གཉིད་མ་ཁུག་པའི་མཚན་མོ།
གཉིད་མ་ཁུག་པའི་མཚན་མོ་དེར་
དྲན་ཤེས་ཀྱི་རིག་པ་དེ་
བདག་མེད་ཀྱི་རྟ་རྒོད་དེ་ལ་ཞོན་ཏེ་དངངས་སྐྲག་ཚད་མེད་ངང་རྒྱལ་ཁམས་འདི་ཡུད་ཀྱི་བསྐོར།
འདས་པའི་ལོ་ཟླ་ལ་ཕྱིར་འདང་དང་
མ་འོངས་པ་ལ་བསམ་གཞིག་རེ་བྱེད་དུས།
ངོ་མ་ང་ནི་ཁུ་སིམ་མེར་དུ་ལུས་འདུག
དེ་སྔོན་ཞག་པོ་དགུ་སྟོང་ལ་རྒལ་བའི་ལོ་ཟླ་དེ་འབྲོག་གྲོང་གི་རི་ཁུག་དེ་ན་གྲིབ་ནག་ཙམ་མེད་པར་ཁུ་སིམ་མེར་གྱུར་འདུག་ལ་
ད་དུང་ཡང་མུ་མཐུད་ནས་ཁུ་སིམ་མེར་ལུས་འདུག
དེ་ནས་རབ་རིབ་ཀྱི་མདུན་ལམ་ཕྲ་མོ་དེ་རུ་ཧྲག་ཧྲག་གིས་རྡོག་སྒྲས་བཀང་འདོད་བྱུང་ཡང་།
ཁ་ནང་དུ་བསྐོར་ནས་བལྟ་དུས་
ཁོ་བོ་ནི་སློབ་ཆེན་དང་སློབ་འབྲིང་ནི་ལྟ་ཞོག
སློབ་ཆུང་ཙམ་གྱིས་སྒོ་ཐེམ་བརྒལ་མ་མྱོང་བས་བྱ་གཤོག་ཆག་གི་དཔེ་ལྟར་སྟོང་བསམ་དེ་ག་ལ་འགྲུབ།
