མཁས་པའི་ཡོན་ཏན་ཐོས་བསམ་རྩ་བ་བརྟན། །
གཞན་ཕན་སྙིང་རྗེ་ཁོ་ལག་ཕྱོགས་སུ་བྲེས། །
ངེས་དོན་སྒོམ་རྟོགས་འབྲས་བཟང་ཁུར་ལྕི་བའི། །
སྐྱེས་སྤྲུལ་དཔག་བསམ་ལྗོན་པར་སུ་མི་གུས། །
༡༽བོན་གྱི་སྐྱེས་ཆེན་བླ་སྤྲུལ་ཁག་གིས་༼གངས་ཏི་སེ་བོན་གཞུང་རིག་མཛོད་༽དཔེ་ཚོགས་ལ་
སྤྲིངས་པའི་བརྩེ་ཆེན་གསེར་ཞུན་ཐིགས་པ།
གཤེན་སྲས་ནོར་བུ་དབང་རྒྱལ།
རྒྱལ་བ་གཤེན་གྱི་གདུང་སྲས་རིན་པོ་ཆེ།
བོད་ལྗོངས་ནང་བསྟན་མཐུན་ཚོགས་ཀྱི་ཚོགས་གཞོན།
ཀྲུང་གོ་བོད་བརྒྱུད་ནང་བསྟན་མཐོ་རིམ་སློབ་གླིང་གི་གདན་ཞུའི་ཞིབ་འཇུག་པ།
ཤིས་ཚིག
བདེ་ལེགས་ཀུན་འབྱུང་ཡོན་ཏན་ནོར་བུའི་གཏེར། །
གཤེན་བསྟན་མདོ་སྔགས་ཁྲི་གདུགས་གཞོན་ནུའི་དཔལ། །
སྒོ་བཞི་མཛོད་ལྔ་ཐེག་དགུའི་འོད་སྟོང་བཅས། །
བསྟན་འགྲོའི་བསོད་ནམས་མཁའ་ལ་བསྐྲུན་འདི་དགེ། །
ཤར་རྫའི་རྒྱལ་ཚབ་མཐུ་སྟོབས་རྣམ་རྒྱལ།
ཀུན་མཁྱེན་ཤར་རྫ་བའི་རྒྱལ་ཚབ།
༡༩༢༥-༢༠༠༩ལོར་དགོངས་པ་བོན་དབྱིངས་སུ་གཤེགས།
སྨོན་ཚིག་དུང་གི་རང་སྒྲ།
གྲུབ་མཐའི་མཆོག་གྱུར་སངས་རྒྱས་གཡུང་དྲུང་བོན། །
འགྲོ་འདུལ་མཆོག་གྱུར་གཤེན་རབ་མི་བོ་ཆེས། །
སྐུ་གསུང་ཐུགས་ཀྱི་བསྟན་པ་སྤེལ་བ་བཞིན། །
སླར་ཡང་བཅོས་སླད་མེད་པར་མཐར་ཕྱིན་ཤོག །
ཅེས་པ་ཤར་རྫའི་རྒྱལ་ཚབ་མིང་འཛིན་མཐུ་སྟོབས་རྣམ་རྒྱལ་གྱིས།
བགྲང་བྱ་གྱ་བཞིའི་ཐོག་གཡུང་དྲུང་ལྷུན་པོའི་ཁྲོད་ནས་ས་གླང་ཟླ༤ཚེས༡༨ལ་སྨོན་པའོ། །
སྣང་ཞིག་སྐྱབས་མགོན་སྐལ་བཟང་བློ་གྲོས་རྒྱ་མཚོ།
སི་ཁྲོན་ཞིང་ཆེན་ནང་བསྟན་མཐུན་ཚོགས་ཀྱི་རྒྱུན་ལས་ལས་འཛིན།
གཡུང་དྲུང་བོན་མཉམ་འབྲེལ་མཐུན་ཚོགས་ཀྱི་ཚོགས་གཙོ།
མདོ་སྨད་རྔ་ཡུལ་སྣང་ཞིག་དགོན་ཆེན་གྱི་དགོན་བདག
སྨོན་ཚིག་ཟླ་བ་དཀར་པོའི་འཛུམ་ཞལ།
གྲངས་མེད་ཤེས་བྱའི་གནས་ཀུན་མཁྱེན་པའི་རྩལ། །
གཅིག་ཏུ་རྫོགས་པའི་ལྷ་མཆོག་སྨྲ་སེང་དང་། །
དྲུག་འགྱུར་དབྱངས་ཀྱི་དབང་མོ་མཚོ་བྱུང་མས། །
ཞིང་ཀུན་དགེ་བའི་མེ་ཏོག་ཆར་བཞིན་བསྙིལ། །
འདྲ་མིན་གྲུབ་མཐའི་རིག་གཞུང་བྲག་རིའི་དཔུང་། །
བསྒྲིགས་པའི་དབུས་ན་རིན་ཐང་མངོན་འཕགས་པའི། །
༼གངས་རྒྱལ་ཏི་སེ་བོན་གཞུང་རིག་མཛོད༽ཀྱིས། །
འཛམ་གླིང་མཁས་པའི་ཚོགས་ཀུན་དགྱེས་གྱུར་ཅིག །
རྒྱལ་གཤེན་བསྟན་པའི་རིང་ལུགས་དྲི་མེད་དཔལ། །
ཉམས་མེད་མཁའ་ལ་སྒྲེང་མཁས་རྒྱལ་བའི་སྲས། །
རྩེ་ཞིག་བསྟན་པའི་ཟླ་བ་གང་ཉིད་ཀྱི། །
རླབས་ཆེན་མཛད་འཕྲིན་ཉི་མའི་དཀྱིལ་འཁོར་ཤར། །
ཞེས་སྨོན་ཚིག་ཟླ་བ་དཀར་པོའི་འཛུམ་ཞལ་འདི་ཡང་སྣང་ཞིག་སྐྱབས་རྗེ་མིང་འཛིན་ཚུལ་ཁྲིམས་བསྐལ་བཟང་བློ་གྲོས་རྒྱ་མཚོ་རུ་འབོད་པས་བྲིས་སོ། །
བོན་བརྒྱ་དགེ་ལེགས་ལྷུན་གྲུབ་རྒྱ་མཚོ།
འཛམ་གླིང་བོད་རིག་པའི་ཞིབ་འཇུག་མཁས་ཆེན།
མདོ་སྨད་བྱང་བརྒྱུད་གཡུང་དྲུང་བོན་བསྟན་ཚོགས་པའི་དབུ་འཛིན།
མཚོ་སྔོན་རེབ་གོང་བོན་བརྒྱ་དགོན་གྱི་དགོན་བདག་བླ་མ།
ཤིས་ཚིག་ནོར་བུའི་དོ་ཤལ།
གངས་རིའི་ཕྲེང་བས་བསྐོར་བའི་ཡུལ་དབུས་ཀྱི། །
ཏི་སེ་མངོན་པར་བརྗིད་པའི་མཛེས་སྡུག་ལ། །
བོན་གཞུང་ཟླ་བ་སྟོང་གིས་འཁྱུད་པའི་དཔལ། །
རིག་མཛོད་བདུད་རྩིའི་འཛུམ་རླབས་ཕྱོགས་སུ་འཕྲོས། །
དེ་ཡིས་གཤེན་བསྟན་ཀུ་མུད་བཞད་དང་ལྷན། །
འགྲོ་རྣམས་རྒུད་པའི་མུན་པ་ཀུན་སངས་ནས། །
ཕན་བདེ་སྣང་བས་ས་ཆེན་གསུམ་དུ་ཁྱབ། །
རྫོགས་ལྡན་གསར་བའི་ལང་ཚོ་རྒྱས་གྱུར་ཅིག །
ཅེས་པའང་བོན་བརྒྱ་དགེ་ལེགས་ལྷུན་གྲུབ་རྒྱ་མཚོས་སྤེལ་བ་དགེ།
རྒྱ་འོབས་ཚུལ་ཁྲིམས་བསྟན་འཛིན་དབང་རྒྱལ།
གཡུང་དྲུང་བོན་མཉམ་འབྲེལ་མཐུན་ཚོགས་ཀྱི་བློ་འདྲི་ཞུ་ཡུལ།
རྔ་ཡུལ་སྣང་ཞིག་དགོན་ཆེན་གྱི་རྒྱལ་ཚབ་སློབ་དཔོན་ཆེན་མོ།
ཤིས་ཚིག
བཤད་སྒྲུབ་བསྟན་པའི་སྒོ་ཆེན་འབྱེད་པ་ལ། །
རྩ་བའི་ལྡེ་མིག་བཀའ་དང་བཀའ་བརྟེན་གནད། །
ཏི་སེ་བོན་གཞུང་རིག་མཛོད་དཔེ་ཚོགས་འདི། །
ཐར་བའི་ལམ་ཆེན་ཟིན་པའི་རྒྱུ་གྱུར་ཤོག །
༼གངས་ཏི་སེ་བོན་གཞུང་རིག་མཛོད༽དཔེ་ཚོགས་ཆེན་མོ་དཔར་བསྐྲུན་ཤིས་བརྗོད་ཙམ་དུ་རྒྱ་འོབས་བསྟན་འཛིན་དབང་རྒྱལ་ནས་སྤྲོ་བ་ཆེན་པོས་བཏེགས།
ཚུལ་ཆེན་ཐེག་མཆོག་བསྟན་པའི་ཉི་མ།
གཡུང་དྲུང་བོན་མཉམ་འབྲེལ་མཐུན་ཚོགས་ཀྱི་རྒྱུན་ལས་ཚོགས་གཞོན།
སི་ཁྲོན་རྔ་ཡུལ་རྟོགས་ལྡན་དགོན་ཆེན་གྱི་དགོན་བདག་བླ་མ།
༼གངས་ཏི་སེ་བོན་གཞུང་རིག་མཛོད༽ལ་ཕུལ་བའི་ཤིས་ཚིག
ངོ་མཚར་གངས་རྒྱལ་ཏི་སེའི། །
ངོ་མཚར་བོན་གཞུང་རིག་མཛོད། །
ངོ་མཚར་འཕྲུལ་གྱི་དཔེ་བསྐྲུན། །
ངོ་མཚར་ཤིན་ཏུ་ཆེ་འོ། །
མང་མང་ཤེས་བྱའི་རིག་གཞུང་རྒྱ་མཚོ་ལས། །
མཛེས་མཛེས་ཤེས་རིག་གསར་བའི་དགའ་ཚལ་བཞད། །
མཚར་མཚར་འཕྲུལ་ངག་སྦྲང་རྩིའི་དགའ་སྟོན་གྱིས། །
གསལ་གསལ་གླིང་བཞིའི་ཁྱོན་ལ་བདལ་བར་ཤོག །
ཅེས་རྔ་ལྗོངས་བོན་གྱི་འདུས་སྡེ་རྟོགས་ལྡན་དགོན་ཆེན་གྱི་ཁྲི་འཛིན་སོ་གསུམ་པ་
ཚུལ་ཆེན་ཐེག་མཆོག་སྨྲ་བའི་ཟླ་བ་ནས་གུས་པས་ཕུལ།
ཟླ་སྤྲུལ་རིན་ཆེན་ཕུན་ཚོགས།
བོད་རང་སྐྱོང་ལྗོངས་ཀྱི་དམངས་ཆེན་འཐུས་ཚབ།
ཆབ་མདོ་ས་ཁུལ་ནང་བསྟན་མཐུན་ཚོགས་ཀྱི་ཚོགས་གཞོན།
ཁྱུང་པོ་སྟེང་ཆེན་རྫོང་ཀོ་རྒྱལ་དགོན་གྱི་དབུ་བླ།
ཤིས་བརྗོད་འོད་ཀྱི་རང་མདངས།
གངས་རིའི་ཕྲེང་ཚོགས་བསྟར་བའི་ཡུལ་གྲུ་འདིའི། །
ཏི་སེའི་ངོ་མཚར་ལྔ་རིག་ཁ་འབབ་བཞིས། །
བོན་གཞུང་གསེར་གྱི་རྡུལ་ཕྱེ་ཕྱོགས་ཀུན་ཏུ། །
རིག་མཛོད་འགྲེམ་པའི་དགེ་མཚན་འདི་ཀོ་རྨད། །
ཅེས༼གངས་ཏི་སེ་བོན་གཞུང་རིག་མཛོད༽ཅེས་པའི་རླབས་ཆེ་བའི་རིག་གཞུང་འདི་ཉིད་འགྲེམ་སྤེལ་གནང་བར་ཁོ་བོས་སྙིང་ནས་ཡི་རང་དང༌། ལྷག་བསམ་ཟོལ་མེད་ཀྱི་སྒོ་ནས་བཀའ་དྲིན་ཆེ་ཞུ། ཞེས་ཁྱུང་ཡུལ་ཀོ་རྒྱལ་དགོན་གྱི་ཁྲི་འཛིན་པ་ཟླ་སྤྲུལ་རིན་ཆེན་ཕུན་ཚོགས་ཀྱིས༢༠༠༩ལོའི་ཟླ༡༠ཚེས༢༩ཉིན་ཕུལ།
སྨོན་རྒྱལ་ལྷ་སྲས་ཚོགས་གཉིས་རྒྱ་མཚོ།
སི་ཁྲོན་ཞིང་ཆེན་གྱི་དམངས་ཆེན་འཐུས་ཚབ།
སྡེ་དགེ་རྫོང་སྨོན་རྒྱལ་དགོན་གྱི་དབུ་བླ།
གསུང་རབ་གནས་དང་བོན་འཁོར་བསྐོར།
ཕྱི་རབས་རྒྱལ་གཤེན་བསྟན་པ་སྤེལ་བའི་ཆེད། །
སྟོན་པའི་བོན་གྱི་བཀའ་ལ་རྣམ་པ་གསུམ། །
ཞལ་ནས་གསུངས་དང་རྗེས་སུ་གནང་བ་དང་། །
ཉམས་སུ་ལེན་དང་བྱིན་གྱིས་རླབས་པ་གསུམ། །
གསུང་རབ་གནས་དང་བོན་འཁོར་བསྐོར་མཛད་པ། །
འཁོར་བ་སེམས་ཅན་ཉོན་མོངས་འདུལ་བའི་བོན། །
མདོ་སྔགས་སེམས་ཀྱི་རྒྱུད་སྡེར་སྤེལ་བའི་གཤེན། །
བསྟན་འགྲོ་མགོན་གྱུར་མཆོག་རྣམས་ཡིད་ནས་བཀུར། །
ཀུན་གྲོལ་ཧཱུཾཿཆེན་གླིང་བའི་གཏེར་སྲས་ཞེས་མིང་དུ་འབོད་པ་ལྷ་སྲས་ཚོགས་གཉིས་རྒྱ་མཚོ་ནས།
རྒྱ་ནག་བོན་གྱི་བཀའ་གཏེར་པར་འདེབས་ཁང་ནས་བོད་རབ་བྱུང་བཅུ་བདུན་པའི་ས་གླང་ལོ་ཟླ༤ཚེས༡༥ལ་ཕུལ།
སྐྱང་སྤྲུལ་དྲི་མེད་འོད་ཟེར།
རྒྱལ་ཁབ་རིམ་པའི་བོད་ཀྱི་གསོ་བ་རིག་པའི་རབ་འབྱམས་པ།
སི་ཁྲོན་མཛོད་དགེ་རྫོང་བོད་སྨན་ཁང་གི་འགོ་གཙོ་གཞོན་པ།
མཛོད་དགེ་རྫོང་འཕན་ཆུའི་ཨ་སྐྱིད་སྐྱང་ཚང་དགོན་གྱི་དགོན་བདག་བླ་མ།
སྨོན་ཚིག་ཕན་བདེ་གྲུ་ཆར།
དུས་མཐར་བོན་བསྟན་སྤེལ་བའི་སྐལ་ལྡན་ཚོས། །
གངས་དཀར་ཏི་སེ་བོན་གཞུང་དཔེ་ཚོགས་ཀྱི། །
བོན་སྦྱིན་བདུད་རྩིའི་གྲུ་ཆར་ལེགས་འཇོ་བས། །
བཤད་སྒྲུབ་བོན་སྤྱོད་དཔྱིད་དཔལ་རབ་བཞད་ཤོག །
ཅེས་པ་སྐྱང་སྤྲུལ་དྲི་མེད་འོད་ཟེར་གྱིས་བྲིས་པའོ། །
ཁྲི་བ་འཇམ་དབྱངས་མཁྱེན་རབ་རྒྱ་མཚོ།
གཡུང་དྲུང་བོན་མཉམ་འབྲེལ་མཐུན་ཚོགས་ཀྱི་བློ་འདྲི་ས།
རྔ་ཡུལ་རྟོགས་ལྡན་དགོན་ཆེན་གྱི་ཁྲི་བ།
རྟོགས་ལྡན་དགོན་ཞང་ཞུང་རྫོགས་ཆེན་སློབ་གླིང་གི་མཁན་པོ།
ཤིས་ཚིག
སྔོན་བྱོན་བོན་གྱི་ལེགས་བཤད་མེས་པོའི་རལ་ཀློང་ནས། །
ལེགས་བབས་བཅུ་ཕྲག་རིག་མཛོད་གང་གཱའི་རྒྱུན་བཟང་པོ། །
དོན་གཉེར་ཛ་ཧུས་ལེགས་བཏུང་ཞིང་འདིར་སླར་བསྐྲུན་པས། །
བསྟན་འགྲོར་ཕན་བདེའི་སྒོ་བརྒྱ་འབྱེད་འདི་ཨེ་མ་རྨད། །
རིས་འཛིན་བ་ཚྭས་མ་རྙོག་ཡིད་བཞིན་མཚོར། །
གཞུང་བཟང་སྟོང་གི་ཆུ་བོ་རོ་གཅིག་འདྲེས། །
དགོངས་དོན་ཝུ་བ་དཀར་པོའི་དོ་ཤལ་ཅན། །
སྐལ་བཟང་འཛིན་མར་འཁྱིལ་འདི་ཨེ་མ་རྨད། །
བཀྲ་ཤིས་མི་འགྱུར་གཡུང་དྲུང་རྟག་ཏུ་བརྟན། །
བཀྲ་ཤིས་བོན་གྱི་འཁོར་ལོ་གླིང་བཞིར་འཕགས། །
བཀྲ་ཤིས་བཤད་སྒྲུབ་པད་མའི་དགའ་ཚལ་རྒྱས། །
བཀྲ་ཤིས་འདོད་རྒུའི་ནོར་བུས་གང་བར་ཤོག །
ཅེས་སངས་རྒྱས་གཡུང་དྲུང་བོན་གྱི་བཅུ་ཕྲག་རིག་མཛོད་ཆེན་མོ་སྟེ༼གངས་ཏི་སེ་བོན་གཞུང་རིག་མཛོད༽ཀྱི་དཔེ་ཚོགས་པར་དུ་སྐྲུན་མཁན་ཡོངས་ལ་བཀའ་དྲིན་ཆེ་ཞེས་བསྔགས་བརྗོད་དང་འབྲེལ། བོན་བསྟན་དར་ཞིང་འགྲོ་ཀུན་བདེ་བའི་སྨོན་འདུན་བཅས་རྟོགས་ལྡན་ཁྲི་བ་འཇམ་དབྱངས་མཁྱེན་རབ་རྒྱ་མཚོ་ནས་བྲིས་པ་དགེ་གྱུར་ཅིག
གྲུབ་དབང་བསྟན་པའི་ཉི་མ།
བོད་ལྗོངས་ནག་ཆུ་ས་ཁུལ་ནང་བསྟན་མཐུན་ཚོགས་ཀྱི་ཚོགས་གཞོན།
སྲིད་གྲོས་ནག་ཆུ་ས་ཁུལ་གྱི་རྒྱུན་ལས་ལས་འཛིན།
ནག་ཆུ་སྙན་རོང་རྫོང་རྟིང་རྔུལ་དགོན་གྱི་དབུ་བླ།
ལྷག་བསམ་གྱི་སྨོན་འདུན།
༼གངས་ཏི་སེ་བོན་གཞུང་རིག་མཛོད༽དཔེ་ཚོགས་འདི་དཔེ་སྐྲུན་བྱས་པ་ནི་སྤྱིར་ཀྲུང་ཧྭ་མི་རིགས་ཀྱི་རིག་གནས་དར་སྤེལ་དང་སྒོས་སུ་གཡུང་དྲུང་བོན་གྱི་རིག་གནས་བཅས་ཕྱོགས་མང་པོའི་ཐོག་ནས་མི་ཉམས་གོང་འཕེལ་དང་ཉམས་པ་སླར་གསོ་བཅས་གྲུབ་འབྲས་ཆེན་པོ་ཡོད་པར་སྙིང་དབུས་ནས་ཐུགས་རྗེ་ཆེ་ཞུ་བའི་འཚམས་སྦྱར།
གྲུབ་དབང་བསྟན་པའི་ཉི་མ་ནས༢༠༠༩ལོའི་ཟླ༡༢ཚེས༡༨ཉིན།
