དུས་རབས་ཀྱི་རྗེས་མ་ཟིན་པའི་བོན་པོ།

ཆོས་ཀྱི་ངོས་ནས་བསམ་གཞིགས་བྱས་ཚེ་གཡུང་དྲུང་བོན་གྱི་ཆོས་ལུགས་འདི་དེང་དུས་འཛམ་གླིང་འདིར་སྔོན་ཐོན་གྱི་གྲལ་དུ་སླེབ་ཡོད་པ་མ་ཟད་གཞན་གྱི་བརྗོད་པ་ནང་བཞིན་རྗེས་ལུས་བག་འཁུམ་གྱི་ཆོས་ལུགས་ཤིག་གི་ངོ་བོར་ཡང་གཏན་ནས་ཆགས་མེད། ལྷག་པར་དུ་སྤྱན་ཡངས་པོ་ཡོད་པའི་དེང་དུས་ཀྱི་མཁས་པ་ཀུན་གྱིས་གཡུང་དྲུང་བོན་གྱི་ཆོས་ལུགས་འདི་ལོ་རྒྱུས་ཕུགས་རྒྱང་རིང་པོར་ཡོད་པ་དང་། སྲོག་ལྡན་འབུམ་ཕྲག་མང་པོར་ཕན་ནུས་རླབས་ཆེན་ལྡན་པའི་ཆོས་ལུགས་ཤིག་ཡིན་པ་བརྗོད་བཞིན་ཡོད། དེ་ཡང་ཆོས་ལུགས་ཉམས་སུ་ལེན་བྱེད་མཁན་གྱི་ངོས་ནས་བསམ་གཞིགས་བྱས་ཚེ་སྔོན་བྱོན་རིག་འཛིན་དམ་པ་རྣམས་ལ་མཚོན་ན་བསྟན་པ་དང་འགྲོ་བའི་དོན་དུ་མཛད་འཕྲིན་རླབས་ཆེན་བརྐྱངས་ཡོད་པ་དེང་དུས་མཇལ་ཡུལ་དུ་ཡོད་པའི་རྣམ་ཐར་དང་ལོ་རྒྱུས་སོགས་ལས་ཤེས་ནུས། འོན་ཀྱང་དེང་དུས་ཀྱི་བོན་པོ་རྣམ་ཕན་ཚུན་བར་འཕྲག་དོགས་ཀྱི་མེ་ལྕེ་མཆེད་ཅིང་རང་ཁེ་གཞན་ཕམ་གྱི་བསམ་བློ་དེ་ཧ་ཅང་ཆེ་བ་མ་ཟད་གང་ཞིག་གཞན་ལ་ཤེས་འཇོན་ལྡན་ཚེ་དེ་ལ་འཕྲག་དོགས་དང་ཚིག་ངན་འདྲ་མིན་ལབ་གླེང་བྱེད་རྒྱུ་དེ་དེང་དུས་ཀྱི་བོན་པོའི་སྤྱི་ཚོགས་ཀྱི་རང་བཞིན་དུ་གྱུར། གལ་ཏེ་སུ་ཞིག་གིས་ལྷག་བསམ་རྣམ་དག་གི་སྒོ་ནས་བོན་པོ་སྤྱི་ལ་ཞབས་ཞུ་བྱེད་འདོད་ཀྱི་འདུན་པ་སྔོན་དུ་བཏང་ནས་གཡུང་དྲུང་བོན་གྱི་བསྟན་པ་རིན་པོ་ཆེར་ཞབས་ཞུ་ཚད་དང་ལྡན་པ་ཞིག་བྱེད་ཀྱི་ཡོད་ན་དེ་ལ་མངོན་དང་ལྐོག་ནས་ཚིག་ངན་འདྲ་མིན་བརྗོད་ནས་སེམས་ཤུགས་ཆགས་པའི་ཐབས་ཤེས་ཡོད་དགུ་རྩལ་དུ་འདོན་གྱི་ཡོད། དེ་འདྲའི་སེམས་ཤུགས་ཆགས་སོང་ན་ད་གཟོད་བློ་བདེ་བ་ཡིན། ལྷག་པར་དུ་༧སྐྱབས་རྗེ་མཁན་སློབ་རྣམ་གཉིས་ཕུད་པའི་དེང་དུས་ཀྱི་བོན་པོ་རྣམས་བོན་པོ་སྤྱི་ལ་བསམ་བློ་གཏོང་མཁན་ཞིག་ཤིན་ཏུ་དཀོན་པའི་གནས་སུ་གྱུར། དེང་དུས་ཀྱི་བོན་པོ་རྣམས་ཀྱིས་ང་རང་གི་དགོན་པ་དང་ཁྱོད་རང་གི་དགོན་པ་ཟེར་ནས་སོ་སོའི་དགོན་པ་འདི་ཡར་རྒྱས་གཏོང་ཐབས་ཁོ་ན་བསམ་བཞིན་ཁ་ནས་བདག་དང་འགྲོ་བ་སེམས་ཅན་ཐམས་ཅད་བརྗོད་བཞིན་ཡོད། ད་དུང་ཁ་ནས་སྣང་བ་སྐྱིད་པོ་བཤད་ནས་ང་ཚོ་ཡར་རྒྱས་འགྲོ་བཞིན་ཡོད་པ་དང་བཟང་ཕྱོགས་ཐམས་ཅད་ཚང་མ་ང་ཚོའི་ཡིན་པ་དང་། ངན་ཕྱོགས་ནས་ཐམས་ཅད་གཞན་གྱི་ཡིན་པ་ལྟ་བུ་ཞིག་བཤད་བཞིན་ཡོད། གཞན་ཡང་མི་བུ་ཚོའི་ནང་ཁུལ་མཐུན་སྒྲིལ་གྱི་གསེར་ཟམ་བཙུག་ནས་སོ་སོའི་ཆོས་ལུགས་འདི་མཛམ་གླིང་ཡུལ་གྲུ་ཀུན་ལ་བསྒྲགས་བཞིན་ཡོད་ན་ཡང་། བོན་པོ་རྣམས་ནང་ཁུལ་རང་ཁེ་གཞན་ཕམ་གྱི་བསམ་བློའི་བར་ནས་མ་ཐོན་པར་དེང་དུས་ཀྱི་དུས་རབས་འདི་ལས་རྗེས་ལུས་སུ་གྱུར།  མི་བུ་ཚོའི་སོ་སོའི་ཆོས་ལུགས་འཛམ་གླིང་གོ་ལ་འདིར་ཡུན་རིང་གནས་དང་མི་གནས་ཐེ་ཚོམ་བྲལ་བའི་རྒྱལ་ཁབ་ཆེན་པོ་རྣམས་ཀྱི་སྐད་ཐོག་ཏུ་བསྒྱུར་ཟིན་ན་ཡང་། བོན་པོ་རྣམས་ཀྱིས་བསྒྱུར་ཆོག་དང་མི་ཆོག་བསྒྱུར་ན་རུང་མི་རུང་སོགས་ཟེར་ནས་དུས་ཚོད་འགྲོ་ཐབས་བྱས་ནས་དེང་དུས་ཀྱི་དུས་རབས་འདི་ལས་རྗེས་སུ་གྱུར།  མི་བུ་ཚོའི་དགོན་པ་དང་དགོན་པའི་བར་མཐུན་སྒྲིལ་གྱི་ཟམ་ཆེན་བཙུག་ནས་བསྟན་པ་དང་འགྲོ་དོན་རྒྱ་ཆེན་བྱེད་ཀྱི་ཡོད་ན་ཡང་། བོན་པོ་རྣམས་གཡག་ར་ཁུགས་མ་ནང་ལ་བླུགས་པ་ནང་བཞིན་ཆ་མ་འགྲིག་པར་ཕན་ཚུན་བར་ཟུར་ཟ་སྨོད་ཚིག་རེ་ལབ་རེས་བྱས་ནས་དེང་དུས་ཀྱི་དུས་རབས་འདི་ལས་རྗེས་ལུས་སུ་གྱུར། མི་བུ་ཚོ་ལ་གདམ་པའི་ཆ་ནས་དེ་ཙམ་མ་གཏོགས་མེད་ན་ཡང་ཐབས་མཁས་ཕན་ཚུལ་བར་བརྩི་འཇོག་དང་རང་གི་ཆོས་ལྷག་བསམ་རྣམ་པར་དག་པ་ཡིན་པའི་རྒྱུ་མཚན་གྱིས་འཛམ་གླིང་ཡུལ་གྲུ་མང་པོའི་ནང་རང་གི་ཆོས་ལུགས་འདི་དར་ཁྱབ་བྱས་ཟིན་པ་དང་། བོན་པོ་རྣམས་ལ་གདམ་ངག་གི་ཆ་ནས་ཡིད་བཞིན་གྱི་ནོར་བུ་ནང་བཞིན་ངོ་མཚར་སྟོང་དང་ལྡན་པའི་སྔགས་དང་རྫོགས་ཆེན་གྱི་གདམ་པ་གསེར་ལྟ་བུ་མང་པོ་ཡོད་ན་ཡང་བོན་པོའི་མི་ལ་ལྷག་བསམ་པ་མེད་པ་ཐབས་ཤེས་མེད་པ་ནང་ཁུལ་མཐུན་སྒྲིལ་མེད་པ་སོགས་ཀྱི་རྒྱུ་མཚན་གྱིས་དར་ཁྱབ་གཏོང་མ་ཐུབ་པ་ཡིན་པས་དེང་དུས་ཀྱི་དུས་རབ་འདི་ལས་རྗེས་སུ་གྱུར། དེང་དུས་འཛམ་གླིང་འདིར་དྭ་རྒྱའི་ལམ་ནས་ལས་ཀ་འདྲ་མིན་བྱེད་བཞིན་ཡོད་པའི་དུས་རབས་འདིར་མི་བུ་ཚོའི་རང་གི་ཆོས་ལུགས་དྲྭ་ལམ་རྒྱུད་ནས་དར་ཁྱབ་བྱེད་བཞིན་ཡོད་ན་ཡང་། བོན་པོ་རྣམས་ལ་དྭ་རྒྱ་གཅིག་གཉིས་རེ་ཡོད་པ་དེ་ཚོའི་ནང་ནས་ཁྱོད་ངན་ང་བཟང་ཟེར་ནས་ཁ་འཛིང་རེ་བྱས་ནས་དེང་དུས་ཀྱི་རབས་འདི་ལས་རྗེས་སུ་གྱུར། རྒྱུ་མཚན་གཅིག་ནས་གཉིས་སུ་བསྒྲང་དགོས་པའི་དུས་རབས་འདིར་མི་བུ་ཚོའི་རིག་པའི་ལམ་རང་གི་ཆོས་ལུགས་མི་རྣམས་ལ་ངོ་སྤྲོད་བྱེད་བཞིན་ཡོད་ན་ཡང་། བོན་པོ་རྣམས་ཀྱིས་རྫོགས་མཐའ་མེད་པའི་ཞབས་བརྟེན་གྱི་ལས་གཡེང་ནས་དེང་དུས་ཀྱི་དུས་རབས་འདི་ལས་རྗེས་སུ་གྱུར།