9

推荐

བུང་བ་རྣམ་པར་བརྩེན་པའི་བསྟོད་ཚིག།

ཤེས་བྱའི་གནས་ལུགས་ཇི་བཞིན་མཁྱེན་པའི་ཐུགས།།

རབ་སྙན་ཚངས་དབྱངས་ཡན་དྲུག་ཅུའི་གསུང་།།

རྒྱལ་ཀུན་སྤྱི་དཔལ་ངུར་སྨྲིག་འཆང་བའི་སྐུ།།

མཚན་ལྡན་མཉམ་མེད་བླ་མས་ཤིས་པར་སྩོལ།།

རྣམ་མང་སྐྱེ་ཕྲེང་བསོད་ནམས་འོ་མའི་མཚོ།།

གུས་འཇུག་མཉེས་པ་གསུམ་ལྡན་དབྱུ་གུ་ཡིས།།

ཉེར་བསྲུབས་ལས་སྨིན་དཀར་བའི་གཟི་སྟོང་ཅན།།

དྲང་སྲོང་ཟླ་གཞོན་བསྟོད་པའི་ཚིག་འཕྲེང་འཐོར།།

ཆེ་བཙན་རྟ་བདུན་ཟེར་བརྒྱས་སྨིན་མིན་པར།།

བསོད་ནམས་ག་བུར་ཟེགས་མ་འབུམ་འཛག་པ།།

མངོན་མཐོ་ངེས་ལེགས་ཡངས་པའི་ཚལ་བཟང་པོར།།

སོན་པའི་རྟེན་མཆོག་པད་དཀར་འདབ་འཕྲེང་རྒོད།།

དལ་བའིགཞུང་རྟ་མཉེན་ལྕུག་ལྡེམ་པའི་རྩེར།།

འབྱོར་བཅུའི་འདབ་ཕྲེང་ཡོན་ཏན་མེ་ཏོག་མཛེས།།

དད་བརྩོན་འཕགས་ནོར་གསེར་གྱི་ཀེ་ས་རར།།

ལེགས་བྱས་མངར་བའི་དྲི་བསུང་རིང་ནས་འཁྱུད།།

ངེས་འབྱུང་མེས་པོའི་བཀའ་ལུང་གཉན་པོ་ཡིས།།

ཉེར་བསྐུལ་དཀར་མིན་ལས་ཀྱི་གཉེན་པོ་ཡིས།།

བསིལ་བྱེད་གཙང་སྡོམ་སྐལ་ལྡན་ཤིང་རྟའི་རྒྱུན།།

བླང་པའི་ངོ་མཚར་ཛ་ཧུ་ན་ལ་འཁུ།།

ལང་ཚོའི་མྱུ་གུ་ཕྲ་མོའི་དུས་ཉིད་ནས།།

ཐེག་ཆེན་རིགས་ཀྱི་ས་བོན་ལས་འཁྲུངས་པའི།།

དམ་པའི་ལོ་འབྲས་གཡུར་དུ་སྨིན་པའི་དཔྱིད།།

སྦྱོར་བརྩོན་ཉེར་ལེན་ཆབ་ཀྱིས་སྟོབས་སུ་རྫོགས།།

 ཀློག་པ་ཐོས་བསམ་སྤང་པ་བསམ་གཏན་དང་།།

 ཟུང་འཇུག་དབེན་པ་སུམ་ལྡན་རི་སུལ་དུ།།

ཡེངས་མེད་ཀ་དག་ཀློང་དུ་རོལ་རྩེད་ཀྱིས།།

མི་འཇིག་སྐུ་བཞིའི་གོ་འཕང་མངོན་བརྙེས་ཀྱང་།།

བསྟན་ལ་ལྷག་བསམ་ཟླ་བའི་བ་དན་གྱིས།།

བརྒལ་རྟགས་རིགས་པའི་ཆུ་སྒྲོལ་ལ་ཞུགས་ནས།།

རིགས་ཚུལ་ནོར་བུའི་དོ་ཤལ་རྒྱན་འཕྱང་སྟེ།།

ཕྱོག་བྲལ་མཁས་པའི་ཁྲི་ལ་ཉེ་བར་བཞུས།།

རྒྱལ་བསྟན་རིན་ཆེན་བཤད་དང་སྒྲུབ་པའི་སྡེ།།

ཟུང་འབྲེལ་ཀུན་ཕན་གྲིབ་བསིལ་གདུགས་དཀར་རྩེར།།

 མཆོད་པས་སྲིད་དང་ཞི་བའི་ལུས་ཅན་གྱི།།

རྒུད་པ་ཀུན་བྲལ་དགེ་ལེགས་དཔལ་དུ་རྩེན།།

མཁས་སྙན་གྲགས་དཀར་བསིལ་བའི་ཟླ་ཞུན་མས།།

བཙུན་པའི་ངོ་མཚར་འོད་རིས་འབྱམས་ཀླས་པ།།

 འབྱེད་པས་ཀུནྡ་ཕན་བདེའི་རྩ་ལག་ཅན།།

ཀུན་མཁྱེན་བསུང་གི་ངད་པ་ཕྱོགས་སུ་འཐུལ།།

རྟོག་དཔྱོད་ཡིད་མཚོར་བརྩོན་པའི་དབྱུ་གུ་ཡིས།།

 བསྲུབ་སྐྱེས་ལེགས་བཤད་སྣང་བ་དཀར་པོའི་ཟླ།།

བསྟན་འགྲོའི་སྤྱི་དཔལ་མཁའ་རུ་ལྷག་པའི་མོད།།

འཆད་རྩོད་པད་དཀར་འདབ་སྟོང་ལྷུག་པར་གྲོལ།།

མདོ་འབུམ་རྒྱུད་མཛོད་ཀེ་ས་ར་ཡི་རྡུལ།།

རབ་སྐྱུག་སྙིང་པོ་གཏེར་བརྒྱས་སྨྱོས་པ་ཡི།།

ཀློག་པ་ཐོས་བསམ་མགྲིན་ལམ་བདེ་བའི་གླུ།།

ལེན་མཁས་དཔྱོད་ལྡན་བུང་བའི་ཁྱུ་ཚང་བརྡོལ།།

སློབ་འབངས་རྒྱུ་སྐར་ཚོམ་བུས་སྐོར་བའི་དབུས།།

ཁྱེད་སྐུ་ཉ་གང་ཟླ་བའི་གཟི་སྟོང་ཅན།།

དོན་ལྡན་སྙན་པ་བདུད་རྩི་ཟེགས་མའི་ཆར།།

མ་འཐོར་འཛིན་མའི་ཁོར་ཡུག་དམིགས་སུ་མེད།།

ཞྭ་དཀར་གཡུང་དྲུང་བསྟན་ལ་ལེགས་བྱས་ཀྱི།།

ཟབ་རྒྱས་ལེགས་བཤད་གཡས་སུ་འཁྱིལ་བའི་དུང་།།

བྱམས་བརྩེའི་དབུགས་ཀྱིས་བསྐུལ་ཚེ་རྣམ་མང་འགྲོའི།།

རྨོངས་པའི་རིམ་ནད་གཅིག་ཆར་གཞོམ་པར་བྱས།།

དབུ་ཕར་འདུལ་མཛོད་ཚད་མ་བཀའ་ཆེན་ལྔའི།།

གཞུང་དོན་འབྱམས་ཀླས་སྲིད་གསུམ་ནོར་འཛིན་ཁྱོན།།

འཆད་སྤེལ་གོམ་པ་གསུམ་གྱིས་གཞལ་བ་ན།།

མཁས་རློམ་སྟོབས་ལྡན་ཀུན་བཟོད་ཕག་ཏུ་གཤེགས།།

གསུང་རབ་རིན་ཆེན་ཀུན་དགའ་རྭ་བའི་མཛོད།།

བྱུར་བུར་ལྟེམས་པ་བྲག་རི་བརྩེགས་པའི་ཟོལ།།

རབ་བརྟན་གླང་པོས་ཁུར་དུ་ངལ་སྟེར་བ།།

རྗེས་བཞག་བསྟན་པའི་འཕྲིན་ལས་བསམ་མཐའ་ཡས།།

འདི་སྣང་སྦྲང་རྩི་བགོས་པའི་རལ་གྲི་ཡིས།།

འབྲིད་པར་མ་ཕོད་གཏན་བདེ་མངར་བའི་རོར།།

རྟག་བརྩེན་ཆེ་རློམ་ཕར་གྱི་རྣམ་ཐར་དང་།།

གསེར་རི་ཕྲེང་ཚོམ་དབུས་ན་ལྷུན་པོ་བཞིན།།

རྣམ་མང་འགྲོ་བློ་གཤིན་པའི་ཞིང་ས་རུ།།

ཐར་དང་ཐར་ཆེན་ས་བོན་ལེགས་སྦྲུམས་ནས།།

རྟག་འཛིན་སུན་ཕྱུང་གཟུགས་སྐུ་བཀོད་པའི་འཕྲུལ།།

རེ་ཞིག་ཞི་བའི་ཀློང་དུ་བསྡུ་ཚུལ་བསྟན།།

གང་གི་མཛད་འཕྲིན་གླིང་རྒུའི་ཆུ་གཏེར་ལས།།

རབ་དད་འདུན་པ་ཀུ་ཤའི་ཆུན་པོ་ཡིས།།

བླང་པའི་བསྟོད་ཚིག་ཟེགས་མ་ལེགས་འཐོར་གང་།།

བསོད་ནམས་མྱུ་གུ་སྨིན་པའི་སྐྱེས་སུ་བཏེགས།།

གཞལ་དཀའི་དྲིན་མཆོག་དཀར་གསལ་ཟླ་བའི་འོད།།

དྲན་གདུང་ཡིད་འཚོར་འཆང་བའི་རོལ་རྩེད་ཀྱིས།།

ཡོལ་མེད་བསྟོད་ཚིག་རླབས་ཀྱི་འཁྲི་ཤིང་རྩེར།།

བཞད་པའི་འཛུམ་དཀར་མི་ཕྱེད་པས་མཆོད།།

 ༢༠༠༢ ལོར་བོན་བརྒྱ་ནས།