགྲེས་སོང་གམ་ནས་ཤེས་སོང་།།

 བར་དུ་ཀློག་འདོན་དཀོར་ཟས་བསྡུ་དུས་གོམས་བྱུང་།།

 ཐ་མའི་ཀློག་འདོན་བསྙེན་བསྒྲུབ་སྐབས་སུ་འབེད་ཀྱང་།།

 ཀློག་འདོན་ཆོས་དྲེད་ང་རང་ཆོས་ཀྱིས་མ་ཐུལ།།

དང་པོའི་སྙིང་རྗེ་ཕ་མའི་བསླབ་བྱས་ཤེས་བྱུང་།།

 བར་དུ་སྙིང་རྗེ་དགེ་འདུན་ཁྲོད་ནས་བཤད་བྱུང་།།

 ཐ་མའི་སྙིང་རྗེ་དུས་བཞི་ཆོ་གས་ཀླག་ཀྱང་།།

སྙིང་རྗེའི་ཆོས་དྲེད་ང་རང་ཆོས་ཀྱིས་མ་ཐུལ།།

 སྦྲང་རྩི་ཟ་ཡུན་རིང་ན་ཞིམ་པ་མི་ཚོར།།

ཁུ་བྱུག་གྲག་ཡུན་རིང་ན་སྙན་སྣང་མི་ཤར།།

ཆོས་ལུགས་བཤད་རྒྱུ་མང་བས་ཆོས་ཀྱིས་མི་ཐུལ།།

གདུལ་བྱའི་བློ་དང་བསྟུན་པ་ཐབས་ཀྱི་མཆོག་ཡིན།།