སྒོར་མོའི་དུས་རབས།
ཁྱུང་མུ་ཝེར།
༧ཐོབ་ཆེན་བླ་སྤྲུལ་སྒོར་མོ་མཐོང་ན་འོ་བརྒྱལ་མེད།།
རབ་བྱུང་བཙུན་པས་སྒོར་མོ་མཐོང་ན་འདུལ་ཁྲིམས་བརླག།
དྲང་བདེན་དཔོན་པོས་སྒོར་མོ་མཐོང་ན་གཡོན་ཐལ་ཤོར།།
ན་ཆུང་མཛེས་མས་སྒོར་མོ་མཐོང་ན་རང་ལུས་འཚོང་།།
༧ཨ་ཁུ་འབྲོག་པས་སྒོར་མོ་མཐོང་ན་སྒོ་ནོར་བཤའ།།
ཞིང་པ་རྒད་པོས་སྒོར་མོ་མཐོང་ན་ཕ་ཞིང་འཚོང་།།
འབྱོར་ལྡན་ཚང་པས་སྒོར་མོ་མཐོང་ན་སྒོ་ཁྱི་འཚོང་།།
དེང་དུས་མི་ཡིས་སྒོར་མོ་མཐོང་ན་ཕ་ཆོས་ཕུང་།།
༧སྒོར་མོ་ཡོད་ན་རྨོངས་རྟུལ་ཡིན་ཡང་མཁས་གྲལ་སླེབས།།
སྒོར་མོ་ཡོད་ན་ཉེན་ཆེན་ཡིན་ཡང་ཁྲིམས་ནས་ཐར།།
སྒོར་མོ་ཡོད་ན་ཤན་པ་ཡིན་ཡང་གྲོགས་སུ་གྱུར།།
སྒོར་མོ་ཡོད་ན་རྒད་མོ་ཡིན་ཡང་གནས་སར་སླེབས།།
༧སློབ་མཐར་ཕྱིན་ཡང་སྒོར་མོ་མེད་ན་ལས་མི་རག།
དྲང་བདེན་ཡིན་ཡང་སྒོར་མོ་མེད་ན་ཁྲིམས་རར་ལྷུང་།།
ཉེ་འབྲེལ་ཡིན་ཡང་སྒོར་མོ་མེད་ན་དགྲ་རུ་གྱུར།།
མཛངས་མ་ཡིན་ཡང་སྒོར་མོ་མེད་ན་གོ་རྩར་ལུས།།
༧སྤུན་ཟླའི་མཐུན་སྒྲིལ་དངུལ་ལོ་དམར་པོ་ཁྱོད་ཀྱིས་བརླགས།།
དུག་ལྔའི་སྣ་འདྲེན་དངུལ་ལོ་དམར་པོ་ཁྱོད་ཀྱིས་བྱེད།།
འདི་ཕྱི་གཉིས་ཀ་དངུལ་ལོ་དམར་པོས་ཕུང་ནས་ཐལ།།
ཨ་ཙི་ཨ་ཙི་དངུལ་ལོ་དམར་པོའི་ཆོ་འཕྲུལ་ལ།།
