གཡུང་དྲུང་བསྟན་པ་རྒྱས་པའི་ལྷ་རྒྱལ་ལོ།།

བསོད་ནམས་ཡེ་ཤེས་ཚོགས་ཀྱི་རྫིང་བུ་ལས།།

གདུལ་བྱ་པད་ཚལ་རྒྱ་མཚོའི་གཉེན་ཅིག་པུ།།

ཐེག་སྒོ་འོད་ཟེར་འབུམ་གྱི་མཛོད་འཛིན་པ།།

འདྲེན་མཆོག་སྣང་བའི་དཔལ་སྟེར་གཤེན་རྒྱལ་ཞབས།།

འཛད་མེད་འཁོར་བ་སྡུག་བསྔལ་འབར་བའི་མེར།།

དུག་ལྔའི་འབུད་ཤིང་ཐལ་བར་བརླག་བྱེད་པའི།།

རྨད་བྱུང་སྒོ་མཛོད་སྡེ་ལྔ་ལུང་རྟོགས་བོན།།

གཡུང་དྲུང་བསྟན་པ་རྒྱས་པའི་ལྷ་རྒྱལ་ལོ།།

སྟོང་གསལ་ཟུང་འཇུག་དབྱིངས་རིག་དགའ་མའི་ཀློང་།།

བརྩེན་བའི་འཁྲུལ་བློ་ཆུ་འཛིན་སྟུག་པོའི་དཔུང་།།

འཇིལ་བྱེད་རྒྱུ་འབྲས་ཐེག་པ་རིམ་དགུའི་བོན།།

གཡུང་དྲུང་བསྟན་པ་རྒྱས་པའི་ལྷ་རྒྱལ་ལོ།།

ཐར་མེད་འཁོར་བ་བཙོན་རའི་སྒོ་འཕར་དམ།།

སྡུག་བསྔལ་ལྕགས་སྒྲོག་གསུམ་གྱིས་སྟོབས་ཤུགས་བཅིང་།།

ཡེ་ཤེས་དཔའ་བོའི་དམག་དཔུང་གསང་གསུམ་བོན།།

གཡུང་དྲུང་བསྟན་པ་རྒྱས་པའི་ལྷ་རྒྱལ་ལོ།།

མཐའ་བྲལ་དབུ་མ་ཆེན་པོར་ལ་ཡང་བཟླ།།

སྟོང་ཉིད་ཁྱབ་དབལ་ཆེན་པོའི་གཞི་རྨིང་བལྟ།།།

འདོད་བློ་དགོས་རྒུ་འཛོམས་པ་མདོ་སྔགས་བོན།།

གཡུང་དྲུང་བསྟན་པ་རྒྱས་པའི་ལྷ་རྒྱལ་ལོ།།

མ་བཅོས་ལུགས་སུ་བཞག་པའི་མཚོ་འཇིངས་སུ།།

ཚེ་གཅིག་གཏེར་གྱི་མཆོག་ལ་མངའ་དབང་ཞིང་།།

གདོས་ལུས་འོད་ཀྱི་ལྷམས་སུ་ཐིམ་བྱེད་པའི།།

གཡུང་དྲུང་བསྟན་པ་རྒྱས་པའི་ལྷ་རྒྱལ་ལོ།།

ལུགས་གཉིས་ཤེས་བྱའི་སྣང་བརྙན་ཐ་དད་དུ།།

སྤང་བསྒྱུར་གྲོལ་དང་སྒྲུང་ལྡེའི་བོན་གྱི་སྒོ།།

འདི་ཕྱི་ཕན་བདེའི་དཔལ་ལ་འགོད་པའི་བོན།།

གཡུང་དྲུང་བསྟན་པ་རྒྱས་པའི་ལྷ་རྒྱལ་ལོ།།

༢༠༡༠ *༣*༤