4

推荐

                                        ཨ། 

སྣང་སྲིད་རྒྱན་དུ་ཤར་བའི་ལྡིང་ཁང་དུ།།

རིག་པའི་སྟོང་དབྱལ་འཚོ་བའི་རོལ་མོ་དཀྲོལ།།

དངོས་ཀུན་རླབས་སུ་རྩེན་པའི་དབྱིངས་རིག་གིས།།

ཤེས་བྱ་རོལ་པ་བྱེ་བ་གཤིས་སུ་གཟུང་།།

ཀུན་རྟོག་ཆུ་འཛིན་དཀྲིགས་པའི་ཐུ་འོག་ན།།

མ་ལོ་ཉིན་བྱེད་གཞོན་ནུ་རང་སྣང་གི།།

འོད་ཟེར་དབྱངས་རྟ་དུ་མའི་རྒྱ་ལ་འཐུམ།།

བུ་ཆུང་ས་མཐའ་འགྲེམ་པའི་མཐའ་མ་རེག།

རང་གཟུགས་དགྲ་རུ་ཞེན་པའི་གདོང་ལྔ་པ།།

ཐོག་མའི་རྒན་མོ་ལང་བའི་ཆོ་གར་རྩོམ།།

འདུ་བྱེད་རྣམས་ཤེས་རྒྱལ་འཁོར་འབུམ་སྡེས་ཀྱང་།།

རིཊ་ཀྱི་ཕ་གཞིས་དྲོན་མོ་བཙན་གྱིས་གཟུངས།།

 རྟོག་ཚོགས་ཁྱི་རྒོད་ཨ་ཡིག་ཞག་པ་ཡིས།།

འདོགས་པའི་འདུ་བྱེད་ཤ་ཚུགས་བསྲང་བ་ན།།

ཕྲ་རགས་དྲན་པའི་ཧབ་ཆ་རེ་རེས་ཀྱང་།།

སེམས་ཀྱི་གསང་བ་དུས་གསུམ་བར་དུ་འཕྱོ།།

དྲན་པའི་གཉུག་ཐག་ཚོགས་དྲུག་དབལ་གྱིས་བཅད།།

 བསམ་པའི་འོ་མཚོ་ཆགས་སྡང་དབྱུ་གུས་བསྲུབས།།

 ལྷིང་འཇགས་བསམ་གཏན་ཆར་གྱི་ཟེགས་མ་རེ།།

རྟོག་འཛིན་སེམས་ཀྱི་མེ་འུབས་བར་ན་ལྷུང་།།

དང་པོའི་རྦུབ་ཆུ་གཡང་གཟར་ངོགས་སུ་བསྐྱོད།།

བར་དུ་གཙང་པོ་དལ་འབབ་གཞུང་ནས་བརྒྱུད།།

ཐ་མའི་མཚོ་མོ་གཡོ་མེད་ལྟེམ་གྱིས་འཁྱིལ།།

མ་བུ་ལྷན་འཛོམ་ཞིག་གི་སྟ་གོན་ཡིན།།

དགུང་སྔོན་མཛེས་མའི་ཆུ་འཛིན་གཡང་ལ་བུད།།

སྣང་བྱེད་ཉི་ཟླ་ལྷ་ཡི་ལམ་དུ་བརྩེན།།

འཇའ་ཚོན་རོལ་དབྱངས་རང་གི་རྒྱན་དུ་སྒེག།

མ་བུ་དགྱེས་འཛོམ་བྱེད་པའི་དགའ་སྟོན་རྩོམ།།

རྟོག་ཚོགས་འབངས་ཀྱི་གྱེན་ལོག་ཞི་འཇགས་བྱེད།།

རིགས་ཀྱི་རྒྱལ་སྲས་རང་གི་ཁྲི་ལ་བརྩེན།།

མ་རིག་དམག་གི་དཔུང་ཚོགས་ཕྱེ་མར་བརླགས།།

སྣང་སྲིད་ཆབ་འོག་གཅིག་གི་དར་ཆ་བསྒྲེང་།།

ཁྱེད་ཞལ་དགུང་གི་མཐའ་རྒྱ་མ་ཆོད་པའི།།

རྒོད་པོ་སྤུ་གྲི་རེག་པའི་གཤོག་རྒྱང་འཐོར།།

ལྟ་བ་ཁྱུང་ཆེན་རླབས་ཀྱིས་བསྐྱོད་པ་ལས།།

རྟོག་བློ་བྱ་ཕྲན་ཁྲོན་པའི་སྦལ་པ་མཐོང་།།

མེད་མུག་དབུལ་པོའི་ཚོགས་ཀྱི་རིགས་པ་ལས།།

སྣང་སྲིད་རྒྱན་དུ་རྫོགས་པའི་འབྱོར་ལྡན་ཞིག།

ཁ་བའི་ལྗོངས་ཀྱི་གཡུ་ཤུག་འདབ་རྒྱས་ཁྲོད།།

ཁྱུ་བྱུག་སྔོན་མོའི་མགྲིན་དབྱངས་སྙན་སོང་ལོ།།