གཤེན་གླུ་ཚངས་པའི་དེའུ་དབྱངས།

ལུང་རྟོགས་ཡོན་ཏན་སྤྲིན་དཔུང་འཁྲིགས་པ་ལས།།

ཟབ་རྒྱས་ལེགས་བཤད་མཆོག་ལྔ་དབྱངས་ཀྱི་དཔལ།།

དགོངས་པའི་མཛོད་འཆང་སྡེ་ལ་འདོམས་པའི་གཤེན།།

གསང་མཆོག་རྒྱ་མཚོའི་ཚོགས་ལ་དེ་པ་ཧོ།།

གོང་གི་ཐུགས་གསང་ནགས་ལས་འོང་པ་ཡི།།

སྐལ་བཟང་ཡིད་ལ་བདེ་ཆེན་གཉུག་མའི་རོ།།

འཛད་མེད་དཔལ་སྟེར་རྒྱུད་གསུམ་ཚངས་པའི་གླུ།།

ཐོས་འདིས་དགའ་བའི་ཉམས་འགྱུར་དབྱངས་སུ་ལེན།།

ཀུན་གཞི་ལྷུན་གྲུབ་དྭངས་པའི་མཁའ་དབྱིངས་སུ།།

སྣང་སྟོང་ཉི་ཟླའི་རོལ་གར་སྒེག་པ་ཡི།།

དབང་དང་འཕྲིན་ལས་དོན་གཉིས་འབྱུང་བའི་མཛོད།།

གཞི་ཉིད་ཡེ་སངས་རྒྱས་པའི་བཀོད་པ་ཤར།།

སྐྱེ་འཆི་དག་པ་སྐུ་གསུམ་རྒྱལ་བའི་ཞིང་།།

གཟུང་བའི་ཐབས་དྲུག་ཚོགས་ཀྱི་འཁོར་ལོ་བཤམས།།

ཕྲ་མོའི་ལྷ་སྐུ་དགའ་བཞི་ཟུང་འཇུག་སོགས།།

ཐར་སྨིན་གྲོལ་བས་མཁར་འཕུར་མངོན་སངས་རྒྱས།།

སད་གཏོར་འབྱམས་འཁྲང་བསྒྲལ་བ་མཆོག་གི་སྐུ།།

གསང་ཆེན་གསང་བའི་ཡེ་ཤེས་ལྷག་གིས་འཆར།།

མཁྱེན་བརྩེའི་ཕུང་པོ་ཡོན་ཏན་རྒྱ་མཚོའི་མཛོད།།

དོན་དྲུག་དབྱིངས་གྲུབ་འབྲས་བུ་རྫོགས་སངས་རྒྱས།།

གཞི་ལམ་འབྲས་གསུམ་གོར་མོའི་བུ་རམ་བཞིན།།།

རྨད་དུ་འབྱུང་བ་ཀུན་ནས་མངར་བས་མཚོན།།

གསང་ཆེན་གསང་བ་དགུ་ལས་འཕར་རོ་ཞེས།།

གདམས་ཟབ་དབྱུ་གུས་བསྐུལ་བའི་རྔ་སྒྲ་སྙན།།

འཇིག་རྟེན་འོད་སྐུར་བཞེངས་པའི་ཐབས་ཕུལ་བྱུང་།།

 ཨ་མའི་ངག་རྟ་བུ་ལ་འཕོས་པའི་རྒྱུན།།

སྐྱེ་འཆི་རྨི་ཉལ་སངས་རྒྱས་ངང་སྒུག་འཁྲང་།།

ཐར་པར་འདོད་པ་དག་གི་མཛའ་བཤེས་ཡིན།།

དེ་སྐད་དགེ་ལེགས་རོལ་མོ་ཐོས་པའི་སྐལ།།

མཁའ་འགྲོ་རྒྱ་མཚོའི་དྲིན་ལས་བྱུང་བ་ཡི།།

གསལ་བྱེད་ཉི་མའི་དཀྱིལ་འཁོར་མཐོང་བའི་མིག།

ཕྱེས་འདིས་རྒྱུད་འཛིན་ཚོགས་རྣམས་སླར་ཡང་རྒྱལ།།

༢༠༡༡/༡༠/༣༠ཉིན་མ་རྒྱུད་དགོངས་འགྲེལ་གཞུང་ཁྲིད་རྫོགས་རྗེས་སུ་ཉིན་དེར་བྲིས་སོ།།