འགྱོད་པ་འཕྱི་སོང་།
ཁྱུང་མུ་ཝེར།
དུས་ཚོད་ཆུ་བོ་འདྲ་སྟེ་བྲེལ་བྲེལ་དུ་བཞུར་སོང་།།
ཚེ་སྲོག་ཞག་སྒྲོན་འདྲ་སྟེ་མར་མར་དུ་བྲི་སོང་།།
ལང་ཚོ་འཇའ་ཚོན་འདྲ་སྟེ་གསལ་གསལ་ངང་འགྲིབ་སོང་།།
མདུན་ལམ་འོད་ཟེར་ཅན་ཏེ་མོག་མོག་ཏུ་གྱུར་སོང་།།
འཁོར་བ་སྡུག་བསྔལ་ཤེས་ཀྱང་བསླུ་བྲིད་ཀྱིས་ཁྲིད་སོང་།།
ཐམས་ཅད་མ་རུ་ཤེས་ཀྱང་ཞེ་སྡང་འདི་རྒོད་སོང་།།
ལས་དང་རྒྱུ་འབྲས་ཤེས་ཀྱང་བྱིང་མུག་འདི་མཐུག་སོང་།།
ནོར་ལ་ཧམ་སེམས་མེད་ཀྱང་འདོད་ཆགས་འདི་རགས་སོང་།།
མི་འགྲུབ་བྱ་བ་མེད་ཀྱང་ལེ་ལོ་ཡིས་བརྐུས་སོང་།།
ངོ་དགའ་སྤྲེལ་ལད་མེད་ཀྱང་གཞན་སེམས་དེ་འཁྲུགས་སོང་།།
རེ་བ་རྫོགས་མཐའ་མེད་ཀྱང་ཡིད་ཐང་ཞིག་ཆད་སོང་།།
ཡོད་ཚད་ཚར་བ་ཤེས་ཀྱང་འགྱོད་པ་ནི་འཕྱི་སོང་།།
༢༠༡༣/༡༠/༡༨
