མིག་ཟུང་རྒྱང་དུ་འཕངས་འདུག

          སྲིད་པ་གནས་འགྲོ་བུ་མོས།།

         ཆར་རླུང་སྨུག་པའི་ས་མཐར།།

      ཟུར་མིག་རྒྱང་ནས་འཕངས་ཏེ།།

         ཡིད་མཐུན་ལྷ་ཡི་གྲོགས་ལ།།

        སྒོ་གསུམ་རེ་ལྟོས་བཅོལ་ཆེ།།

         འཕྱ་བའི་མི་ཁ་མ་འཛེམས།།

       སྨོད་པའི་ཁྲེལ་ལ་མ་བརྩིས།།

      སྦད་ཐག་ཧྲིག་ཏུ་བཅད་སྟེ།།

   གནས་འགྲོའི་ལས་དབང་འཚོལ་བའི།།

  གོམ་བསྐྱོད་རླུང་ཤུགས་ཆེར་གཏོང་།།

       

         གཞིས་ཀྱི་བེའུ་ལུག་འབྲི་མོའི།།

    གདང་ཐག་ཕྲེང་བ་མཛེས་ཀྱང་།། 

         ད་ནང་ཞོགས་པ་ཞིག་ལ།།

     ཕྱུག་བདག་གནས་འགྲོ་བུ་མོས།།

       ཁྱོད་ཚོར་ཕྱིར་བལྟས་མ་བྱས།།

     

       སྲིད་པ་གནས་འགྲོ་མ་ཡིས།།

      ཚུར་ཀའི་གཞིས་སུ་མ་ཆགས།།

     བྱིའུ་ཆུང་འཇོལ་མོའི་གཤོག་ཟུང་།།

        དུང་བའི་ཕྱོགས་སུ་རྐྱོང་ནས།།

        ཆ་མེད་ཡུལ་དུ་ཆས་སོང་།།

        ཕར་རིའི་རི་ཡི་པང་གི།

        བརྩེ་བའི་ཨོ་ལོ་བཀྲིས།།

     དུང་བའི་མིག་ཆུ་གཞུར་རོགས།།

         དྲན་པ་ལྡ་ངེ་ལྔིང་ངེ་།།

     དེ་ཡི་ཕྱོགས་སུ་དེང་སོང་།།

       མཐོན་པོའི་ལ་ལ་མ་འཛེམས།།

     དམའ་མོའི་འཕྲང་ལ་མ་དོགས།།

   བསླུ་མེད་ལས་དབང་བཙན་པོས།།

       རྒྱང་མིག་བྱང་དུ་གཏད་ཞོར།།

      སྨུག་སྤྲིན་གསེབ་ནས་བུད་སོང་།།

          བདག་པོའི་གོ་ས་མེད་ལ།།

         གཡོག་པོའི་ཨ་གླ་མེད་པའི།།

          གོ་ལུས་བུ་མོ་ཞིག་ལས།།

        རྒྱང་རིང་བྱང་ཐང་ཞིག་ནས།།

        ཁེར་གླུ་ལེན་བཞིན་ཆས་དགའ།།

     

          མཛེས་པའི་ལང་ཚོ་མེད་ཀྱང་།།

      འདུག་དབང་སྲིད་པས་མ་གནང་།།

        སྣུབས་ལྷུག་བུ་ཆུང་ཚང་གི།

      མ་གཞིས་ཐལ་འཚུབས་བཟུང་རྒྱུ།།

        གནས་འགྲོ་བུ་མོའི་ལས་རེད།།

༢༠༡༤-༨-༡༦-ད་ལྟ་ཁྱུང་བསོད་ནམས་བློ་གྲོས་ནས་བྲིས།