སྐྱབས་མཆོག་ཆུ་གཏེར་དབང་པོ་ལ།

སྒོ་གསུམ་གུས་འདུད་མེ་ཏོག་འཐོར།

རྒྱལ་གསུང་སྙིང་པོ་བཤད་སྒྲུབ་ཀྱི།

བསྟན་པ་ཕྱོགས་བཅུར་རྒྱས་པ་དང་།

མི་ནུབ་སྲིད་མཐར་གནས་ཕྱིར་དུ།

དགའ་སྟོན་གཡང་འབོད་ཚིག་འདི་བརྗོད།

བསྐལ་བཟང་སྲིད་ཞིའི་རྒྱན་གཅིག་རིན་པོ་ཆེ།

བླ་མ་སངས་རྒྱས་བོན་དང་སེམས་དཔའི་ཚོགས།

བསླུ་མེད་སྐྱབས་མཆོག་ཕྱི་ནང་གསང་བ་ཡིས།

སྙིགས་དུས་བསྟན་ལ་བརྩེ་གཟིགས་དགོངས་སུ་གསོལ།

སྤངས་རྟོགས་མཐར་ཕྱིན་གཤེན་ཞལ་གཙང་མའི་བཀའ།

སྟོང་ཕྲག་བརྒྱད་ཅུ་རྩ་བཞིའི་བོན་སྒོ་ཡིས།

དོན་གཉེར་སྐྱེས་བུའི་དགའ་སྟོན་ཡོངས་སུ་སྨིན།

མཁའ་ཁྱབ་རིས་མེད་དར་བའིདགེ་གཡང་རྩོལ།

ས་གསུམ་འགྲན་བྲལ་མཉམ་མེད་བླ་མ་ཡི།

རྨད་བྱུང་ལེགས་བཤད་བརྒྱུད་འཛིན་མཆོག་རྣམས་ཀྱི།

མདོ་རྒྱུད་ཀུན་གྱི་སྙིང་པོ་བཤད་སྒྲུབ་བསྟན།

ནུབ་མེད་སྲིད་མཐར་གནས་པའི་དོན་གཡང་སྩོལ།

གངས་རིའི་མུ་ཁྱུད་ཟླུམ་པོ་འཁྱིལ་བའི་ལྗོངས།

བཤད་སྒྲུབ་གཞུང་ལུགས་ཆུ་ཀླུང་འབུམ་འཁྱིལ་བར།

མཁས་གྲུབ་གདེངས་ཅན་ཚོགས་ཀྱིས་རྟགས་རོལ་བའི།

ལེགས་བཤད་བདུད་རྩིའི་བཅུད་བསྡུས་ཕྱ་གཡང་སྩོལ།

སྨིན་གྲོལ་དགོན་སྡེའི་པད་ཚལ་བཞད་པ་ལ།

མཁས་བཙུན་བཟང་པོའི་བཅུད་སྨིན་དྲི་བསུང་འཐུལ།

བསྐལ་ལྡན་སྦྲང་ཚོགས་ཡིད་དབང་ལས་འགུག་པས།

སེམས་དབའ་སྟོང་ཕྲག་གྲངས་མེད་འཕེལ་གཡང་སྩོལ།

ཚངས་སྤྱོད་ཚུལ་ལྡན་ངུར་སྨྲིག་རྒྱན་སྤྲས་པས།

དཔོན་སློབ་ཡོངས་ཀྱི་ཐུགས་མཐུན་ཁྲིམས་གཙང་ཞིང་།

དགེ་སྤྱོར་མཐར་ཕྱིན་སྙན་གྲགས་སྟོང་ཁམས་ཁྱབ།

ཞབས་པད་བསྐལ་བརྒྱར་བརྟན་པའི་ཚེ་གཡང་སྩོལ།

ལེགས་བཤད་འདོམ་ལ་གཞལ་བ་གདོང་ལྔའི་དབང་།

ལུང་རིག་སྒྲུབ་དང་སུན་འབྱིན་སྐད་གསང་དབྱངས།

ཆེར་སྒྲོག་ཕས་རྒོལ་གཉིས་འཐུང་ཚོགས་གཞོམ་པའི།

ཤེས་རབ་རྩལ་རྫོགས་གྲངས་མང་མཁས་གཡང་སྩོལ།

རྣམ་མང་ཟབ་སྟོན་ཤར་རིའི་ཕྲག་གོང་ལས།

ཐོན་པའི་བཅུད་ཕྲག་རིག་པའི་འོད་དཀར་གྱིས།

མོས་ལྡན་བློ་གསལ་ཤེས་བྱ་ཀུན་དྷ་ཡི།

ཚལ་ཆེན་ཡོངས་སུ་རྒྱས་པའི་གྲོལ་གཡང་སྩོལ།

སྡེ་སྣོད་འཛིན་པའི་སྐྱེས་མཆོག་ཙན་དན་ལྗོན།

འཆད་རྩོད་རྩོམ་པའི་དྲི་ཞིམ་ཡལ་འདབས་རྒྱས།

ཐོས་བསམ་སྒོམ་རྟོགས་མཆོག་གི་ལོ་འབྲས་སྨིན།

གྱེར་བསྟན་ཕྱོགས་བཅུར་འཛིན་སྐྱོང་སྤེལ་གཡང་སྩོལ།

བོད་ཉིད་ངོ་བོ་བརྡ་ཡི་ཤེས་རབ་མཚོན།

འགྲོ་ཀུན་བཟོད་དཀའི་སྡུག་ལ་སྤྱོར་བས།

ཀུན་བཏགས་ལྷན་སྐྱེས་སྙིང་ལ་བསྣུན་པ་ཡིས།

ཉོན་མོངས་གཡུལ་ལས་རྒྱལ་བའི་མཐུ་གཡང་སྩོལ།

བསྟན་སྲིད་ཕུན་སུམ་ཚོགས་པའི་རྐང་འཐུང་རྩེར།

དགེ་ལེགས་གསེར་གྱི་སྙེ་མ་གཡུར་ཟ་བས།

བསོད་ལྡན་སེམས་དཔའི་བཀྲེས་པ་རབ་སེལ་ནས།

ས་ལམ་མ་ལུས་བགྲོད་པའི་གཡང་ཁུག་ཅིག

སྲིད་ལ་རྒྱབ་ཕྱོགས་འཁོར་མཚོ་ལས་བསྒྲལ་ཕྱིར།

རྒྱལ་སྲས་སྤྱོད་པ་ཟབ་མོའི་གྲུ་ལ་ཞོན།

ཤེས་རབ་དད་བརྩོན་ཟུང་འབྲེལ་རྒྱག་བཅས་ནས།

ཐེག་མཆོག་ཡིད་བཞིན་ནོར་ལོན་དངོས་གྲུབ་སྩོལ།

སྐྱབས་ཡུལ་ཐུགས་རྗེས་སྨོན་ལམ་མཐུ་གྲུབ་སྟེ།

འགྲོ་ཀུན་བདེ་སྐྱིད་འདོད་དགུའི་གཏེར་ལ་དབང་།

སྲིད་ཞིའི་དཔལ་ཡོན་ལེགས་ཚོགས་གོང་འཕེལ་ནས།

བཤད་སྒྲུབ་བསྟན་པ་རྒྱས་པའི་བཀྲ་ཤིས་ཤོག

དེ་ལྟར་དད་མོས་རྩེ་གཅིག་གི

དག་སྣང་བློ་ཡིས་རབ་བསྐུལ་ནས།

བཤད་སྒུབ་བསྟན་པ་རྒྱས་ཕྱིར་དུ།

སྣང་བཙུན་ནམ་བློའི་མིང་གིས་བྲིས།

ཉེས་ཚོགས་བཤགས་ལ་དགེ་འབྲས་ཀྱིས།

གྱེར་བསྟན་དར་རྒྱས་ཡུན་གནས་ཤོག 

དགེའོ། བཀྲ་ཤིས་སོ།

ཁམས་གསུམ་འགྲོ་བའི་བླ་མ་སྣང་ཞིག་ནམ་མཁའ་བློ་གྲོས་དེ་ཉིད་ཀྱིས་མཛད་པའོ།