༄༅།། མཆོད་རྟེན་ཆེན་མོའི་སྨོན་ཚིག་བསམ་དོན་མྱུར་འགྲུབ་

ཅེས་བྱ་བ་བཞུགས་སོ།། 

བོན་བརྒྱ་སྨན་རི་བཤད་སྒྲུབ་སྨིན་གླིང་ནས།  །ཤར་ཕྱོགས་མངོན་པར་དགའ་བའི་མདུན་རིའི་སྟེང་།  །ལྷག་བསམ་རྣམ་པར་དག་པའི་ཀུན་སློང་གིས།  །མཆོད་རྟེན་བཅུ་གསུམ་བཞེངས་པ་ལེགས་པར་གྲུབ།  །བཀྲ་ཤིས་སྒོ་མང་མཆོད་རྟེན་ཆེན་པོ་ལྔས།  །འཛམ་གླིང་འཇིག་རྟེན་ཐམས་ཅད་བདེ་གྱུར་ཅིག  །བཀྲ་ཤིས་ཁྲི་སྐོས་ཉི་འོད་འབར་བ་ཡིས།  །ཤར་ཕྱོགས་རྒྱལ་ཁམས་ཀུན་ལ་བདེ་སྐྱིད་འབྱུང་།  །བཀྲ་ཤིས་འོད་འབར་ཟླ་ཟེར་འཕྲོ་བ་ཡིས།  །ནུབ་ཕྱོགས་རྒྱལ་ཁམས་ཐམས་ཅད་བདེ་ལེགས་འབྱུང་།  །བཀྲ་ཤིས་ལྷུན་པོ་རྫས་བརྒྱད་སྤུངས་པ་ཡིས།  །བྱང་ཕྱོགས་རྒྱལ་ཁམས་ཀུན་ལ་བདེ་སྐྱིད་རྒྱས།  །བཀྲ་ཤིས་གཡུང་དྲུང་དཔལ་བསྐྱེད་མཆོད་རྟེན་འདིས།  །མི་རིགས་ཀུན་ལ་རིག་གནས་འཕེལ་རྒྱས་ཤོག  །བསོད་ནམས་ལོངས་སྤྱོད་རྒྱས་པའི་མཆོད་རྟེན་འདིས།  །རྒྱལ་ཁམས་ཡོངས་ལ་དཔལ་འབྱོར་རྒྱས་གྱུར་ཅིག  །མི་དགེ་སྡིག་བཅུ་སྦྱོང་བྱེད་མཆོད་རྟེན་འདིས།  །སེམས་ཅན་ཀུན་ཀྱི་སྡིག་སྒྲིབ་བྱང་གྱུར་ཅིག  །བྱམས་པ་སྒྲིབ་སེལ་མཆོད་རྟེན་བྱིན་རླབས་ཀྱིས།  །འགྲོ་ཀུན་སྒྲིབ་གཉིས་རྣམ་པར་བྱང་བར་ཤོག  །སྦྱིན་པ་ཚོགས་རྫོགས་མཆོད་རྟེན་རིན་པོ་ཆེས།  །ཚོགས་གཉིས་རབ་རྫོགས་སངས་རྒྱས་མྱུར་ཐོབ་ཤོག  །རྒྱལ་བའི་བསྟན་པ་དར་ཞིང་རྒྱས་གྱུར་ཏེ།  །འགྲོ་བའི་བདེ་སྐྱིད་ཕུན་སུམ་ཚོགས་པར་ཤོག  །ས་གཡོ་རི་འགུལ་གནོད་པ་མི་འབྱུང་ཤོག  །མེ་ཆུ་འབྱུང་བས་འཇིག་པ་མེད་པར་ཤོག  །མི་མཐུན་འཐབ་རྩོད་འཁྲུག་པ་ཞི་གྱུར་ཅིག  །མཐུན་རྐྱེན་ལེགས་ཚོགས་ཡིད་བཞིན་འགྲུབ་གྱུར་ཅིག  །

མཆོད་རྟེན་བཅུ་གསུམ་ལེགས་འགྲུབ་བྱུང་བའི་སྨོན་ལམ་བསམ་དོན་མྱུར་འགྲུབ་འདི་ནི།  བོན་བརྒྱ་དགེ་ལེགས་ལྷུན་གྲུབ་རྒྱ་མཚོ་ནས་མཆོད་རྟེན་བརྒྱ་རྩ་བརྒྱད་ཀྱི་ནང་ནས་གལ་ཆེ་བ་བཅུ་གསུམ་བཞེངས་ཏེ་མཆོག་གསུམ་ལ་སྙིང་ནས་གསོལ་བ་བཏབས་ཏེ་སྨོན་པ་དེ་བཞིན་འགྲུབ་པར་གྱུར་ཅིག་གུ།