ཆོས་རྒྱལ་ནམ་མཁའི་ནོར་བུ།
འཛམ་གླིང་བོད་རིག་པའི་ཞིབ་འཇུག་མཁས་ཆེན།
དབྱི་ཏ་ལི་ན་པོ་ལིས་ཤར་ཕྱོགས་སློབ་གྲྭ་ཆེན་མོའི་སློབ་དཔོན་ཆེན་མོ།
ཨེ་ཞི་ཡ་རྒྱལ་སྤྱིའི་མཐུན་སྒྲིལ་ཚོགས་པའི་ཚོགས་གཙོ།
སྨེ་ལོ༣༩༢༦ཙམ་གྱི་ལོ་རྒྱུས་དང་ལྡན་པའི་ཞང་བོད་ཀྱི་ཤེས་རིག་ནི་བོད་ཙམ་དུ་མ་ཟད་འཛམ་གླིང་སྤྱི་ཡོངས་ལ་སྨན་ཞིང་འགྲོ་བ་མིའི་རིགས་ཀུན་ནས་གཅེས་འཛིན་བྱེད་འོས་པའི་ཤེས་རིག་ནོར་བུའི་བང་མཛོད་ལྟ་བུ་ཞིག་ཏུ་ཆགས་ཡོད་པ་རེད།
ཆེས་རྙིང་ཞིང་རིན་ཐང་ཚད་ལས་འདས་པའི་ཤེས་རིག་དེ་རྣམས་ཀྱི་ཡ་ཐོག་གི་འབྱུང་ཁུངས་ནི་ཞང་ཞུང་སྒོ་ཕུག་བར་གསུམ་ནས་དར་རྒྱས་སུ་གྱུར་བའི་གནའ་བོའི་བོན་གྱི་ཤེས་རིག་དེ་ཙམ་དུ་ངེས་པ་ཡིན་སྟབས། སུ་ཞིག་བོད་ཀྱི་ཤེས་རིག་ལ་དོ་སྣང་ཡོད་པ་ཞིག་ཡིན་ཕྱིན་ཆད་བོན་གྱི་ཤེས་བྱ་རིག་པའི་གནས་ཀུན་ལ་དོ་སྣང་བྱེད་དགོས་ངེས་པ་ཞིག་ཆགས་ཡོད་པ་རེད།
དངོས་ཀྱི་གནས་ལུགས་དེ་ལ་བརྟེན། སྐབས་འདིར༼གངས་ཏི་སེ་བོན་གཞུང་རིག་མཛོད༽ཅེས་པའི་དཔེ་དེབ་གསར་སྒྲིག་གནང་བ་འདི་ནི་བོན་གྱི་ཤེས་བྱ་རིག་པའི་གནས་ཀུན་གྱི་གོ་རྟོགས་ལེགས་པར་ཆགས་ཐུབ་པའི་ཆ་རྐྱེན་རིན་ཐང་ཚད་ལས་འདས་པ་ཞིག་ཏུ་ངེས་པ་ཡིན་ལ། ཚུལ་འདི་ནི་བོན་ལུགས་ཀྱི་ཁོངས་སུ་གཏོགས་པའི་མཁྱེན་ལྡན་སློབ་གཉེར་བ་རྣམས་སུ་མ་ཟད། བོད་ཀྱི་ལོ་རྒྱུས་ལ་དོ་སྣང་ཡོད་ཚད་ལ་དགོས་གལ་ཤིན་ཏུ་ཆེ་བ་ཞིག་ཡིན་སྟབས། ཕྱི་ནང་གི་མཁྱེན་ལྡན་ཡོངས་ནས་རིན་ཐང་ཆེ་བའི་དཔེ་འདི་དག་ལ་དོ་སྣང་གནང་རོགས་ཞུ་རྒྱུ་ཡིན།
བདེ་ལེགས་ཀྱི་ཤིས་སྨོན་བཅས་ཆོས་རྒྱལ་ནམ་མཁའི་ནོར་བུས་ཕུལ།
