སྦྲགས་སྐད།
སྦྲགས་སྐད་དང་པོ་དབུས་གཙང་ཡུལ་ནས་དར།།
སྲོང་བཙན་རྗེ་བོའི་གཟི་བརྗིད་ཡིན་ནའང་ཆོག།།
རྒྱ་བཟའ་ཀོང་ཇོའི་ཀླད་རོ་ཡིན་ཡང་སྲིད།།
མདོར་ན་སྒྲ་གདངས་ཉམས་པའི་སྐད་ཅིག་དར།།
སྦྲགས་སྐད་གཉིས་པ་འུ་དུམ་དུས་སུ་དར།།
ལྷ་ལུང་དཔའ་བོའི་མཛད་རྗེས་ཡིན་ནའང་ཆོག།།
རྗེའི་ས་འབངས་ཤོར་སྡུག་ངན་ཡིན་ཡང་སྲིད།།
མདོར་ན་ལུང་ཚན་རེ་ལ་སྐད་རེ་དར།།
སྦྲགས་སྐད་གསུམ་པ་མདོ་དབུས་གང་སར་དར།།
དུས་རབས་གསར་པའི་ཅོང་སྒྲ་ཡིན་ནའང་ཆོག།།
སློབ་ཆེན་སློབ་མའི་ཆེད་ལས་ཡིན་ཡང་སྲིད།།
མདོར་ན་ར་མ་ལུག་གི་སྐད་ཅིག་དར།།
མཐོ་པོ་གསེར་ཁྲིའི་ཁ་ལ་སྦྲགས་སྐད་བཞུགས།།
དཔོན་གྱི་གོ་སའི་ཁ་ལ་སྦྲགས་སྐད་རྔམ།།
ཕྱུག་པོའི་ནོར་རྫས་གསེང་ན་སྦྲགས་སྐད་གབ།།
གང་ས་གང་ལ་སྦྲགས་སྐད་འཚང་ནས་ཡོད།།
སྦྲགས་སྐད་ཨ་ཕའི་ངག་ནས་མཆེད་ཀྱིན་འདུག།།
སྦྲགས་སྐད་ཨ་མའི་ཟས་ལ་ཐིམ་གྱིན་འདུག།།
སྦྲགས་སྐད་བུ་ཡི་ལུས་ལ་ཁྱབ་ནས་འདུག།།
སྦྲགས་སྐད་འདི་ཡིས་ཁྱིམ་ཚང་བཟུང་ནས་འདུག།།
སྦྲགས་སྐད་འབྲོག་པའི་གཟས་ལ་གྲམ་ནས་འདུག།།
སྦྲགས་སྐད་ཡུལ་པའི་ཞིང་སར་བཏབ་ནས་འདུག།།
སྦྲགས་སྐད་རོང་འབྲོག་བར་ན་རྒྱུ་བཞིན་འདུག།།
སྦྲགས་སྐད་ཁྱོད་ཀྱི་ཕྲིན་ལས་རྒྱས་ཀྱིན་འདུག།།
