འཇོལ་མོ་དཀར་མོ།
གངས་རིའི་དབུ་རྩེ་མཐོ་ས་ནས།།
མཁའ་དབུགས་འབག་བཙོག་བྲལ་ས་ནས།།
འབྱུང་བཞིའི་ཚ་གྲང་སྙོམས་ས་ནས།།
དུས་ཀྱི་ཅོང་བརྡ་སྙན་མོ་ཞིག།
བལྟས་ན་ཁྲ་ཆུང་མིག་གི་རྒྱན།།
ཉན་ན་སྒྲ་འཛིན་རྣ་བའི་བཅུད།།
བསམ་ན་གངས་དཀར་སེམས་ཀྱི་གཏན།།
མཐོ་སྒང་བུ་མོ་གླུ་སྐད་དེ།།
རྣ་བའི་གསང་ལམ་ནས་རྒྱུད་དེ།།
རྙིང་རོལ་ཀླད་པའི་རྒྱ་སྲུབས་བརྟོལ།།
དམར་ཆུང་སྙིང་གི་དཀྱིལ་དུ་སིམ།།
ལུས་སེམས་འདི་ཡི་ཚོར་འདུ་དཀྲུགས།།
དུས་རབས་གསར་པའི་མི་མོ་ཞིག།
དུས་རབས་གསར་པའི་གར་སྟེགས་སུ།།
རིགས་མཐུན་ཆོལ་གསུམ་སྤུན་ཟླ་ལ།།
རིགས་ཞེན་ལྷ་ཆབ་གཏོར་གྱིན་འདུག།
སྲོལ་རྒྱུན་བཟང་པོའི་ཆས་གོས་གཟབ།།
དྲུག་འགྱུར་ངག་གི་དབྱངས་རྟ་དང་།།
ལྡེམ་ལྡེམ་ལུས་ཀྱི་ཉམས་འགྱུར་ལ།།
ཁྱད་དུ་འཕགས་པའི་སྒྱུ་རྩལ་དངོས།།
འཇོལ་མོ་དཀར་མོའི་ངག་ལམ་ནས།།
རྟོགས་པར་དཀའ་བའི་གསང་བ་དངོས།།
བརྗེད་པར་དཀའ་བའི་སླབས་བྱ་དངོས།།
སྨྲ་མི་ཤེས་པའི་སྒྱུ་རྩལ་དངོས།།
ལྗང་ནག་ཀླད་པའི་ལྟ་བ་ཡི།།
འོག་ན་འཚོ་བའི་སྐྱེ་མ་ཚོའི།།
ལས་དབང་བདེ་སྡུག་གླེང་གིན་འདུག།
འདྲ་མཉམ་རྡོ་རིང་སློང་གིན་འདུག།
༢༠༡༣ ༩ ༢༡
