སྦྲ་ནག

འདས་སོང་ལོ་རྒྱུས་སྟོང་གི་བདེན་ཁ་དང་།། 

མཐོ་སྒང་མི་རིགས་ཤིག་གི་ཁྱད་བོན་ཏེ།།   

སྔོ་ལྗང་རྩྭ་ཐང་ཡངས་པའི་རྒྱན་ཆ་རུ།། 

ཕུལ་བྱུང་སྦྲ་ནག་སྨུག་པོ་ཨེ་མ་རྨད།། 

སྟོང་ལོ་དུ་མའི་ཕྲེང་བ་ཁྱེད་ལ་གྲངས།། 

སྐྱེས་ཆེན་དམ་པའི་རྣམ་ཐར་ཁྱེད་ལ་གསལ།། 

ཡབ་མེས་གོང་མའི་མིང་བྱང་ཁྱེད་ལ་བྲིས།། 

མཁས་གྲུབ་བྱེ་བའི་སྙུག་ཁ་ཁྱེད་ལ་རྡོལ།། 

སྟག་ཤར་དར་མའི་སྙིང་སྟོབས་ཁྱོད་ལས་འཕེལ།། 

སྨན་ཤར་དར་མའི་ལང་ཚོ་ཁྱོད་ལས་སྨིན།། 

དཔའ་རྒོད་དར་མའི་ཟུངས་ཁྲག་ཁྱོད་ལས་རྒྱས།། 

མ་འོངས་གཞི་འཛིན་ལང་ཚོ་ཁྱེད་ལས་འབུས།། 

སྦྲ་ཡི་སྲུབས་ན་ལོ་རྒྱུས་གཏན་ཚིགས་ཡོད།། 

སྦྲ་ཡི་མིང་ལ་བོད་པའི་ཐ་སྙད་ཡོད།། 

སྦྲ་ཡི་མཐིལ་ལ་རིག་པའི་གསང་ཚིག་ཡོད།། 

སྦྲ་ནག་འདི་ནི་སྒང་པའི་ཕ་ཁྱིམ་ཡིན།། 

སྦྲ་འདི་ཉམས་རྟོགས་འཕེལ་སའི་དབེན་གནས་ཡིན།། 

སྦྲ་འདི་ཚད་གསུམ་རྩོད་སའི་འཆད་ར་ཡིན།། 

སྦྲ་འདི་ཀ་ཁ་ག་ངའི་སློབ་ར་ཡིན།། 

སྦྲ་ནག་འདི་ནི་བརྒྱ་གོ་གཅིག་ཆོད་ཡིན།། 

སྦྲ་འདི་མེས་པོ་དག་གིས་བཟོས་ནི་ཡིན།། 

སྦྲ་འདི་མ་ཕྱི་རྣམས་ཀྱིས་འཐག་ནི་ཡིན།། 

སྦྲ་འདི་ང་ཚོར་བགོས་པའི་ནོར་སྐལ་ཡིན།། 

སྦྲ་ནག་འདི་ནི་ཉམས་མེད་རྒྱུད་འཛིན་དགོས།། 

ང་ཚོ་སྦྲ་ནག་ཚང་གི་རྒྱུད་ཡིན་པས།། 

སྦྲ་ནག་རྒྱུད་འཛིན་སྦྲ་ནག་ཚང་གི་འགན།། 

སྦྲ་ནག་གཅེས་སྤྲས་སྦྲ་ནག་ཚང་གིས་དགོས།། 

སྦྲ་ནག་འདི་ནི་ང་ཚོར་མེད་ཐབས་མེད།།