ཁ་པར་གྱི་དུས་རབས།
ཉེར་གཅིག་གི་དུས་རབས་འདིར།།
མི་རྣམས་ཀྱི་འཚོ་བའི་ཁྲོད།།
ཁ་པར་འདི་གཅེས་དྲག་པས།།
ཁ་པར་གྱི་དུས་རབས་དེར།།
བརྗོད་འདོད་ཀྱི་ཁ་ཤ་འགུལ།།
མགོ་ཟླུམ་གྱི་བཙུན་པ་ཚོས།།
ཁ་ཐོན་དེ་གཡས་ལ་བཞག།
ཕྲེང་མ་དེ་གཡོན་དུ་བོར།།
ཁ་པར་ཞིག་འགྲམ་པར་སྦྱར།།
མཛེས་མ་ལ་སྙིང་གཏམ་འཆད།།
རབ་བྱུང་གི་ཨ་ནེ་ཚོས།།
ངག་འདོན་དེ་རིང་དུ་དོར།།
གདམ་ངག་དེ་སེམས་ནས་ཡར།།
ངུར་སྨྲིག་གི་གཟན་ཐུའི་འོག།
ཁ་པར་གྱི་ཕག་ན་གབ།།
ཀླད་མེད་ཀྱི་ན་གཞོན་འགའ།།
ཀྱག་ཀྱོག་གི་ལམ་བུ་རུ།།
ཁ་པར་གྱིས་སློབ་སྟོན་འོག།
རྒྱུ་ནོར་ལ་འཕང་སེམས་མེད།།
བུད་མེད་ཚོའི་བྲན་དུ་རྒྱུག།
དེང་དུས་ཀྱི་བུད་མེད་འགའ།།
རང་ཁྱིམ་ལ་ངོ་རྒོལ་ནས།།
ཁ་པར་གྱི་བཀོད་སྒྲིག་འོག།
མ་གི་ཡི་སྲང་མདོ་ན།།
རང་ལུས་འདི་ཁྲོམ་ལ་བཤམས།།
ཁ་པར་གྱི་དུས་རབས་འདིར།།
ཁ་པར་ཡི་འོད་རླབས་ཀྱིས།།
འདྲེན་བྱེད་ཟུང་ལོང་ལ་ཉེ།།
ཁ་པར་གྱིས་དབང་ཤུགས་ཀྱིས།།
ཁྱིམ་ཚང་འདི་ཕུང་ལ་ཉེ།།
ཁ་པར་གྱི་སྤྱི་ཚོགས་འདིར།།
ཁ་པར་གྱི་འཇབ་རྒོལ་གྱིས།།
དངུལ་ཁུག་འདི་སྟོང་ལ་ཉེ།།
ཁ་པར་གྱི་གཡོ་འཁྲུལ་འོག།
ཁྲིམས་ར་རུ་བཅུག་ལ་ཉེ།།
