འབྲོག་མོ།
ཁྱུང་མུ་ཝེར།
གངས་རི་དཀར་པོའི་མར་གཤམ་ན།།
སྦྲ་ནག་སྨུག་པོའི་ཐུ་འོག་ན།།
གནག་ནག་ལྷས་རའི་འདབས་རོལ་ན།།
ཨ་ཅེ་འབྲོག་གི་བུ་མོ་ཡོད།།
རྫ་རི་སྨུག་པོའི་གཡས་མཆན་ན།།
བེའུ་ལུག་མགོ་རྩེད་འཁྲབ་ས་ན།།
དཀར་འཇམ་ཕྱིང་ཞུའི་ཐུ་འོག་ན།།
ཨ་ཅེ་འབྲོག་མོའི་ལང་ཚོ་ཡོད།།
སྤང་རི་སེར་པོའི་གཡོན་ཟུར་ན།།
ལྷ་འབྲི་གྭ་མའི་ཨོག་ཞབས་ན།།
འོ་མའི་རྒྱ་མཚོ་སྐྱིལ་ས་ན།།
ཨ་ཅེ་འབྲོག་མོའི་ཟུར་མིག་ཡོད།།
དབྱར་གྱི་དཔལ་ཡོན་རྒྱས་དུས་ན།།
སྣ་མང་མེ་ཏོག་སྐྱིད་ཚར་ན།།
གསེར་སྦྲང་གཡུ་སྦྲང་གཤོག་འོག་ན།།
ཨ་ཅེ་འབྲོག་མོའི་ཞལ་རས་ཡོད།།
སྟོན་ཆུ་སྔོ་མོའི་འགྲམ་ངོགས་ན།།
སྣ་མང་ལོ་ཏོག་ཚར་གསེབ་ན།།
ལྗོན་ཤིང་ལོ་མའི་གྲིབ་འོག་ན།།
ཨ་ཅེ་འབྲོག་མོའི་སྒེགས་ཉམས་ཡོད།།
དགུན་གསུམ་ལྷགས་པའི་ཧྲག་བར་ན།།
གངས་རླུང་འཚུབ་མའི་མཐོ་སྒང་ན།།
ཁ་བའི་འདབ་མའི་འོག་རོལ་ན།།
ཨ་ཅེ་འབྲོག་མོའི་ལས་དབང་ཡོད།།
དཔྱིད་ཀྱི་ལྗོན་བུ་འབུས་དུས་ན།།
ཁུ་བྱུག་སྐད་སྙན་ཁྲོལ་དུས་ན།།
གངས་མ་ཆར་གྱི་འདབ་འོག་ན།།
ཨ་ཅེ་འབྲོག་མོའི་གླུ་སྐད་ཡོད།།
མཁྲེཌ་བཟུང་ཀླད་པའི་རྒྱ་སྲུབས་ན།།
དཀའ་ཚེགས་དུ་མའི་བར་གསེང་ན།།
འདྲ་མཉམ་མེད་པའི་ཁྲིམས་འོག་ན།།
ཨ་ཅེ་འབྲོག་མོ་འཚོ་བཞིན་ཡོད།།
༢༠༡༣/༩/༢༣
发自我的 iPhone
