བོད་ཕྱི་ནང་གི་དྲ་གྲོགས་ལྷན་རྒྱས་སྐུ་ཁམས་བཟང་།  ཐོག་མར་མ་བསྐུལ་རང་འགུལ་གྱི་དགྱེས་ཚོར་ཆེན་པོའི་ངང་ཟིན་ཚོགས་འདིར་ཞུགས་མཁན་གྱི་དྲ་གྲོགས་དག་ལ་འཚམས་འདྲིའི་བཀྲ་ཤིས་བདེ་ལེགས་ཞུ།

ད་ནི་དུས་རབས་ཀྱི་འགྲོས་དང་བསྟུན་འཛམ་གླིང་ཡུལ་གྲུ་སོ་སོར་ཤེས་རིག་དང་དཔལ་འབྱོར་གྱི་འཕེལ་ཁ་ཀློང་ལས་བརྡོལ་ཞིང་།  ལྷག་པར་དུས་རབས་ཉེར་གཅིག་པ་འདི་བརྡ་འཕྲིན་གྱི་དུས་རབས་ལགས་པས་ཕྱོགས་གང་ཅིའི་ཐད་ནས་སྟབས་བདེ་དང་ཕན་ནུས་ཆེ་བའི་དུས་ངེས་ཅན་ལ་སླེབས་འདུག་རྐྱེན།  ངེད་ཅག་གིས་ཀྱང་བོད་ཀྱི་ཤེས་རིག་ལོ་རྒྱུས་སྤྱི་དང་ལྷག་དོན་གཡུང་དྲུང་གི་བོན་རིན་པོ་ཆེ་འདི་དར་སྤེལ་དང་ཁྱབ་བསྒྲགས་བྱེད་འདོད་ཀྱི་འདུན་པ་འགོག་མེད་དུ་འཆར་བ་དང་།  གཤེན་རབ་བསྟན་པའི་རིག་གནས་ལོ་རྒྱུས་ལ་སྦྱངས་གོམས་ཡོད་པའི་རྒྱལ་ཕྱི་ནང་གི་སྨྱུག་ཐོགས་པ་དང་ཀློག་པ་པོ་དག་གཅིག་འདྲེས་སུ་ཡོང་ཕྱིར་ཆེད་དུ་དཀའ་ངལ་ཁྱད་བསད་ཀྱིས་ཟིན་ཚོགས་འདི་སྒྲུབ་པ་ཡིན།  སླད་མར་ཟིན་བྲིས་སྤེལ་པ་པོ་དག་གིས་ཀྱང་གསལ་དག་གཙང་གསུམ་གྱི་སྒོ་ནས་སྤུས་ལྡན་གྱི་རྩོམ་ཡིག་རེ་འགོད་རྒྱུ་སྙིང་ནས་རེ།