མིག་གཅིག་མ་གཏོགས་མེད།

བོད་རིག་པའི་ཞིབ་འཇུག་བྱེད་མཁན་ཡིན་ཟེར་ནས། དོན་དུ་བོད་ཀྱི་ཆོས་དང་རིག་གཞུང་རྒྱ་ཆེ་གཏིང་ཟབ་ཡོད་པ་འདི་དག་དངོས་ཤུགས་བརྒྱུད་གསུམ་ནས་གཏོར་བཤིག་གཏོང་མཁན་རྣམས་ལ། དད་པའི་མིག་རྣམ་པར་དབེན་ཞིང་ཤེས་རབ་ཀྱང་བདག་མེད་དང་སྟོང་ཉིད་སོགས་ལ་དཔྱོད་པའི་ཤེས་རབ་ཕྱོགས་ཐམས་ཅད་ནས་བྲལ་ཞིང་། འཇིག་རྟེན་པའི་ཤེས་རབ་ཀྱི་མིག་ཙམ་པོ་བ་ཞིག་མ་གཏོགས་མེད་པས་ཆ་ནས། མིག་གཅིག་མ་གཏོགས་མེད་ཅེས་བརྗོད་པ་ཡིན། སྤྱིར་རྒྱལ་བསྟནསྤྱི་དང་ཡང་དགོས་རྒྱལ་བ་གཤེན་རབ་མི་བོ་དེ་ཉིད་ཀྱི་མཛད་རྣམ་སོགས་ལ་དགག་པའམ་སྐྱོན་བརྗོད་བྱས་པ་སོགས་དང་དེ་བཞིན་དུ་རང་གི་མ་མཐོང་བ་དང་རང་གི་མ་ཤེས་པ་རྣམས་རྒྱུ་མཚན་དུ་བྱས་ཏེ།

གཡུང་དྲུང་བོན་གྱི་བསྟན་པ་འདི་ཁུངས་མེད་ཅིག་ཡིན་པ་བཤད་ཡོད་ཀྱང་། གཡུང་དྲུང་བོན་གྱི་བསྟན་པ་རིན་པོ་འདི་ཉིད་བསྒྲུབས་ནས་སངས་རྒྱས་ཀྱི་གོང་འཕང་བརྙེས་ཟིན་པའི་སྐྱེ་བོ་འབུམ་ཕྲག་དུ་མ་བྱུང་ཟིན་ལ་སླད་མར་ཡང་བསམ་གྱི་མི་ཁྱབ་པའི་སྐྱེ་བོ་དུ་མ་འབྱུང་ངེས་ཡིན་པ་གདོན་མི་ཟ། སངས་རྒྱས་ཀྱི་མཛད་པ་སེམས་ཅན་གྱི་བློ་ངོར་མི་ཤོང་ཞེས་པ་ལྟར། ལོ་ཚིགས་གོང་འོག་ཙམ་ཞིག་བསྒྲིག་ནས་དུས་ནམ་ཡང་སངས་རྒྱས་ཀྱི་མཛད་འཕྲིན་རྣམས་རྟོགས་མི་ཐུབ་སྟེ། རྗེ་རིན་པོ་ཆེའི་འདུལ་བ་ལས། འཕྲིན་ལས་རྒྱ་མ་ཆད་པར་བསྟན་པའི་ཆེད་དུ། ལོ་རྒྱུས་མི་མཐུན་པ་ལ་སོགས་མང་དུ་བྱུང་ངོ་། ཞེས་དང་། ཡང་དེ་ཉིད་ལས། བོན་གྱི་བྱུང་ཁུངས་ལ་ངག་འཁྱལ་གྱིས་རྩོམ་པ་བྱས་ནས་བསྟན་བཅོས་སུ་སྒྲོ་བཏགས་པ་ལ་བརྟེན་ནས། ཁྱི་ཐོང་གིས་ཟུག་ཆོམ་ལྟར་དུ་སྨྲ་བ་མང་མོད་ཀྱི།བདག་དང་བོན་གྱི་བྱུང་ཁུངས་ཚད་མར་སྨྲ་བའི་སྔོན་དུ་ངེས་པར་རྩོད་ནུས་སམ། མི་ནུས་ན་ངག་འཁྱལ་གྱིས་བླུན་པོའི་མགོ་བསྐོར་བ་ལ་ཉེས་པ་ཡོད་མེད་སོམ་ཤིག ཞེས་སོགས་གསུངས་སོ། དེས་ན་དུས་ནམ་ཡང་དད་པའི་མིག་ལོང་བའི་གང་ཟག་གཅིག་གིས་

བོད་གངས་ཅན་པའི་རིག་གཞུང་ལ་ཞིབ་འཇུག་ཅེས་པའི་མིང་ཙམ་ཞིག་བརྗོད་པ་མ་གཏོགས་དོན་དུ་ཞིབ་འཇུག་དཔྱིས་ཕྱིན་པ་ཞིག་ནམ་ཡང་བྱེད་ཐབས་བྲལ་ལ། ཆོས་ལ་ཞིབ་འཇུག་གནད་དུ་ཆུན་པ་ཞིག་བྱེད་དགོས་ན། དང་པོ་ཐོག་མར་ངེས་པར་དུ་དད་པའི་མིག་གསལ་པོ་ཞིག་དགོས་ངེས་ཡིན། དེ་ཡང་རྨོངས་དད་ལྟ་བུ་མ་ཡིན་པར་རིག་པའི་ལམ་ནས་གཏན་ལ་འབེབས་དགོས་པ་ཡང་ཤིན་ཏུ་མང་པོ་ཡོད། མདོར་ན་དད་པའི་མིག་དང་ཤེས་རབ་ཀྱི་མིག་གཉིས་མེད་ན་དུས་གསུམ་གང་དུ་ཡང་བོད་གངས་ཅན་པའི་ཆོས་དང་རིག་གཞུང་དག་ལ་ཞིབ་འཇུག་པའི་མིང་ཙམ་མ་གཏོགས་བྱེད་ཐབས་བྲལ་ལོ།