དཔལ་གྱི་སྟེང་ཆེན།

བསོད་ནམས་སྐལ་བས་ས་ལ་འཕོས་པ་སུམ་རྩེན་ཡུལ་གྱི་དུམ་བུ་སྟེ།།

རྨ་བྱའི་མགྲིན་མདངས་ཟླ་བའི་གཙུག་རྒྱན་ནགས་ཀླུང་དགུང་གི་ཀ་བ་ཅན།།

ཞོ་གསར་སྤུང་དང་གསེར་འོད་རི་ཚོམ་ལག་ལྡན་སོ་ཡི་ཕྲེང་བ་བསྟར།།

དུངས་སེམས་ཀྱིས་བསྐྲུན་དཔལ་གྱི་ཞིང་ཁམས་ཨེ་མ་དགེ་མཚན་ཅི་ཡང་འབར།།

སྤེན་ནེ་རི་ཡི་རྟ་ནོར་ལུག་ཁྱུ་རྒུ་ཚིགས་ངོས་ཀྱི་སྐར་ཚོགས་བཀྲ།།

རྟ་ཤོད་པད་མོའི་འབྲུ་དྲུག་ལྗོན་ཕོན་མཛེས་མའི་ལན་བུ་རྣམ་པར་འཕྱང་།།

ཟལ་མོ་སྒང་གི་ཅང་ཤེས་སྒ་ཁྲིད་འདོད་རྒུ་གཡང་གི་དམུ་ཐག་བྲེས།

དཔལ་འབྱོར་སྟེང་གི་ཉ་མོ་མཚོ་འཁྱིལ་བཀྲ་ཤིས་རྟགས་ཀྱི་རི་མོ་བྲིས།།

གཡུ་ལུང་ཤེལ་བྲག་ཟླ་བོར་འབོད་པའི་གྱིམ་ཤོད་རྫོང་དྲུག་ཡུལ་ལྗོངས་མཛེས།།

བྲག་དམར་རི་མདུན་གསང་བའི་སྒྲུབ་གནས་མཐུ་བྱིན་སྟོང་གི་དབལ་ཁ་འབར།།

སྤུ་ཧྲོག་མཚོ་མོའི་རྨ་གཡང་གཏེར་འཛིན་ཀླུ་དབང་བུ་མོའི་ཁེངས་པ་འཕྲོག།

སྤུ་རྒྱལ་གངས་དཀར་ཞུང་ཞང་སྒོ་པའི་སྙིང་ཁར་འབར་བའི་ལ་རྒྱ་ཡིན།།

ཐ་གསུམ་རྩྭ་ཐང་སྤང་ལྗོངས་སྔོན་མོ་དཀར་ནག་ཕྱུགས་ཀྱི་ཕ་ཁྱིམ་དང་།།

ཤོད་གཉིས་ནས་ཞིང་གསེར་མདོག་སྙེ་མའི་རྒྱ་མཚོ་འཁྱིལ་བའི་གུར་ཁང་སྟེ།།

་གསུམ་ཞིང་འབྲོག་དཔལ་འབྱོར་སྟོང་གི་འཕེལ་ཁ་དར་བའི་དགའ་སྟོན་དུ།།

ལུགས་གཉིས་འོ་མའི་རླབས་ཀྱི་འཁྲི་ཤིང་འཛིན་མའི་རྒྱན་དུ་ཡང་ཡང་ངོམ།།

བརྗིད་ཆགས་ས་འཛིན་སྤུ་རྒྱལ་གངས་རིས་ལྷུན་པོ་ཏི་སེའི་ངོ་མཚར་ཕམ།།

རབ་མཐོའི་ཏི་ཆགས་རི་རྔུ་གངས་ཀྱིས་ཇོ་མོ་གླང་མའི་མཛེས་པ་ཟུམ།།

མུ་འབྲེལ་རྟ་ཤོད་ཟལ་མོ་སྒང་གིས་ཁུ་ནི་རིའི་ཕྲེང་དམན་སར་འགོད།།

སྤུ་ཧྲོག་མཚོ་མོའི་རླབས་ཕྲེང་དེས་ཀྱང་མ་ཕམ་མཚོ་ལ་ལན་མོ་བྱེད།།

སྒྱུ་རྩལ་རས་པའི་ཤར་སྐོར་གཅིག་གིས་འཛམ་གླིང་ཡུལ་གྲུ་ཆུང་ངུར་བྱེད།།

སོར་མོའི་གར་སྟབས་ལྡོང་མདོའི་ལྷ་རིས་བི་ཤྭ་ཀརྨའི་ཕྱག་ལས་བླངས།།

ཡིག་རིས་ངོ་མཚར་ཁྱུང་བྲིས་ཞེས་པས་སམ་བོ་ཊ་ལ་སྐྱེངས་པ་སྟེར།།

དགེ་མཚན་རི་མོ་བསམ་ཞིང་བམས་ན་ཁྱོད་ལས་ལྷག་པའི་འཇིག་རྟེན་གང་།།