ང་ཚོ་སད་ན་བསམ།
རྨོངས་དད་དྲེག་ཁེག་ཆགས་པའི་ཐུ་འོག་ན།།
ཡུན་རིང་གཉིད་ཤོར་ང་ཚོ་སད་ན་བསམ།།
གནའ་བོའི་སྲོལ་རྒྱུན་སྐྱེས་བུ་བཞིན་བཟང་ལ།།
དེང་རབས་རིག་པ་མནའ་མར་བསུས་ན་བསམ།།
སྙིང་རྗེ་ངག་ལ་བྱན་པའི་གདོང་དམར་བའི།།
མེས་པོའི་རྒྱུད་འཛིན་ང་ཚོ་སད་ན་བསམ།།
ཡོད་ཚད་ཕ་མར་སྒོམ་པའི་སྙིང་སྟོབས་ཅན།
དད་པའི་ཁོལ་པོ་ཙམ་ཞིག་མིན་ན་བསམ།།
རྣམ་ཤེས་ཁྲི་མ་འབུམ་གྱིས་སྲུང་ཡོད་པའི།།
ལོ་རྒྱུས་ཅན་གྱི་ང་ཚོ་སད་ན་བསམ།།
ཐལ་མོ་ཟླུམ་ཙམ་ཟླུམ་ཙམ་མ་ཡིན་པར།།
ཕ་སྐད་མ་ཡིག་འདི་ལ་འབད་ན་བསམ།།
ཁུག་ཆུང་ཞིག་ན་ཡུན་རིང་སྒོམ་བཞུགས་པའི།།
ཁྲོན་པའི་སྦལ་པ་ང་ཚོ་སད་ན་བསམ།།
ཕྱི་རོལ་རྣམ་པ་གསར་བའི་ཁོར་ཡུག་ལ།།
རྣམ་དཔྱོད་རིག་པས་མིག་བཤེར་བྱས་ན་བསམ།།
འདྲ་མཉམ་ལམ་ཁར་རྡོག་སྣེ་མ་འཁྱོར་བའི།།
དམུ་ལོང་ཁྱུ་ཚོགས་ང་ཚོ་སད་ན་བསམ།།
རྣམ་གསར་རིག་པའི་ལྡེ་མིག་ཅིག་བཙལ་ནས།།
མཁྲིགས་བཟུང་ཀླད་པའི་ལྕགས་ཟྭ་འབྱེད་ན་བསམ།།
ལྟོ་རྒྱབ་ཆེད་དུ་ཉིན་འདུར་མཚན་འདུར་བའི།།
སྤུ་མེད་ཕག་པ་ང་ཚོ་སད་ན་བསམ།།
ཟ་གོས་ཙམ་ལ་མགོ་བོ་མི་འཁོར་བར།།
གནའ་དེང་རིག་ཟུང་ལམ་སྣེ་ཟིན་ན་བསམ།།
ཉ་ཉུང་རྩམ་ཕྱུར་འདྲེས་མའི་རི་ཁུག་ན།།
བསམ་མེད་སྨྱོ་པ་ང་ཚོ་སད་ན་བསམ།།
ཚན་རྩལ་རིག་པའི་གསོས་སྨན་ལ་བརྟན་ནས།།
སེམས་ཁམས་སྙོམ་འགྲིག་ཐབས་ལམ་འབད་ན་བསམ།།
འཁྱར་མ་འཁྱོར་གྱིས་གོམ་པའི་ཚུག་ཀ་ཅན།།
ལད་མོར་གོམ་པའི་ང་ཚོ་སད་ན་བསམ།།
གསར་དད་མི་ཆེ་རྙེང་ཞེན་མི་མང་བར།།
རིག་པས་རིག་པའི་ལམ་ལ་སྐྱོད་ན་བསམ།།
༢༠༡༥/༣/༣༡/
