བག་ཆགས་དཀར་པོ།
དབྱངས་གསལ་སོག་སླས་བྱས་པའི་འུར་ཆ་ཞིག་ལ།།
ཚིག་གི་སྒྱུ་འཕྲུལ་ཚང་བའི་རོལ་ཆ་ཞིག་དང་།།
སྨྱུག་གི་ཁ་ཕྲུ་དཀར་པོའི་མངར་ཆ་དགོས་པས།།
ལྷ་མོ་དབྱངས་ཅན་མ་ལ་གསོལ་འདེབས་ཞུ་འདོད།།
ཉམས་ཀྱི་ལང་ཚོ་རྒྱས་པའི་མཚེར་ས་ཞིག་ནས།།
སེམས་ཀྱི་མེ་ཏོག་བཞད་པའི་དབྱར་ཟླ་ཚེས་དུས།།
ཟེ་འབྲུ་ཡིད་ལ་བབས་པའི་བག་ཆགས་དཀར་པོ།།
ནམ་ཡང་ཡལ་བ་མེད་པར་ཡང་ཡང་ལྡང་སྲིད།།
ཁ་དོག་སྐྱོ་ཉམས་དོད་པའི་ནམ་ཟླ་ཞིག་གིས།།
བག་ཆགས་སྐྱི་བསིར་སྡེབ་ནས་རྒྱང་ལ་བཀར་དུས།།
ལན་ཆགས་སྟོང་གིས་བསྙོགས་པའི་ཕྱི་དྲན་དྲོད་མོས།།
ཁ་བའི་རྐང་རྗེས་འདེད་མཁན་བགྲང་ཚོད་མེད་དོ།།
ཁ་སྒོ་སྐྱེ་འབྲས་ལེགས་པའི་ཚད་ཅིག་མ་རྫོགས།།
འཚོ་བ་ངན་ངོན་ཙམ་ལས་རྒྱས་སྤྲོས་མེད་ཀྱང་།།
ཞེ་མདངས་སེམས་པ་དཀར་པོའི་བློ་ཞིག་ཡོད་ཚེ།།
ཚེ་ཁ་སྐྱིད་ཀྱི་ཉི་མ་ཀླད་ནས་ཤར་སྲིད།།
སེམས་ཀྱི་འཕང་ལམ་ཡངས་པའི་བད་འོག་ཅིག་ནས།།
སྐར་ཁྱུ་འཁྱགས་འདར་ཤོར་བའི་དགུན་གཞུང་ཚེས་དུས།།
ལྷགས་ཀས་འཁྱག་རུམ་རྩེག་པའི་སྒང་ཟེ་འགྲིམ་མཁན།།
ཟླ་བ་ཁེར་བཞུད་བྱས་པའི་གཏམ་རྒྱུད་མང་ངོ་།།
ལང་ཚོ་ན་མ་སོན་པའི་སྐྱིད་སྡུག་གསེབ་ཏུ།།
མཚར་འབྲས་སྟོབས་མ་རྫོགས་པའི་སྐྱོ་ཉམས་དོད་ཀྱང་།།
བག་ཆགས་ལན་བརྒྱ་འཇོག་པའི་ཟུར་མིག་རྣོན་པོས།
དུང་བའི་འཛུམ་ཞགས་འཕེན་མཁན་ཉུང་ཉུང་མ་ཡིན།།
དུང་བ་མངར་མངར་ཞིག་ལ་མྱོང་རོལ་མ་བྱས།།
སེམས་པ་དམར་དམར་དེ་ཡིས་གཅེས་གཅེས་མ་བྱས།།
ཉམས་ལ་ཡ་ལན་མེད་པའི་ཁེར་ཚུགས་བསྐྱེལ་ཡང་།།
རྒྱུད་ལ་གོ་རྟོགས་ལོན་མཁན་ཉུང་ཉུང་ཡིན་ཚོད།།
སྣང་བའི་ཐལ་ཞག་འཁྲིག་པའི་ས་མཐའ་ཞིག་ནས།།
སེམས་པའི་ཞེ་མདངས་དཀར་སའི་གྲོགས་པོ་གླེང་དུས།།
སྐྱིད་སྡུག་བཞུད་ལམ་གཅིག་པའི་སྐྱེ་བོ་སུ་ཡིས།།
ཁ་ཆག་སྣ་རལ་ཤོར་བའི་རེ་དོགས་མི་དགོས།།
༢༠༢༠/༡༠/༡༡/ཉིན་གྱི་ཞོགས་པར་-ཁྱུང་བསོད་ནམས་བློ་གྲོས་-འབོད་པས་བྲིས།
