ལྷ་དགྱེས་པའི་ཕྱེ་མར་སྤྲིན་དཀར་ཕང་ཕུང་།

              ཁྱུང་བསོད་བློ།

མེས་པོའི་རྣམ་ཤེས་སྒྲོམ་པའི་དུར་ས་རུ།།
ཆོ་རབས་ཕྱྭ་ཡིས་རྩེད་ནས་ལྷ་ཆ་དཀྲོལ།།
འབྲུ་ཐེམ་བྲག་ལ་དོད་པའི་གླེག་བམ་བཀླགས།།
གཤེན་གྱི་སྨྲང་སྐད་འཚེར་བའི་གསང་གཏམ་མང་།།

ཀ་ཡེའི་མྱེས་ལྷ་གསོལ་བའི་དབྱིངས་རུམ་ནས།།
མུ་ཁྱུང་ལྷ་རུ་སྤྲུལ་པས་གཤེན་དར་བཙུགས།།
ཕ་འབབ་བུ་ལ་གནང་སའི་མཚེར་སྒར་བཏབ།།
བཀའ་སྒྲོམ་བྱིན་དང་དབུ་འཕང་བསྒྱེལ་མ་མྱོངས།།

རྔ་གཤང་ཕྱག་གིས་ཕུབ་པའི་གར་སྟབས་ལ།།
ཡི་དམ་ཁྲོ་རྒྱལ་ཆེན་པོའི་གདངས་ཆེན་སྦྲེལ།།
ཟིལ་གནོན་མཆོང་ཆེན་སྒྲུབ་པའི་འགྲུབ་རྟགས་དང་།།
གཤེན་རབ་བདེན་པའི་རོལ་ཆ་བཅད་མ་མྱོངས།།

ལྷ་མི་གྲོས་ཁ་གཅིག་པའི་མཐུ་དཔུང་གིས།།
བྱིན་གྱི་ཚན་ཁ་འབར་བའི་བསྟི་གནས་བསྐྲུན།།
ལོ་རབས་འཕྲེད་ཐིག་བགོམ་པའི་ཕང་བ་རུ།།
རིག་གཞུང་ཆུ་བོ་རྒྱས་པའི་རླབས་ཕྲུ་འཐོར།།

གཡུང་དྲུང་པོ་ཏི་སྔོན་པོའི་བདེན་དོན་བཙལ།།
ལེགས་ཉེས་བཀའ་ཡིས་བགྲོས་པའི་མཚེར་ས་རུ།།
བསྟན་སྐྱོང་གཤེན་གྱི་རུ་དཔུང་གྲལ་དུ་བསྟར།།
འཆད་རྩོད་རྩོམ་པའི་ཤེས་རབ་སྒྲོ་ཟུང་བརྐྱངས།།

འཆད་གླེང་ཚུལ་གསུམ་རིགས་པའི་གངས་ཆར་ཕབ།།
ཚད་གསུམ་དཔང་དུ་བཙུགས་ནས་བདེན་ཁ་བདར།།
གཤེན་སྡེའི་རིག་ཁྱུ་འཚོགས་པའི་གྲལ་ཀ་འགྲིགས།།
མྱུར་མགྱོགས་ཤེས་རབ་ལྷ་ཆེན་ཤུགས་སུ་གསོལ།།

བསྙེན་སྒྲུབ་གཞི་མ་སྒོ་དགུའི་དཀྱིལ་ཆོག་ཕྱེས།།
ཡི་དམ་བཀའ་ཆེན་སྡེ་དགུའི་མདེལ་ཁ་བསྲངས།།
གསང་སྔགས་ཨ་དཀར་ཐེག་པའི་ཆ་ལག་བསྐྱངས།།
ལྷ་ཆེན་དགྱེས་པའི་ཀི་བསྭོའི་མདའ་དར་ཕྱར།།

སྦ་དཀར་ཚིགས་པ་དགུ་ཡི་གཡང་ཆ་ལ།།
ཕྱེ་མར་མདངས་དཀར་སྤྲས་པའི་དར་ལུང་བཏག།
མྱེས་ཆེན་གདོང་དྲུག་གཡང་གི་བྱིན་ཁ་མཐུད།།
ལྷ་མི་གཤེན་རབ་དགྱེས་པའི་ལྷ་རྒྱལ་གྱེར།།

དབལ་ཆེན་ཁྲོ་གཏུམ་འབར་བའི་ལྷ་རུ་བཞེངས།།
སྲིན་པོ་འདྲེ་རྒུ་བྱུར་ཚོགས་མར་ལ་ཕབས།།
མགོན་པོ་ལྷ་མི་གཤེན་གསུམ་ཡར་ལ་གྱུ།།
ཕྱེ་མར་སྤྲིན་དཀར་ཕང་ཕུང་ཤུགས་སུ་མཆོད།།

གྱེར་སྒོ་ཕྱི་ནང་གསུམ་གྱི་རིགས་བསྐྱང་བར།།
ཞུང་སྔགས་ཐོ་ཚེམ་བཟླ་བའི་བསྭོ་སྒྲ་འཚེར།།
བསྟན་སྐྱོང་ལྷ་ངོ་གསོལ་ལ་སྐད་གསང་འབྲུག།
གཤེན་རབ་མཐུ་དཔུང་དམ་པའི་སྡོང་གྲོགས་ཞུས།།

སྤྲིན་དཀར་བླ་བྲེ་བྲེས་པའི་བད་བཙགས་འོག།
ཕྱོགས་བཞིའི་ལྕགས་རི་བཙན་པའི་གྲུ་མདོ་རུ།།
མྱེས་པོའི་ཐབ་ལྷ་གསོལ་བའི་གཤེན་ཕྲུག་རྣམས།།
རིག་པའི་མཆོང་ལྡིང་གཡུང་དྲུང་བོན་གྱིས་རྩེད།།

བགོ་སྐལ་གཤེན་གྱི་ཕ་འབབ་དྲུང་མུ་གྱེར།།
བདུད་རྩི་བཀའ་སྒྲོམ་འཁྱིལ་བའི་མུ་ཁྱུད་རྩེག།
བཤད་སྒྲུབ་སྙེ་ལོ་འཁྲུངས་པའི་ཞིང་ས་བསྐྲུནད།།
རིག་གཞོན་སྟག་ཁྱུ་ཚོགས་པས་ཤུགས་སྐྱོངས་ཤིག།

སེམས་པ་གཉིད་ཀྱིས་དུབ་ནས་མ་རྨོངས་ལ།།
ཁུར་པོ་སྡུག་གིས་བཅའ་ནས་སྒྱིད་མ་ལུག།
བགྲོས་རྩོད་བདེན་ཉམས་དོད་པའི་པང་ཁ་བསྐྲུན།།
འཆད་རྩོད་རིག་གཞུང་སྦྱོང་ལ་རྒྱུན་སྲིངས་ཤིག།

སྤྱི་ལོ་༢༠༢༠/༡༡/༡༨/ཉིན་ཁྱུང་ནག་དགོན་གྱི་བཤད་སྒྲུབ་སྒོམ་པས་དགུ་མཆོད་འཚོགས་སའི་ཕྱེ་མར་སྤྲིན་དཀར་ཕང་ཕུང་འདི་མཐོང་བ་དང་ཤར་ཤར་འཁྱུགས་སོ།།