༧རྒྱལ་བ་སྨན་རིའི་ཁྲི་འཛིན་སོ་གསུམ་པ་ལུང་རྟོགས་བསྟན་པའི་ཉི་མ་དཔལ་བཟང་པོ་མཆོག་ལ་ཕུལ།

བླ་མ་ལགས། ཁྱེད་ནི་མི་འཇིག་གདོང་ལྔའི་བཏེགས་པའི་ཁྲི་འཕང་ལ། བསྟན་པ་དང་འགྲོ་བའི་དོན་ཆེན་མ་རྫོགས་བར་དུ་བཞུགས་སུ་གསོལ། བླ་མ་ལགས། རྒྱལ་བ་གཤེན་མི་བོའི་བསྟན་པ་འདི་ཉག་ཕྲ་བའི་ཆེས་གཉེན་འཕྲང་ཅན་གྱི་དུས་སྐབས་འདིར་བསམ་ཡུལ་ལས་འདས་པའི་བླ་མ་ཁྱེད་ཀྱི་མཛད་འཕྲིན་ཆུ་བོའི་རྒྱུན་བཞིན་འབད་མེད་ལྷུན་འགྲུབ་ཡོང་བའི་རེ་སྨོན་ཞུ། བླ་མ་ལགས། གནམ་འོག་གི་འཇིག་རྟེན་འདི་ནས་ང་ཚོ་སྤྱི་བོ་གནམ་བསྟན་གྱི་བོན་འབངས་ཡོངས་ཀྱིས་མི་ཕྱེད་དད་པའིི་སྒོ་ནས་སོར་བཅུའི་ཐལ་མོ་སྙིང་ཁར་སྦྱར་ཏེ་འཁོར་བ་མ་སྟོང་བར་ཁྱེད་ཀྱི་སྐུ་ཚེ་བརྟན་པའི་སྨོན་ལམ་འདེབས་བཞིན་ཡོད། བླ་མ་ལགས། ཁྱེད་ཀྱི་ཕྱི་ནང་གསང་གསུམ་གྱི་མཛད་འཕྲིན་ཡོད་དོ་ཅོག་སྐྱེ་བོ་ཐ་མལ་བ་ཞིག་གི་བློ་རྩེ་ཁབ་མིག་ལྟ་བུའི་ནང་དུ་འཆར་བ་ཤིན་ཏུ་དཀའ་ནའང་། རྣམ་པར་དག་པའི་ཀུན་སློང་གཞིར་བཞག་ནས་རང་གི་ཤེས་ཚོད་ཙམ་ཞིག་བྲིས་པ་ཡིན། སྙན་ངག་མཁན་པོ་ཞིག་གི་ཡོད་རྒུ་རྩལ་དུ་བཏོན་ནས་ཚིག་གི་ལོ་མའི་བཏུམ་སྟེ་བྲིས་པ་མིན་ན་ཡང་། ལྷག་བསམ་རྣམ་པར་དག་པའི་སྒོ་ནས་དད་པ་དང་གསོལ་འདེབས་མཉམ་དུ་བསྒྲགས་ནས་བྲིས་པ་ཡིན། བླ་མ་ལགས། ཁྱེད་ནི་ང་ཚོ་བོན་འབངས་རྣམས་ཀྱིས་དད་པའི་རྟེན་དང་ཁམས་སུམ་འགྲོ་བའི་མགོན་པོ་མཉམ་མེད་ཤེས་རབ་རྒྱལ་མཚན་དེ་ཉིད་ཀྱིས་རྒྱལ་ཚབ་བྱས་ཏེ་འགྱུར་མེད་རིན་ཆེན་ཁྲི་ལ་བཞུགས་སོ་གསོལ། གུས་པ་སྣང་གྲྭ་བསྟན་པ་དར་རྒྱས་འམ་ཝོར་འབེལ་ནས་བྲིས།