དུས་རབས་གསར་པའི་མི་གཤིས།
ཁྱུང་མུ་ཝེར།
༧ཉེར་གཅིག་དུས་རབས་གསར་པའི་སྤྱི་ཚོགས་ཁྲོད།།
ཚན་རིག་དངོས་གཙོ་ཡར་རྒྱས་བཟང་ན་ཡང་།།
གསར་སྐྱེས་གཞོན་ནུ་འགའ་ཡི་སྤྱོད་ལམ་དག།
མཐོང་བ་ཙམ་གྱིས་སེམས་ལ་ན་ཟུག་ཆེ།།
༧ཐོབ་པར་དཀའ་བའི་དལ་འབྱོར་འཕྲོ་བརླག་གཏོང་།།
འཕྲད་པར་དཀའ་བའི་བོན་ལ་སྒྲོ་སྐུར་འདེབས།།
མཇལ་བར་དཀའ་བའི་སློབ་དཔོན་ཐུགས་ཉིད་དཀྲུག།
དུས་རབས་གསར་པའི་མི་ཡི་གཤིས་འདི་སྐྱོ།།
༧འཐོབ་ཆེན་བླ་སྤྲུལ་བསྟན་ལ་ཤ་ཞེན་དབེན།།
མགོ་འཛིན་དཔོན་པོ་སྤྱི་སེམས་རི་བོང་རྭ།།
འབྱོར་ལྡན་ཕྱུག་པོ་དགེ་རྩར་གཏོང་ཕོད་ཆུང་།།
དུས་རབས་གསར་པའི་མི་ཡི་གཤིས་འདི་སྐྱོ།།
༧མཐོ་བ་རྣམས་ལ་ངོ་བསྟོད་སྦྲང་ཆར་འབེབས།།
རང་མཉམ་རྣམས་ལ་འགྲན་སེམས་གློག་དམར་འཁྱུག།
དམན་པ་རྣམས་ལ་རྡུང་བརྡེག་ཐོག་སེར་འབེབས།།
དུས་རབས་གསར་པའི་མི་ཡི་གཤིས་འདི་སྐྱོ།།
༧འབྱོར་ལྡན་ཕྱུག་པོ་མཐོང་ཚེ་འཛུམ་གྱིས་བསུ།།
རྒྱུ་མེད་དབུལ་པོ་མཐོང་ཚེ་བཞིན་ངན་བསྟན།།
སྒོར་མོའི་ཆེད་དུ་ཕ་ནོར་ཕྱིར་འཚོང་བྱེད།།
དུས་རབས་གསར་པའི་མི་ཡི་གཤིས་འདི་སྐྱོ།།
༧ཡོན་ཏན་པ་ལ་གཡོ་སྒྱུ་ཅན་དུ་ཟེར།།
ཟོབ་པོ་འཁྲབ་མཁན་གཏན་གྱི་སྐྱབས་གནས་འཛིན།།
བསླུ་བྲིད་མཁས་ཅན་ལམ་སྟོན་སློབ་དཔོན་བྱེད།།
དུས་རབས་གསར་པའི་མི་ཡི་གཤིས་འདི་སྐྱོ།།
༧ཕྱི་དཔུང་དགྲ་དང་འཕྲད་ཚེ་ཝ་མོའི་ཟླ།།
ནང་མི་གཉེན་ཉེའི་ཐོག་ཏུ་དམར་ཡག་སྟག།
དབྱེན་བསྒྱུར་ཕྲ་མ་བཅུག་ལ་ནེ་ཚོའི་བུ།།
དུས་རབས་གསར་པའི་མི་ཡི་གཤིས་འདི་སྐྱོ།།
༧བགྲེས་སོང་ཕ་ཁུ་རྩྭ་ས་རྩོད་ལ་བྲེལ།།
རབ་བྱུང་བཙུན་པ་རྒྱ་གྲོང་ཉུལ་ལ་དགའ།།
གསར་སྐྱེས་གཞོན་ནུ་ཕ་མའི་བཀའ་མི་ཉན།།
དུས་རབས་གསར་པའི་མི་ཡི་གཤིས་འདི་སྐྱོ།།
༧ལྟོ་རྒྱབ་ཆེད་དུ་གཏེར་རྫས་ཁྲོམ་ལ་གཤམ།།
རྩྭ་སའི་ཆེད་དུ་ཕུ་ནུ་གྲི་འཛིང་བྱེད།།
ཤོག་སྒོར་ཆེད་དུ་ཕ་ཆོས་གཏའ་མར་འཇོག།
དུས་རབས་གསར་པའི་མི་ཡི་གཤིས་འདི་སྐྱོ།།
༧འདུལ་ཁྲིམས་མིག་ལས་གཅེས་པའི་བཙུན་པ་དཀོན།།
མདུན་ལམ་སློབ་སྦྱོང་བརྩོན་པའི་སློབ་མ་ཉུང།།
ཕ་མར་དྲིན་ལན་འཇལ་བའི་བུ་རྒྱུད་དབེན།།
དུས་རབས་གསར་པའི་མི་ཡི་གཤིས་འདི་སྐྱོ།།
༧ཁ་ནས་ལ་རྒྱའི་སྟོང་སྐད་གཡུ་འབྲུག་འགྲན།།
དོན་གྱི་ལ་རྒྱ་མོ་གཤམ་བུ་ཡི་གྲོགས།།
མཐུན་འབྲེལ་འོད་སྣང་སྒྲིབ་བྱེད་བླ་བྲེ་དངོས།།
དུས་རབས་གསར་པའི་མི་ཡི་གཤིས་འདི་སྐྱོ།།
༧གཞོན་སྐྱེས་ཕལ་ཆེར་གཞན་རྗེས་འབྲེང་ལ་དགའ།།
དྭངས་གཙང་ཁོར་ཡུག་འཕྲུལ་གྱིས་བླ་འོག་བསྒྱུར།།
ཡངས་པའི་རྩྭ་ཐང་ལྕགས་ཀྱི་དྲྭ་བས་ཐུམ།།
དུས་རབས་གསར་པའི་མི་ཡི་གཤིས་འདི་སྐྱོ།།
༧རང་གི་ཕ་ཤུལ་སྐྱོང་ལ་རིག་པ་དབེན།།
གཞན་གྱི་ལད་མོ་བྱེད་ལ་མཁས་པའི་ཕུལ།།
རྒྱ་མིན་བོད་མིན་ཆ་ལུགས་ར་མ་ལུག།
དུས་རབས་གསར་པའི་མི་ཡི་གཤིས་འདི་སྐྱོ།།
༧དུས་རབས་གསར་པའི་མཚན་སྙན་སྒྲོགས་པ་དང་།།
དགེ་མཚན་གསར་པའི་ཁ་གཡང་འབོད་ན་ཡང་།།
མདོ་ཤོར་འགའ་ཡི་སྤྱོད་ལམ་རྣལ་མ་འདི།།
མིག་ལ་གཟན་པའི་སེམས་ཀྱིས་ན་ཟུག་གིས།།
༧མཐོན་པོའི་ཁྲི་དང་ཆེན་པོའི་གོ་ས་དང་།།
རིན་ཆེན་ནོར་དང་མཁས་པའི་མཚན་སྙན་སོགས།།
གང་ཡང་མེད་པའི་མུ་ཝེར་ཉི་རི་པས།།
དབང་མེད་མགྲིན་པའི་ལམ་ནས་ཤོར་ཏེ་ཐལ།།
