ཐེག་པ་དམན་པ་རྣམ་རྩོད་སྡེ་གཉིས་དང་།

རང་རྟོགས་ལུགས་ཀྱི་གང་ཟག་བདག་མེད་ཅེས།

ངག་ནས་མ་ཏྲི་བཞིན་དུ་བགྲངས་ན་ཡང་།

རྟོགས་རྒྱུ་ལྟ་ཞོག་འཇོག་ཚུལ་ཙམ་ཞིག་ཀྱང་།

མ་ཤེས་མི་ལོ་ཧྲིལ་བོ་བཅུ་གསུམ་ཕྱིན།

འོན་ཀྱང་རགས་པ་ཙམ་ཞིག་དཔྱད་བྱས་ཏེ།

དགའ་བཞིན་སྤྲོ་བཞིན་ཅུང་ཙམ་གླེང་བར་འདོད།

གང་ཟག་བདག་མེད་གང་ཟག་ལ་སྤྱར་ན།

གང་ཟག་གང་ཞིག་ཕུང་པོ་བཞི་འམ་ལྔར།

མ་བརྟེན་གང་ཟག་འདི་ཞེས་གྲུབ་ཡོད་ན།

གང་ཟག་བདག་ཅེས་གྲུབ་ཚུལ་ཡིན་པར་སྙམ།

དེ་ཡིས་སྟོང་པ་གང་ཟག་བདག་མེད་འཇོག

འོན་ཀྱང་ཕྱི་ཡུལ་ཀ་བ་ལ་སྤྱར་ན།

ཀ་བ་རང་གི་ཆ་ཤས་ཐམས་ཅད་ལ།

རང་གི་ངོ་བོ་མ་བརྟེན་གྲུབ་ཡོད་ན།

ཀ་བའི་སྟེང་གི་གང་ཟག་བདག་ཡིན་སྙམ།

དེ་ཡིས་སྟོང་པ་ཀ་བའི་བདག་མེད་འཇོག

རགས་པ་ཀུན་རྫོབ་ལྟ་བའི་རྒྱུ་མཚན་གྱིས།

གང་ཟག་བདག་མེད་འདོད་པ་རྗེ་ཡིས་གསུངས།

འོན་ཀྱང་ཐེག་དམན་རྣམ་རྩོད་སྡེ་གཉིས་ཀྱིས།

འདོད་པའི་ཕྲ་བ་ཟབ་མོ་ཞེས་པ་དང་།

མཐའ་གསུམ་དོན་དམ་ཞེས་པའི་ཆ་མེད་དག

གང་ཟག་བདག་མེད་ཡིན་པར་འདོད་དགོས་ཀྱང་།

འདོད་ཚུལ་ཇི་བཞིན་མ་ཤེས་འཕྱང་མོ་ཉུག

ཆ་མེད་ཅེས་པའི་དངོས་པོ་འཇོག་ཚུལ་དེ།

ཆ་ཤས་སོ་སོར་བསལ་བའི་འོག་ཏུ་ཡང་།

རང་འཛིན་ཤེས་པ་འདོར་དུ་མི་རུང་བར།

གནས་པ་དེ་ལ་ཆ་མེད་ཡིན་ཞེས་སྨྲ།

དངོས་པོ་དེ་ཉིད་ཆ་ཤས་གང་ལ་ཡང་།

མ་བརྟེན་གྲུབ་པ་རྣམ་རྩོད་གྲུབ་མཐའི་ལུགས

ཆ་མེད་གང་ཟག་བདག་མེད་འཇོག་ཚུལ་དེ།

ཤེས་མཁན་རྣམས་ཀྱིས་བདག་ལ་བསླབ་ཏུ་གསོལ།

ཅི་ཡང་མི་ཤེས་བླུན་པོ་མགོ་འཐོམ་ངས།

རང་ཤག་ཁང་མིག་གྲུ་བཞིའི་ནང་ནས་བྲིས༑

སྤྱི་ལོ། ༢༠༡༡།༥།༡༩།ཉིན། བསྟན་པ་དར་རྒྱས་ནས།