སེམས་ཀྱི་སྙིང་གཏམ་དྲོན་མོ།

ཁ་ནས་འཇིག་རྟེན་སྒྱུ་མ་ཟེར་བཞིན་དུ།

སེམས་ཀྱི་ཡོད་ཚད་འཇིག་རྟེན་སྒྱུ་མར་ཤོར།      

  ཁ་ནས་བླ་མ་དཀོན་མཆོག་ཟེར་བཞིན་དུ།

                      སེམས་ཀྱི་གཏད་སོ་འཇིག་རྟེན་མི་ལ་ཤོར།

མི་ལོ་བཅུ་ཕྲག་ལྷག་ཞིག་ཕྱིན་ན་ཡང་།

སེམས་པ་འཁོར་ས་མེ་ཏོག་ལྷ་མོ་ཡིན།

ཉིན་རེ་བཞིན་དུ་ཁྱོད་ཀྱི་བཞིན་རས་དེ།

སེམས་པའི་ནང་ནས་ཡལ་བར་དོར་མྱོང་མེད

ཨེ་མ་ངོ་མཚར་ལྡན་པའི་སེམས་པ་འདི།

ལས་དབང་ཞིག་གམ་ཡང་ན་རང་བཞིན་གྱིས།

ཁྱོན་ཡང་གོ་ལ་ཟླུམ་པོ་འདི་ཡི་ཐོག།

ཁྱོད་ལས་གཞན་ཞིག་སུ་ཡང་མཐོང་མྱོང་མེད།

                            དཔྱད་པ་ཅི་ཙམ་བྱས་ཀྱང་རྟོགས་དཀའ་བའི།

                           སེམས་ཆུང་དམར་པོའི་ཁ་ཕྱོགས་ཁྱོད་ལ་འཁོར།

                           ཅི་ཡིན་ཆ་མི་འཚལ་བའི་སེམས་པ་འདིས།

                            ཉིན་མཚན་མེད་པར་ཁྱོད་ཀྱི་ཕྱོགས་སུ་ཁྲིད།

གོ་ལ་ཟླུམ་པོའི་ཐོག་ཏུ་ཁྱོད་གནས་ན།

                  དེ་ཀ་ཙམ་གྱིས་ང་ཡི་ལུས་སེམས་བདེ།

                 ཁྱོད་ཉིད་གོ་ལ་འདི་རུ་བྲལ་ཉིན་ནས།

                ང་ཡང་འདི་རུ་འཚོ་བར་དོན་སྙིང་དབེན།

སྙན་ངག་མཁན་པོའི་ཚིག་གིས་གབ་པ་མེད།

ཁ་བདེ་ཅན་གྱི་ཁ་བདེ་བཤད་པ་མིན།

རང་གི་སེམས་ལ་ཇི་བཞིན་དྲན་པ་དེ།

ཤོག་བུ་དཀར་པོའི་ཐོག་ཏུ་བྲིས་པ་ཡིན།

དམར་ཆུང་སེམས་ལས་བྱུང་བའི་ཡི་གེ་འདི།

ཁྱོད་ལ་མཇལ་བའི་ཉིན་དེར་འབུལ་འདོད་ཀྱང་།

སྒེག་ཉམས་ལྡན་པའི་ཁྱོད་ཀྱི་གཟུགས་མཐོང་དུས།

རང་དབང་མེད་པར་སེམས་ཀྱི་ནུས་པ་ཉམས།

ལུས་ལ་ནད་མེད་སེམས་ལ་བདེ་སྐྱིད་ཤར།

མི་བདེ་སྡུག་བསྔལ་ཀུན་ལས་བྲལ་བྱས་ཏེ།

བཀྲ་ཤིས་ཕུན་སུམ་ཚོགས་པའི་སྨོན་ལམ་དང་།

ཚེ་རིང་ལོ་བརྒྱ་ཐུབ་པའི་རྟེན་འབྲེལ་ཞུ།།

མགྲིན་སྙན་ངག་གི་ཁུ་བྱུག་ནས།