འཚོ་བའི་རླབས་རིས་སུ་བརྩེན་པའི་ལྦུ་བ།།
དད་དང་འདུན་པའི་ངོ་གདོང་མ་མཐོང་སྐོར་ཕྱག་གྲངས་ཀྱིས་ལོ་ཟླ་ཟོས།།
ངེས་འབྱུང་བུ་མོའི་རུམ་ཁ་མ་ཕྱེས་མཚམས་སྤྲིན་ཀློང་དུ་ཐོལ་གྱིས་ཐོན།།
འཇའ་ཚོན་ཁྲོད་ཀྱི་བྱིས་སྦ་ཞིག་གིས་འགྲོ་བའི་རྡོག་སྣེ་གང་དུ་བཏོད།།
འཆད་རྩོད་རྩོམ་སྒྲུབ་བྱ་བའི་འཁོར་ལོས་རང་གཞུང་བརྒྱ་ཕྲག་མཇལ་བ་ན།།
རབ་བརྒྱད་སྟོན་མཆོག་ཁྲི་གཙུག་གཤེན་ཞེས་སོར་བཅུ་དཔྲ་བར་ལེན་བཞིན་དུ།།
ཁོ་བོ་ལས་གཞན་འབྱོར་ལྡན་མེད་ཅེས་ཁེངས་པའི་སྙིང་རྩ་དྲག་ཏུ་འཕར།།
ལོ་རྒྱུས་རྒན་པོའི་ངག་སྒྲོས་ཐན་ཐུན་ཕྱོགས་ཀྱི་ལོ་ལར་འཕྱན་པ་ན།།
བརྡོལ་བོན་བསྒྱུར་བོན་དམར་བོན་བོན་ཞེས་སྒྲ་འཛིན་བུ་ག་བཙག་པའི་ཚེ།།
མི་ཚེ་ཐུང་ངུའི་འགྲོ་སྟོང་འཆུག་གམ་སུ་ཡིས་བཟོས་པའི་ནག་ཉེས་ཡིན།།
སེམས་བསྐྱེད་སྐྱབས་འགྲོའི་རྣམ་བཞག་ཟབ་ཀྱང་མུ་སྟེགས་ལོག་པའི་འཁྱལ་བོན་ཞིག།
སྤང་བསྒྱུར་གྲོལ་བའི་གཞུང་ལུགས་མཆིས་ཀྱང་རྒྱ་གར་བན་དེའི་བསྒྱུར་བོན་ཞིག།
གཡུང་དྲུང་བོན་པོའི་སེམས་ཁོངས་དཀྱིལ་དུ་འདི་དག་ཅུང་ཟད་བཟོད་ལགས་སམ།།
སྤུ་རྒྱལ་བཙན་པོའི་རྒྱལ་ཁབ་དང་པོ་གོ་ལོའི་ལྗོངས་འདིར་སུ་ཡིས་བསྐྲུན།།
སྲོང་བཙན་སྒམ་པོས་མཐའ་བཞི་འདུལ་བར་ཐོག་མའི་རྨང་གཞི་གང་ནས་བླང་།།
རྒྱ་གར་བན་དེའི་གཡོ་འཕྲུལ་ཞིག་གིས་ང་ལ་ལྕི་བའི་ནག་ཉེས་ཤིག།
གཤེན་བསྟན་པད་མོས་གངས་རི་མཛེས་ཚེ་བོད་རྒྱལ་བཙན་པོ་ལྷ་ལས་བབས།།
བོན་གཤེན་རྔ་ཐོགས་མདུན་གྲལ་བསྟར་ཚེ་ཕྱོགས་ཀྱི་རྒྱལ་ཁབ་སྙིང་རྩ་འདར།།
འོན་ཏེ་གོ་རྟོགས་དབེན་པའི་ཆོས་རྒྱལ་དེ་ཚོས་རང་གི་རིགས་རྒྱུད་བཤས་རར་བསྐྱལ།།
སྒྲུང་ལྡེའུ་བོན་གྱི་དཔལ་ཁ་མཐོ་དུས་གཡག་རྒོད་ངུར་བའི་གཅན་གཟན་དཀྲོག།
བཅུ་གཉིས་ཤེས་བྱའི་རྦ་ཀློང་དག་ལས་སྲིད་པའི་དཔའ་གཏམ་བདག་གིར་བྱས།།
མིག་རྒྱང་ཐུང་བའི་བློན་ངན་དེ་ཚོས་གངས་རིའི་རྣམ་ཤེས་འཁྱགས་ལ་སྦྱར།།
གྲོལ་བ་ཁོ་ནར་དོན་དུ་གཉེར་ཚེ་ཇི་ལྟར་ཡིན་ཡང་ཆོག་མོད་ཀྱང་།།
མི་རིགས་དང་ནི་བསྟན་པའི་ལ་རྒྱས་སེམས་ཀྱི་ལྷིང་འཇགས་དཀྲོག་པའི་ཚེ།།
བདེ་བའི་བསྟན་ལ་སྐད་ཅིག་ཚམ་ཡང་འདུག་པའི་བཟོད་གླག་ཁོ་བོར་བྲལ།།
༢༠༡༠ ལོའི་ཟླ་བ་༤པའི་ཚེས་༩ལ་བྲིས་སོ།།
- ཟིན་ཐོ་གོང་མ།ཕྱྭ་སྣང་གཏོ་ཡི་ཕན་འབྲས་དང་ལག་ལེན།།
- ཟིན་ཐོ་འོག་མ།ཆོས་དྲེད་ཆོས་ཀྱིས་མ་ཐུལ།།
གྲོགས་ལགས་ཁྱེད་སྐྲག་མི་དགོས་ལ་ངུ་ངག་ཀྱང་འདོན་མི་དགོས། གསེར་ས་ན་ཡོད་ན་འོད་གནམ་ན་ལོས་ཡོད། ཉི་མ་བར་སྣང་ན་ཡོད་ན་འོད་ཟེར་ས་སྟེང་ན་ལོས་ཡོད། སྤྲིན་དཀར་མཐོངས་ལམ་ན་ཡོད་ན་སྦྲང་ཆར་འཇིག་རྟེན་ལ་ལོས་སྩོལ་། འབྲུག་སྒྲ་སྤྲིན་ཀློང་ནས་ལྡིར་ན་རྔམ་སྒྲས་བླ་འོག་བསྒྱུར་ལོས་སྣང་། འཇའ་ཚོན་ལྷ་ལམ་ནས་ཤར་ན་མཚར་སྡུག་མི་ཡུལ་ལ་ལོས་གནང་། རླུང་བུ་སྟོང་དབྱིངས་ནས་ལྡང་ན་རྩི་མགོ་སྤང་གཞོངས་ནས་ལོས་གཡོ། རྫ་ཁོག་ཆུ་གཏེར་གྱིས་ཕྱུག་ན་རྫ་སྟེང་རྩི་ཏོག་ངང་ལོས་འཁྲུངས། མེ་ཏོག་སྤང་ཐང་ནས་བཞད་ན་བུང་བ་རྒྱང་རིང་ནས་ལོས་ཐོན། འོ་མ་མཁར་ཟངས་སུ་གཏམས་ན་ངད་ཁ་ཕྱོགས་ཀུན་ཏུ་ལོས་ཁྱབ།
ཉེ་ཆར་ཧི་བོན་ཟིན་བྲིས་ཚང་གི་ཟིན་བདག་པ་ཁ་ཤས་ཀྱིས་སྤེལ་བའི་སྙན་ངག་དང་འབོལ་རྩོམ་སྐོར་ཞིག་གིས་ཧི་བོན་ཟིན་བྲིས་ཚང་གི་དེང་རབས་རྩོམ་རིག་གི་ལྷིང་འཇགས་དཀྲོག་བཞིན་འདུག དེ་ནི་དངོས་ནས་དགའ་འོས་པ་ཞིག་རེད། ཁྱུང་སྨྱུག་མཛེས་ལགས་ཀྱང་སྨྱུག་ཚོགས་དེའི་ཁྲོད་ཀྱི་གཅིག་ཡིན་ལ། ལ་རྒྱ་དང་སྤོབས་པ་གཟེངས་སུ་བཏེགས་ཏེ་ལམ་བུ་དེར་ཞུགས་ནས་ཀྲོང་ངེར་འགྲེང་བཞིན་ཡོད། རེ་བ་ཞིག་ལ། འདི་ལྟར་ང་ཚོ་ལག་རྡང་གཅིག་སྦྲེལ་གྱིས། དཔུང་བ་མཉམ་གཤིབ་ཀྱིས་ལམ་ལ་ཆས་ན། ནམ་ཞིག་གི་དུས་བཤུལ་ལམ་དུ་ཞབས་རྗེས་མངོན་གསལ་དོད་པོ་ཞིག་འཆར་ཡོང་གི་ཡིན་པས། སྨྱུག་མཛེས་ཁྱོད་མུ་མཐུད་གསར་རྩོམ་གྱི་ལས་ལ་གཞོལ་ཏེ་འདི་ལྟ་བུའི་དོན་ལྡན་གྱི་རྩོམ་ཡིག་གང་མང་འབྲི་རྒྱུ་ནི་སྐུ་དྲིན་ཆེ་ཞེས་འབོད་བརྡ་བཏང་བ་ཡིན་ལགས།