མཁའ་ལ་འཕྱུར་བའི་སེམས་ཀྱི་རླབས་རིས།

ཟབ་རྒྱས་ཤེས་བྱ་ཡངས་པའི་མཚོ་ངོགས་ལས།།

གཞུང་དོན་དགོས་འབྱུང་བདག་གིར་བྱེད་པ་ལ།།

ཐོས་བསམ་གཟེངས་ཆེན་དལ་གྱིས་བསྐྱོད་པའི་རླབས།།

རྟགས་ཚུལ་རིགས་པའི་དབྱངས་སྙན་ནོར་གྱི་དཔལ།། 

འདོད་དོའི་ངག་གིས་ཁས་ལེན་རབ་བྱེདཅིང་།།

རྟགས་དང་ཁྱབ་པའི་རྒོལ་བ་སུན་ཡང་འབྱིན།།

རང་གཞུང་བཙོ་མའི་གསེར་ལ་སྦྲུན་པ་ཡི།།

ཤེས་བྱའི་སྣང་བརྙན་བསྐྲུན་པའི་དམ་བཅའ་ཡིན།།

ཇི་སྙེད་ཤེས་བྱ་ནམ་མཁའི་ཆོ་འཕྲུལ་ལ།།

གཞིགས་པའི་བློ་གྲོས་ཁྱུང་གི་གཤོག་རླབས་ཀྱིས།།

སོ་སོར་རྟོགས་པའི་མཐུ་ལ་དབང་ཕྱོགས་པའི།།

རྩོད་ངག་རིགས་པའི་གླུ་དབྱངས་རབ་སྙན་སྒྲོག།

བསྒྲུབ་དང་སུན་འབྱིན་རྣོ་ལྕགས་ལས་གྲུབ་པའི།།

ལུང་གི་མདའ་མོ་རིག་པའི་གཞུར་སྐྱོན་ཏེ།།

ལོག་རྟོག་ཕས་རྒོལ་ལྐོག་མར་འབྱིན་པ་ལ།།

རྒྱལ་ཀུན་དགྱེས་པའི་རོལ་མོ་ཅི་ཡང་བརྡུང་།།

ཕྱོགས་ཀྱི་འཁོར་ལོ་བསྐོར་བའི་ཟིལ་ཤུགས་ཀྱིས།།

རྟགས་ཀྱི་སུན་འབྱིན་སྙིང་གི་སྲུབ་ཀར་ཡལ།།

ཁྱབ་པའི་མེ་ལྕེ་མཆེད་པའི་དབལ་རྔམ་ལ།།

ལན་གྱིས་ཟློག་མིན་རྒོལ་ངན་ཧད་དེར་ལུས།།

ཚུལ་གསུམ་འཕེན་པའི་ཐལ་བ་ལས་འོང་པའི།།

 འཁོར་གསུམ་རྒྱོགས་རྡོ་འགས་པའི་རྔམ་ཟིལ་ལ།།

ལན་གསུམ་གོ་ཆ་དབེན་པའི་བྱིས་པ་ཚོར།།

དཔྱད་གསུམ་རྣམ་པར་དག་པའི་ངེས་པ་སྦྱིན།།

དགག་བསྒྲུབ་རིགས་པའི་གསང་ཀ་ནས་མཆེད་པའི།།

ཐོས་བསམ་རྒྱུ་བ་དག་པའི་ལམ་སྟེགས་སུ།།

 རྒྱལ་བས་འགྲོ་རྣམས་དགྱེས་བཞིན་འགོད་པ་ན།།

ཚུལ་འདི་ལོག་པར་ཞེན་པ་ཐོས་ཆུང་གཤིས།།

གཏོལ་མེད་མུན་པའི་ཁུང་བུར་གླེན་སྒོམ་གྱིས།།

སྒོམ་ཆེན་ཕྱི་བའི་སྟ་གོན་བྱེད་པ་ལས།།

དངོས་ཀུན་སྣང་བ་འོ་ཆུ་འབྱེད་པའི་རྩི།།

དགག་སྒྲུབ་བསྟན་པའི་སྙིང་པོ་ཁོ་ནར་གསུངས།།

རྒྱལ་བསྟན་སྲིད་མཐར་རྒྱུ་བའི་ཆོ་ག་ལ།།

ཐོས་བསམ་ངང་མོའི་འགྲོས་ཀྱིས་སྐྱོང་བ་ཡི།།

འཆད་རྩོད་སྦྲང་རྩིའི་རྒྱུན་གྱི་དགའ་སྟོན་དུ།།

སེམས་དཔའི་སྤྱོད་པ་ཡང་དག་འདི་ལས་ཅི།།

རིགས༵་པའི་ལ་ལུང་བསྒྲོད་པ་དམ་པའི་སྲོལ།།

འཛིན་པའི་རྗེས་བྱེད་གདམ་ཟམ་དབྱངས་སྙན་གྱི།།

དགའ་སྟོན་སྐྱེ་རྒུའི་དཔལ་དུ་བསྐྲུན་པ་ཡི།།

སྒྲ༵་ཆེན་དྷི་སྐད་ཁྲོད་ནས་ཐོལ་གྱིས་བྲིས།།

 ༢༠༡༡ལོའི་རིགས་སྒྲའི་སྐབས་སུ། ༢༠༡༡/༩/༢༢ཉིན་བྲིས།།