རྣག་ཐོག་ཁབ་གཙག
རང་རློམ་ཆེ་སོང་ཟེར་ནས་འགལ་ཡང་ཆོག།
ཁ་ཕོ་ཆེ་སོང་ཟེར་ནས་སྡིག་ན་ཐང་།།
ལྟ་བ་ལོག་འདུག་ཟེར་ནས་ཁྲེལ་ཡང་རུང་།།
གང་དྲན་ཤོག་ཐོག་བྲི་རྒྱུ་ཁོ་བོའི་གཤིས།།
ཡ་ཀིའི་སྐུ་ལོ་ཐེག་པ་མཐོ་རབས་དང་།།
ཕ་ཀིའི་ཁོང་ཚང་རིགས་རུས་བཟང་རབས་དང་།།
མ་ཀིའི་དཔོན་པོ་འཇོན་ཐང་ཆེ་རབས་སོགས།།
རང་རྟུག་གསེར་སྒོམ་གཏམ་ལ་སུ་ཡིད་ཆེས།།
བརྡ་སྤྲོད་རིག་པའི་རྨང་གཞི་མི་དགོས་ཟེར།།
སྙན་ངག་མངོན་བརྗོད་ཚིག་རྒྱན་མི་དགོས་ཟེར།།
བསྡུས་རྟགས་རིགས་པའི་སྒྲོ་འདོག་མི་དགོས་ཟེར།།
ཡིག་རྨོངས་ཤིག་གིས་གཞུང་དོན་དཀྲོལ་ནུས་སམ།།
སྲུང་ཁྲིམས་རྩ་བཞི་རྒྱུད་ལ་མི་ལྡན་ཡང་།།
སངས་རྒྱས་ན་བཟས་སྒྱུ་ལུས་གཏུམ་བཞིན་དུ།།
དུན་རྩེ་ཁ་སྦྱོར་ཅན་གྱི་མགོ་ཟླུམ་རིགས།
ས་ཁུག་རི་ཁུག་འགའ་ལ་མོད་བཞིན་གདའ།།
མ་གྱུར་འགྲོ་བ་དོ་མཉམ་གཟིགས་ཡོད་སྐད།།
སྣང་ཞིང་སྲིད་པ་ས་ལེར་གསལ་ཡོད་སྐད།།
ཁ་མཁས་གཡོ་སྒྱུ་ཅན་གྱི་སེར་གཟུགས་ལ།།
དད་གུས་བྱེད་སའི་གནས་ཤིག་ངས་མ་མཐོང་།།
རང་རྒྱུད་ཉམས་ལེན་ཉིན་མོའི་སྐར་མ་ལ།།
གཞན་ལ་གནས་ལུགས་རྗེན་པར་བསྟན་ཡོད་ཟེར།།
དེང་དུས་བཙུན་གཟུགས་འགའ་ཡི་མཛད་ཕྲིན་འདི།།
གྲོང་དང་གྲོང་གི་བར་ན་རྒྱས་ཀྱིན་འདུག།
བྱམས་དང་སྙིང་རྗེ་ཟེར་ནའང་ངག་སྐྱོར་ཙམ།།
ངུར་སྨྲིག་རྒྱན་གྱིས་སྤུད་ཀྱང་ཕྱི་ཚུལ་ཙམ།།
དུག་ལྔའི་དབལ་ཁ་རྒོད་པའི་རྣལ་འབྱོར་པ།།
གཅིག་ལས་གཅིག་མགྱོགས་གྲལ་འགོ་རྩོད་ཀྱིན་གདའ།།
འདི་ཙམ་སེམས་ཀྱི་དབལ་ཁ་བཙན་དྲགས་པས།།
དབང་མེད་ཁ་དང་ལག་པའི་བར་བླག་ནས།།
འགོག་མི་ཐུབ་པར་ཐོལ་གྱིས་ཟག་ནས་སོང་།།
ད་ནི་མང་པོ་མི་བཤད་སྙིང་རླུང་རྒྱུ།།
འདི་ནི་དོན་མེད་ཟུར་ཟའི་གཏམ་མ་ཡིན།།
སེམས་ཀྱི་ན་ཟུག་ཁ་ནས་ཤོར་བ་ཡིན།།
མི་འདོད་གདོང་མིག་བགྲད་མཁན་གཅིག་ཡོད་ན།།
རྣག་ཐོག་ཁབ་ཀྱིས་གཙག་པའི་དགོས་པའོ།།
༢༠༡༤/༤/༤ཉིན།
