དོར་ཞི་གདོང་དྲུག་སྙེམས་བློ།
བོད་རིག་པའི་སློབ་དཔོན་ཆེན་མོ།
འབུམ་རམས་པའི་ཞིབ་འཇུག་སློབ་མའི་མཛུབ་སྟོན་དགེ་རྒན།
རྒྱལ་སྲིད་སྤྱི་ཁྱབ་ཁང་གི་སྲིད་གཞུང་ཆེད་དངུལ་བཞེས་བཞིན་པའི་ཆེད་ལས་མཁས་པ།
སྤྱིར་བོད་གངས་ཅན་གྱི་རིག་གནས་ལ་བོན་དང་ཆོས་དང་། དམངས་ཁྲོད་ཀྱི་རིག་གནས་གསུམ་དུ་ཕྱེ་བའི་བོན་བསྟན་རིག་གནས་ནི། བོད་ཀྱི་རིག་གནས་རིན་ཆེན་བང་མཛོད་ནང་གི་རིན་པོ་ཆེ་རྩ་ཆེན་ཞིག་ཡིན་པར་སྨོས་མ་དགོས། བོད་ཀྱི་རིག་གནས་རྒྱུན་འཛིན་དར་སྤེལ་བྱེད་པ་བོད་མི་རིགས་ཡོངས་ཀྱི་འགན་ཁུར་གལ་ཆེན་ཞིག་ཡིན་ཕྱིར། བོད་ཀྱི་རིག་གནས་ཀྱི་གྲུབ་ཆ་གལ་ཆེན་བོན་པོའི་རིག་གནས་རྒྱུན་འཛིན་དར་སྤེལ་བྱེད་པ་དང་། ཞིབ་འཇུག་སྲུང་སྐྱོབ་བྱེད་པ་སྐབས་བབས་ཀྱི་འགན་ཁུར་གལ་ཆེན་ཞིག་ཏུ་གྱུར་འདུག་གཤིས་བོན་པོའི་ཕྱོགས་ཀྱི་མཁས་པ་རྣམས་ཀྱིས་བོན་བསྟན་རིག་གནས་ཀྱི་དཔེ་ཚོགས་ཡིག་ཚང་འཚོལ་བསྒྲིགས་དཔེ་སྐྲུན་རྒྱ་ཆེར་སྤེལ་བ་ནི། བོད་ཀྱི་རིག་གནས་ཀྱི་ཕྱོགས་ལ་ཞབས་འདེགས་ཕྱག་རྗེས་གལ་ཆེན་ཡིན་པས། ང་རང་ནས་བོད་ཀྱི་རིག་གནས་ཀྱི་རྒྱུན་འཛིན་གྱི་བྱ་བ་འདི་ལ་ཁ་ཞེ་གཉིས་མེད་ཀྱིས་དགའ་སྤྲོ་དང་རྗེས་སུ་ཡི་རང་བྱ་བ་ལེགས་འགྲུབ་ཡོང་པའི་སྨོན་ཚིག་བཅས་ཞུ་ཞེས།
དོར་ཞི་གདོང་དྲུག་སྙེམས་བློར་འབོད་པས་བྲིས།
