རེ་བ་འགྲུབ་ལ་ཉེའོ།
ཁྱུང་བསོད་བློ།
ལས་ཉོན་འདུ་ལོང་རྒོད་པོའི་ཚོར་བའི་གསེབ་དང་།།
སེམས་ཀྱི་ཤ་དང་རུས་པ་ཉེ་ས་ཞིག་ནས།།
ཤེས་བྱའི་ལ་རྒོད་གཤག་ལ་རེ་བ་བཅང་པ།།
སྡོང་གྲོཌ་ལྷ་ལ་ཞུས་པའི་ལས་དོན་འགྲུབ་རན།།
ཁྱོད་ཚོ་རེ་བའི་རྒྱལ་པོའི་རེ་བ་བརླགས་མེད།།
ཀ་བཞི་གདུང་དྲུག་ལྕམ་གྱི་ཁྱིམ་ཚང་ཞིག་དང་།།
ཡང་མེས་མི་རབས་སྟོང་གི་ཐབ་རྩ་ཞིག་ནས།།
ནངས་ནུབ་ཤུཌ་སུ་བོས་པའི་ཕ་མའི་སྨོན་པ།།
ལ་རྩེ་རྐང་པས་མནན་བཞིན་འགྲུབ་ལ་ཉེ་སོང་།།
ཁྱོད་ཚོ་རེ་བའི་རྒྱལ་པོའི་རེ་བ་བརླགས་མེད།།
མགོན་གྱི་སློབ་དཔོན་ཆེན་མོས་བརྩེ་བ་ཟབ་ས།།
བྱམས་ཀྱི་ཕ་མ་ཕུ་ནུས་དུང་བ་ཆེ་ས།།
ཟབ་གདམས་མཆེད་པོ་ཤག་གིས་སེམས་པ་ཐིམ་ས།།
ཡ་མེད་ཁེར་རྐྱང་བློ་བདེའི་གྲྭ་རྐྱང་བདག་གི།
ལོ་མང་དཀའ་ཚེཌ་སྟོང་གི་ལག་རྗེས་འགྲུབ་རན།།
ཀི་ཀི་ལ་རྩེ་གསོལ་བའི་ཉིན་མོ་ཞིག་ལ།།
སྤུན་ཤག་དགོད་སྒྲའི་དཔལ་ལ་ཤུཌ་སུ་བཀྱོན་པའི།།
གནམ་ལོའི་ལྟས་བཟང་སྐར་མ་ཚེས་ལ་རན་ཡོད།།
དྲིན་ཅན་མིང་སྲིང་ཕུ་ནུས་ཡུན་རིང་ཞིག་ལ།།
སྒོ་གསུམ་ཤུགས་སུ་བོས་པའི་རེ་བ་བརླགས་མེད།།
ཚེ་གཅིག་ཟ་ཁ་གདངས་མཁན་གྲྭ་རྐྱང་ཉིད་ལ།།
བཅུ་རིག་ཉིང་བཅུད་བསྩལ་བའི་སློབ་གླིང་ཁྱེད་དང་།།
བརྩེ་སེམས་བདག་ལ་ཐིམ་པའི་ཕ་མ་ཕུ་ནུས།།
བཟས་ཆས་གོ་སྒྲིག་ནོམ་པོའི་བཀའ་དྲིན་དེ་ནི།།
ནམ་ཡང་སེམས་ཀྱི་མཐིལ་ནས་བརྗེད་ཐབས་མེད་དོ།།
བཤད་གྲའི་གངས་ལ་དཀར་པོ་གཤག་འདོད་ཆེ་བས།།
དཀའ་ཚེཌ་གྲངས་མེད་འཕྲང་ལ་ཤེད་དུ་བསྲན་ཏེ།།
གྱ་གྱུ་འཕར་ལྡིང་མང་པོའི་ཚོར་བའི་གསེབ་ནས།།
ཡིད་ཆོད་རྒོད་པོའི་དམ་བཅའ་རྡོ་ལ་བཞག་སྟེ།།
དཀའ་བ་བརྒྱ་ཡི་ལས་མཐའ་འཁྱོང་ལ་རན་ཡོད།།
ཡོད་ཚད་སེམས་ཀྱིས་དཀར་དཀར་ང་ལ་མཆོད་མཆོད།།
ནུས་ཚད་ཡོད་རྒུ་རྩལ་གྱིས་ང་ལ་བསྟོད་བསྟོད།།
བྱམས་ཀྱི་ཕ་མ་ཕུ་ནུས་ང་ཉིད་བསྐྱངས་བ།།
ཤ་དང་རུས་པའི་གསེབ་ནས་ཕྱིར་དྲན་ཤོར་སོང་།།
སྒོ་གསུམ་ཐལ་མོ་སྦྱར་བཞིན་བཀའ་དྲིན་ཞུ་རྒྱུ།།
༢༠༡༦/༢/༡༣/མཉམ་མེད་དུས་ཆེན་ཉིན་བཀའ་དྲིན་མཁན་སློབ་ཟུང་གིས་ངེད་ཅག་ལ་བཀའ་རམས་པའི་མཚན་བཟང་གནང་ཉིན་མོར་བྲིས་སོ།།
