༧ ཁྱུང་པོ་རྩེ་དྲུག་དགོན་གྱི་སྒྲུབ་གྲྭ་ཐེག་མཆོག་སྨིན་གྲོལ་གླིང་གི་མཁན་རབས་དང་པོ་ཁྱུང་ནག་མཁན་པོ་ཚུལ་ཁྲིམས་ཕུན་ཚོགས་ཀྱི་རྣམ་ཐར་མདོར་བསྡུས།
སྒྲུབ་མཁན་དྲང་སྲོང་བསྟན་འཛིན་རྣམ་རྒྱལ།
༧ ཞྭ་དཀར་བོན་གྱི་གཙུག་ནོར། མཁས་ཤིང་གྲུབ་པའི་དབང་ཕྱུག་ཀུན་མཁྱེན་འཇའ་ལུས་པ། དཔལ་རྒྱལ་བ་ཤར་རྫ་པ་བཀྲིས་རྒྱལ་མཚན་མཆོག་གི་སྐུ་ངོ་མས་བསྐྱངས་མཛད་པ། རྣམ་དཔྱོད་ཀྱི་རིག་རྩལ་ཤིན་ཏུ་འབར་ཞིང་བསྟན་འགྲོའི་བྱ་བ་བསྐྲུན་ལ་སྙིང་སྟོབས་ཕུལ་དུ་བྱུང་བའི་མཁས་པ་ཆེན་པོ་ཁྱུང་ནག་མཁན་པོ་ཚུལ་ཁྲིམས་ཕུན་ཚོགས་མཆོག་ནི། རྨད་བྱུང་ས་ཡི་ཐིག་ལེ་ཞང་ཞུང་སྒོ་པ་ཤེལ་ལེ་རྒྱ་སྐར་གནས་ཀྱི་ཉེ་ཆར། གནམ་སའི་བར་གྱི་ལོ་རྒྱུས་ཡུན་རིང་ལྡན་པ་ཁྱུང་པོ་དཀར་ནག་སེར་གསུམ་ཞེས་པའི་ཡུལ་ཁམས། ཁྱུང་པོ་ནག་རུའི་ས་ཆར་ལྷ་མཐོང་གྲོང་མཁར་སྤ་ཚང་ཞེས་པའི་དུད་ཁྱིམ་དུ།བསྐྱེད་བྱེད་ཡབ་ཀྱི་གདུང་ནི་མི་ཆོས་ཀྱི་རང་ཚུགས་བཟང་ལ། ལྷ་ཆོས་ལ་བློ་སེམས་དཀར་བའི་ཟླ་སེ་གཡུང་དྲུང་ལྷ་རྒྱལ་དང་། སྨིན་བྱེད་ཡུམ་གྱི་མི་མོ་ཤེས་རིག་བཀྲ་བའི་ལྷོ་ཁ་གཏམ་སྟོད་ཝ་ཞིག་བཟའ་གཉིས་ཀྱི་སྲས་སུ། འབྱུང་ལྡན་༢༩༩ བོད་ས་ཕག སྤྱི་ལོ་༡༨༩༩ ལོར་སྐུ་འཁྲུངས་ཤིང་ཆུང་ནས་བློ་གྲོས་གསལ་ལ་སྔོན་སྦྱངས་ལས་འཕྲོ་བཟང་པོའི་རིགས་སད་ནས་བོན་སྒོར་ཞུགས་ཤིང་རབ་བྱུང་མཛད།དགུང་ལོ་གཞོན་ནུ་ལ་ལོན་སྐབས་ཤར་རྫའི་སྟོན་པ་མཆོག་གི་མཚན་སྙན་ལ་དད་གུས་ཐུན་མོང་མ་ཡིན་པར་འཁྲུངས་ཏེ། མདོ་སྨད་ཤར་རྫ་ཁོག་ཏུ་བྱོན་པ་དང་། གྲུབ་དབང་བཀྲིས་རྒྱལ་མཚན་མཆོག་གི་གསེར་ཞལ་ཐོག་མར་མཇལ་དུས་ས་དང་པོ་ཐོབ་པ་ལྟ་བུའི་དགའ་བ་དངོས་སུ་ཤར། དེ་ནས་བཟུང་ཐོག་མར་སྔོན་འགྲོ་བཀའ་ལུང་རྒྱ་མཚོ་ནས་བློ་སྦྱངས་མཛད་ཅིང་ཉིན་མཚན་ལྟོས་མེད་ཀྱི་སྒོ་ནས་འཁོར་ངན་གྱི་རྩ་བ་བདག་འཛིན་མ་རིག་པ་འདི་ཡིན་པ་ཐུགས་ལ་བརྣག་བཞིན་དེ་ཉིད་འདུར་ཐབས་ཁོ་ན་བརྩོན་ཏེ། རིམ་བཞིན་རྒྱུད་མ་སྨིན་པ་སྨིན་པ་དང་། སྨིན་པ་གྲོལ་བ། གྲོལ་བ་མཐར་ཕྱིན་པའི་བོན་ལ་གོ་རིམ་ལྟར་ཐོས་བསམ་སྒོམ་པའི་སྦྱོང་བརྩོན་ལ་འབད་བཞིན་ལོ་བཅུ་གསུམ་ཙམ་དུ་ཤར་རྫ་ལ་བཞུགས། དེ་སྐབས་སྒྲོན་མེའི་ཆ་རྐྱེན་དཀོན་པར་བརྟེན། མཚན་མོར་མེ་ར་ནང་དུ་ཤིང་བུ་ཁྲ་མོ་སྦས་ཏེ་ཤིང་བུ་ཁྲ་ཐུར་མེ་དང་འཕྲད་རྗེས་དེ་ཉིད་ཡིག་ཕྲེང་རེ་ལ་བསྟན་ནས་བློ་ལ་འཛིན་བཞིན་སྦྱོང་བརྡར་དང་། སྒོ་ལ་ཆབ་གསང་འབྱོན་སྐབས་ཀྱང་རྐང་རྗེན་ལ་ཡར་མར་མགྱོགས་རྒྱུག་བཏང་བ་ལས། ཁ་གཡེང་མིག་གཡེང་གཏན་ནས་བྱས་མྱོངས་མེད་ལ། ཉི་ར་ལའང་ཐང་ཡུན་ཙམ་སྡད་པ་གྲོགས་མཆེད་ཀུན་གྱིས་མཐོང་མྱོངས་མེད། དེ་ནས་ཀུན་མཁྱེན་ཤར་རྫ་པས་ཁྱུང་པོའི་ཡུལ་དུ་བཤད་སྒྲུབ་ལས་ཀྱི་འཁོར་ལོས་གདུལ་བྱར་སྨིན་གྲོལ་མཛད་རྒྱུའི་དགོངས་བཞེད་བཀའ་ལུང་གི་ཞལ་ཆབ་སྤྱི་བོར་ཕབ་པ་དང་། མ་འོངས་པར་ཁྱེད་ཉིད་ཀྱིས་གོང་མཁའ་ལར་སྒྲུབ་གྲྭ་གཟུག་སྟེ་མཁན་པོ་བྱ་དགོས་པའི་ལུང་གི་ཅོད་པན་ཡང་གནང་བར་བརྟེན། རྗེས་སུ་ཁྱུང་ཡུལ་དུ་ཡར་ཕེབས་ནས་ནག་རུའི་རྫོང་སྲིབ་ལ་མི་དང་འབྲེལ་གཏུགས་མེད་པར་བཅད་རྒྱ་དམ་པོར་བཞུགས། སླར་ཡང་དགུང་ལོ་སོ་དྲུག་ཤིང་ཁྱི་ལོར་རྩེ་དགོན་བླ་མ་རྣམས་ཀྱིས་གདན་ཞུས་ལྟར། ཁྱུང་པོ་རྩེ་དྲུག་དགོན་དུ་བྱོན་ནས་གྲུབ་དབང་མང་གའི་གསུང་འབུམ་ཆ་ཚང་གི་བཤད་ཁྲིད་ལོ་གསུམ་ལ་གནང་ནས་སྨིན་གྲོལ་གྱི་འབྱུང་རྩ་སྒྲུབ་གྲྭ་འདི་ཉིད་ཀྱི་བསྟན་པའི་བླ་སྲོག་ཏུ་གྱུར། དེར་མཐུན་གྱི་བཤད་སྒྲུབ་སྒོམ་པའི་ཆ་རྐྱེན་སྒྲུབ་སྡེ་སྐྱོང་ལུགས་ཀྱི་ཟིན་བྲིས་དང་། སྔོན་འགྲོ་བཀའ་ལུང་རྒྱ་མཚོའི་དཀའ་གནད་ཀྱི་ཟུར་བརྒྱན་ནོར་བུའི་ཕྲེང་བ་བཅས་ལྗགས་རྩོམ་གནང་བས་བཀའ་དྲིན་བླ་ན་འབར། རྒྱུད་འཛིན་བུ་སློབ་ནི་དོན་གྱི་རྣལ་འབྱོར་པ་ཆེན་པོ་བརྩོན་འགྲུས་རྒྱལ་མཚན་དང་། རྣམ་དཔྱོད་རིག་པའི་རྩལ་ལྡན་སྨོན་ལམ་བསྟན་འཛིན། ཁྲ་རྒན་མཁན་པོ་སྐལ་བཟང་གཡུང་དྲུང་། མཚམས་པ་རྣམ་དག་དོན་ལྡན། ནག་རུ་གཡུང་དྲུང་དགེ་ལེགས། མཁན་པོ་ཚུལ་ཁྲིམས་རྒྱལ་མཚན་སོགས་མི་གྲངས་བཅུ་གསུམ་ཡར་བརྒལ་སྨིན་གྲོལ་གྱིས་བསྐྱངས་པས་བསླབ་གསུམ་ངུར་སྨྲིག་འཛིན་པ་ཤ་སྟག་གྱུར། དེ་ནས་ཁོང་གི་དངོས་སློབ་བརྩོན་འགྲུས་རྒྱལ་མཚན་མཆོག་སྒྲུབ་གྲྭའི་མཁན་པོར་བསྐོས་ནས་ཁོང་ནག་རུ་ལ་ཡར་བྱོན་ནས་རི་དམར་གྱི་མདུན་ངོས་ཁྱུང་པོ་ནག་རུའི་ས་ཆ་གོང་མཁའ་ལའམ་གཟི་ཀའི་རི་ཁྲོད་ཞེས་པའི་ས་ཆར་སྒྲུབ་གྲྭ་གཟུག་རྒྱུའི་རྨིང་གཞི་རྒྱ་ཆེན་གཏིང་ཞིང་དམ་པ་ཁོང་ནི་སྒྲུབ་ཕུག་ཏུ་བཞུགས་ནས། དད་ལྡན་སློབ་མ་རྣམས་ལ་སྔོན་འགྲོ་དང་དངོས་གཞི་རྩ་རླུང་བཅས་བཤད་ཁྲིད་རྒྱ་ཆེར་གནང་ཞིང་སྒྲུབ་གྲྭ་བཙུགས། བར་མཚམས་སུ་སྦྲ་ཆེན་སྤ་ཚང་དགོན་གཡུང་དྲུང་རབ་བསྟན་གླིང་མན་ཧོར་ཁྱུང་གཉིས་ཀྱི་བོན་དགོན་ཁག་རྣམས་ལ་ཀུན་མཁྱེན་གྲུབ་དབང་མཆོག་གི་སྒྲུབ་སྡེའི་སྒོ་མོ་ཡངས་པོར་གསར་དུ་ཕྱེས་ཏེ། སྤ་འབྲུག་རིན་པོ་ཆེ་དང་། དགེ་སློང་བསྟན་འཛིན་དབང་གྲགས། རག་ཤི་རྟོགས་ལྡན། དེ་བཞིན་ཁྱུང་པོའི་བླ་ཆེན་ཁག་ལ་ཀུན་མཁྱེན་འཇའ་ལུས་པའི་གསུང་འབུམ་གྱི་ཁྲིད་ལུང་དང་རྫོགས་ཆེན་དབང་བཞི་བཅས་ཀྱི་བསྟན་པའི་རྒྱལ་མཚན་ཕྱོགས་ཀུན་ལ་མཐོན་པོར་བསྒྲེངས། ཕྱིས་སུ་ནག་རུ་དཔོན་དང་མི་གྲགས་འགས་ནག་རུ་དགོན་དུ་བཞུགས་རྒྱུའི་རེ་བ་ཞུས་པ་དང་ཆབས་ཅིག ཤར་རྫའི་རྒྱལ་ཚབ་བློ་གྲོས་རྒྱ་མཚོ་མཆོག་གིས་བཀའ་ལུང་སྤྱི་བོའི་རྒྱན་དུ་ཕབ་པས་དགོན་པར་ཐུགས་འགན་བཞེས་ཞོར་ཤར་རྫའི་སྒྲུབ་རྒྱུད་ཀྱི་བསྟན་པ་བསྐྱངས་ནས་ནག་རུ་དགོན་དུ་བཞུགས། བར་མཚམས་ནག་རུ་དགོན་པའི་ཕྱི་ནང་གི་རྟེན་བཞེངས་ལེགས་སྐྲུན་སོགས་ཀྱི་ཆེད་དུ་དཀའ་བ་ཁྱད་བསད་ངལ་བ་དང་དུ་བླངས་ནས་བསྟན་འགྲོ་གཉིས་དོན་དུ་མཛད་འཕྲིན་རྒྱ་ཆེན་བསྐྱངས་པའོ།། མདོར་ན་ཁོང་གིས་དུས་ཚོད་ཐུང་ཐུང་ཞིག་གི་ནང་སྨིན་གྲོལ་རྒྱ་ཆེན་བསྒྲུབས་ཐུབ་པ་ནི་བསམ་ཡུལ་ལས་འདས་པའི་བཀའ་དྲིན་ཞིག་ཀྱང་ཡིན་སྲིད། ཕྱིས་སུ་གནམ་ས་བླ་འོག་གི་འཕོ་འགྱུར་ལྟ་བུའི་དུས་ཀྱི་འབྱུང་འགྲོས་ཀྱི་ཕམ་ཁ་ཐེངས་གཅིག་ལ། སྟེང་ཆེན་སྦྱོང་བརྡར་ནང་དུ་བཞུགས་དགོས་བྱུང་ཞིང་། དེ་སྐབས་ཁོང་གི་ཞལ་ནས་ཀྱང་རང་ཉིད་སྐྱེ་བ་འདི་ལ་རང་རྒྱུད་ཀྱི་ཡོན་ཏན་དཔེར་ན།བཅོ་ལྔའི་དུང་ཟླ་ལྟ་བུའི་ཆ་ཤས་ཡོངས་སུ་རྫོགས་པ་མིན་ཡང་། ཚེས་བཅུ་དང་བཅུ་གཅིག་ལྟ་བུའི་ཚད་ཀྱི་ཡོན་ཏན་ཡོད་བསམ་པ་བྱུང་བས་དུས་ཚོད་འདི་ལྟ་བུའི་ནང་རང་གིས་བསྟན་པའི་བྱ་བ་བློ་བདེ་བ་ཞིག་བསྒྲུབ་ཐུབ་མ་སོང་། ད་ལན་གསོན་པོར་བསྡད་པའི་དོན་འགྲུབ་རྒྱུ་དཀའ་འདུག་པས། ང་རང་མྱ་ངན་ལས་འདས་རྒྱུ་ཡིན། དེ་ལུགས་བླ་གྲྭ་རྣམས་ཀྱིས་འཕྲིན་བཅོལ་མཛོད། མ་འོངས་པར་བཤད་སྒྲུབ་ཀྱི་བསྟན་པ་འདི་ཡི་འཕྲོ་བསྐྱང་རྒྱུའི་སྨོན་ལམ་ཡང་ཡང་མཛད་རྒྱུ་ཡིན་གསུངས་ནས། དགུང་ལོ་༦༡ སྤྱི་ལོ་༡༩༥༩ ལོར་ཟླ་བ་༨ ནང་གཟུགས་སྐུའི་བཀོད་པ་བོན་དབྱིངས་སུ་བསྡུས་ནས་འདས་སོ།།
གང་གི་རྩོམ་ཡིག་འདི་ཞང་བོད་མེས་པོའི་འོད་ཟེར་ལོ་དེབ་དང་པོ་ལས་དྲངས་ཏེ་/༢༠༢༠/༤/༢༥/ཉིན་འདིར་བཀོད་དོ།།
